ಉದಯ ಟಿವಿಯಲ್ಲಿ ದಸರೆ ಸ್ಪೆಷಲ್‌

Team Udayavani, Sep 28, 2017, 10:00 PM IST

ದಸರೆ ರಜೆಯಲ್ಲಿ ಪ್ರೇಕ್ಷಕರನ್ನು ಟಿವಿ ಬಿಟ್ಟು ಕದಲದಂತೆ ಮಾಡಲು ಉದಯ ಟಿವಿ ಹೊರಟಿದೆ. ಅದಕ್ಕಾಗಿ ಶುಕ್ರವಾರ ಹಾಗೂ ಶನಿವಾರ ವೀಕ್ಷಕರಿಗೆ ಮನರಂಜನೆಯ ಮಹಾಪೂರವನ್ನೇ ನೀಡುತ್ತಿದೆ. ಎರಡು ಹೊಚ್ಚ ಹೊಸ ಚಲನಚಿತ್ರಗಳು,ಸೀರಿಯಲ್‌ ಹಬ್ಬ ಮತು ¤ಕೈರುಚಿಯ ವಿಶೇಷ ಸಂಚಿಕೆಗಳು ಈ ಎರಡು ದಿನಗಳಲ್ಲಿ ಪ್ರಸಾರವಾಗಲಿದೆ.

ಸೆಪ್ಟೆಂಬರ್‌ 29 (ಗುರುವಾರ) ರಂದು ಮಧ್ಯಾಹ್ನ 12ಕ್ಕೆ ಕೈರುಚಿ ವಿಶೇಷ ಕಾರ್ಯಕ್ರಮ ಪ್ರಸಾರವಾಗಲಿದೆ. “ಚಾರ್ಲಿ’ ಹಾಗೂ ಇತ್ತೀಗಷ್ಟೆ ಬಿಡುಗಡೆಯಾದ “ಭರ್ಜರಿ’ ಚಿತ್ರಗಳಲ್ಲಿ ನಟಿಸಿರುವ ನಾಯಕಿ ವೈಶಾಲಿ ವೀಕ್ಷಕರಿಗೆ ರುಚಿಕರವಾದ ಅಡುಗೆಯನ್ನು ತಿಳಿಸಿಕೊಡಲಿದ್ದಾರೆ. ನಂತರ ಇತ್ತಿಚಿಗಷ್ಟೇ ಪ್ರಸಾರವಾದ “ದೊಡ್ಮನೆ ಸೊಸೆ’ ನಟಿ ಗಗನ ಅವರು ಹಬ್ಬದ ಸಿಹಿಗೆ ಮತ್ತೂಂದು ಸಿಹಿಯನ್ನು ಹೇಳಿಕೊಡಲಿದ್ದಾರೆ.

ಅಂದು ಮಧ್ಯಾಹ್ನ 1 ಗಂಟೆಗೆ ಕೋಮಲ್‌, ಪ್ರಿಯಾಮಣಿ ನಟಿಸಿರುವ “ಕಥೆ,ಚಿತ್ರಕಥೆ,ನಿರ್ದೇಶನ ಪುಟ್ಟಣ್ಣ’ ಚಿತ್ರ ಪ್ರಸಾರವಾಗಲಿದೆ. ಸಿನಿಮಾ ಮುಗಿದ ಕೂಡಲೇ ಸಂಜೆ 4.30ಕ್ಕೆ ಸಿರೀಯಲ್‌ ಹಬ್ಬ ಪ್ರಸಾರ ಕಾಣಲಿದೆ. ಇಲ್ಲಿ ಸೀರಿಯಲ್‌ ತಾರೆಯರ ಡ್ಯಾನ್ಸ್‌, ಮಸ್ತಿ, ಸಂವಾದ ವೀಕ್ಷಕರಿಗೆ ಸಿಗಲಿದೆ. 

ಇನ್ನು, ಸೆಪ್ಟೆಂಬರ್‌ 30ರ ಶನಿವಾರ ಸಂಜೆ 6 ಗಂಟೆಗೆ ಶರಣ್‌-ಚಿಕ್ಕಣ್ಣ ಅಭಿನಯದ “ರಾಜ್‌-ವಿಷ್ಣು’ ಚಿತ್ರ ಪ್ರಸಾರವಾಗಲಿದೆ. ಸಿಕ್ಕಾಪಟ್ಟೆ ನಿರೀಕ್ಷೆ ಹುಟ್ಟಿಸಿದ್ದ ಈ ಚಿತ್ರ ಚಿತ್ರಮಂದಿರದಲ್ಲಿ ಓಡಲಿಲ್ಲ. ಈಗ ಟಿವಿಯಲ್ಲಿ ಪ್ರದರ್ಶನ ಕಾಣುತ್ತಿದೆ.