ರಣಜಿ ಟ್ರೋಫಿಯಲ್ಲಿ ಆಡಲಿರುವ ಅಶ್ವಿ‌ನ್‌

Team Udayavani, Sep 28, 2017, 6:45 AM IST

ನವದೆಹಲಿ: ಪ್ರವಾಸಿ ಆಸ್ಟ್ರೇಲಿಯ ತಂಡದೆದುರಿನ ಏಕದಿನ ಸರಣಿಯಿಂದ ಹೊರಗಿರುವ ಆಫ್ ಸ್ಪಿನ್ನರ್‌ ಆರ್‌. ಅಶ್ವಿ‌ನ್‌ ಅವರು ಮುಂಬರುವ ರಣಜಿ ಟ್ರೋಫಿಯಲ್ಲಿ ತಮಿಳುನಾಡು ಪರ ಆಡುವ ಸಾಧ್ಯತೆಯಿದೆ.

ಅಕ್ಟೋಬರ್‌ 6ರಿಂದ ಚಿಪಾಕ್‌ ಕ್ರೀಡಾಂಗಣದಲ್ಲಿ ಆಂಧ್ರ ಪ್ರದೇಶ ವಿರುದ್ಧ ನಡೆಯಲಿರುವ ಮೊದಲ ಪಂದ್ಯಕ್ಕೆ ಅಶ್ವಿ‌ನ್‌ ಲಭ್ಯರಿರುತ್ತಾರೆಂದು ತಿಳಿದುಬಂದಿದೆ.

ಸದ್ಯ ಅವರು ಕೌಂಟಿಯಲ್ಲಿ ಆಡುತ್ತಿದ್ದಾರೆ. ವೊರ್ಸೆಸ್ಟರ್‌ ಪರ ಆಡುತ್ತಿರುವ ಅವರು 130 ಎಸೆತಗಳಿಂದ 82 ರನ್‌ ಗಳಿಸಿದ್ದಾರೆ. 31ರ ಹರೆಯದ ಅವರು ಅ. 1ರಂದು ಚೆನ್ನೈಗೆ ಮರಳುವ ನಿರೀಕ್ಷೆಯಿದೆ.

ಆಸ್ಟ್ರೇಲಿಯ ವಿರುದ್ಧದ ಏಕದಿನ ಸರಣಿಗೆ ಮತ್ತು ಮೂರು ಪಂದ್ಯಗಳ ಟ್ವೆಂಟಿ20 ಸರಣಿಗೂ ಅಶ್ವಿ‌ನ್‌ ಅವರನ್ನು ಭಾರತ ತಂಡಕ್ಕೆ ಆಯ್ಕೆ ಮಾಡಿಲ್ಲ.

ಒಂದು ವೇಳೆ ಲಭ್ಯವಿದ್ದಾರೆಂದರೆ ಅವರು ತಮಿಳುನಾಡು ಪರ ಆಡುವ ಭರವಸೆಯಿದೆ ಎಂದು ತಮಿಳುನಾಡು ಕ್ರಿಕೆಟ್‌ ಅಸೋಸಿಯೇಶನ್‌ನ ಉನ್ನತ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.