ನವೆಂಬರ್‌ನಲ್ಲಿ “ಪೈಲ್ವಾನ್‌’ ಶುರು

Team Udayavani, Oct 2, 2017, 8:00 PM IST

“ಹೆಬ್ಬುಲಿ’ ನಂತರ ನಿರ್ದೇಶಕ ಕೃಷ್ಣ ಸುದೀಪ್‌ ಅವರಿಗೆ “ಪೈಲ್ವಾನ್‌’ ಚಿತ್ರ ಮಾಡುತ್ತಿರುವ ವಿಚಾರ ನಿಮಗೆ ಗೊತ್ತೇ ಇದೆ. ಈಗಾಗಲೇ ಫ‌ಸ್ಟ್‌ಲುಕ್‌ ಕೂಡಾ ಬಿಡುಗಡೆಯಾಗಿದೆ. ಚಿತ್ರೀಕರಣ ಯಾವಾಗ ಆರಂಭವಾಗುತ್ತದೆ ಎಂಬ ಪ್ರಶ್ನೆಗೆ ಈಗ ಉತ್ತರ ಸಿಕ್ಕಿದೆ. ನವೆಂಬರ್‌ ಮೊದಲ ವಾರದಿಂದ “ಪೈಲ್ವಾನ್‌’ ಚಿತ್ರೀಕರಣ ಆರಂಭವಾಗಲಿದೆ. ಸದ್ಯ ಸುದೀಪ್‌ ಬ್ಯಾಂಕಾಕ್‌ನಲ್ಲಿ “ದಿ ವಿಲನ್‌’ ಚಿತ್ರೀಕರಣದಲ್ಲಿ ತೊಡಗಿಸಿಕೊಂಡಿದ್ದು, ಅದು ಮುಗಿಸಿಕೊಂಡು ಬಂದು “ಪೈಲ್ವಾನ್‌’ ಆಗಲಿದ್ದಾರೆ.

ನವೆಂಬರ್‌ನಿಂದ ಆರಂಭವಾಗುವ ಚಿತ್ರೀಕರಣ ಸತತವಾಗಿ ನಡೆಯಲಿದೆ. ಹೌದು, ನವೆಂಬರ್‌ನಿಂದ “ಪೈಲ್ವಾನ್‌’ ಚಿತ್ರದ ಚಿತ್ರೀಕರಣವಾಗಲಿದ್ದು, ಇದರ ಜೊತೆಜೊತೆಗೆ “ಕೋಟಿಗೊಬ್ಬ 3′ ಚಿತ್ರದ ಚಿತ್ರೀಕರಣ ನಡೆಯುವ ಸಾಧ್ಯತೆ ಇದೆ. ಈ ಮಧ್ಯೆ, ಕಲಾವಿದರನ್ನು ಆಯ್ಕೆ ಮಾಡುವಲ್ಲಿ ಹಾಗೂ ಡೇಟ್ಸ್‌ ಹೊಂದಿಸುವಲ್ಲಿ ಕೃಷ್ಣ ಬಿಝಿಯಾಗಿದ್ದಾರೆ. ಕೃಷ್ಣ ನಿರ್ದೇಶನದ “ಹೆಬ್ಬುಲಿ’ ಚಿತ್ರದಲ್ಲಿ ಅಮಲಾ ಪೌಲ್‌ ನಾಯಕಿಯಾಗಿದ್ದರು.

ಈಗ “ಪೈಲ್ವಾನ್‌’ ಚಿತ್ರಕ್ಕೆ ಪರಭಾಷೆಯ ಸ್ಟಾರ್‌ ನಾಯಕಿಯನ್ನು ಕರೆತರಲು ಕೃಷ್ಣ ಪ್ರಯತ್ನಿಸುತ್ತಿದ್ದಾರೆ. ಈಗಾಗಲೇ ಕೆಲವು ಸ್ಟಾರ್‌ ನಟಿಯರ ಜೊತೆ ಮಾತುಕತೆ ನಡೆದಿದ್ದು, ಸದ್ಯದಲ್ಲೇ “ಪೈಲ್ವಾನ್‌’ಗೆ ಜೋಡಿ ಯಾರೆಂಬುದು ಗೊತ್ತಾಗಲಿದೆ. ಚಿತ್ರದ ಟೈಟಲ್‌ಗೆ ತಕ್ಕಂತೆ ಸುದೀಪ್‌ ಅವರ ಗೆಟಪ್‌ ಬದಲಾಗಲಿದ್ದು, ಈಗಾಗಲೇ ಅದರ ಕಸರತ್ತಿನಲ್ಲಿ ಸುದೀಪ್‌ ತೊಡಗಿದ್ದಾರೆ ಕೂಡಾ.

ಈ ಚಿತ್ರಕ್ಕಾಗಿ ಅವರು ಬಾಡಿ ಟೋನ್‌ ಮಾಡುತ್ತಿದ್ದು, ಹೊಸ ರೀತಿ ಅಭಿಮಾನಿಗಳಿಗೆ ದರ್ಶನ ನೀಡಲಿದ್ದಾರೆ. ಈ ಹಿಂದೆ ಕಾಣಿಸಿಕೊಳ್ಳದಂತಹ ಹೊಸ ಬಗೆಯ ಪಾತ್ರ ಇದಾದ ಕಾರಣ ಸುದೀಪ್‌ ಅವರು ಕೂಡಾ, ಪಾತ್ರಕ್ಕೆ ಬೇಕಾದ ಪೂರ್ವ ಸಿದ್ಧತೆಯಲ್ಲಿ ತೊಡಗಿದ್ದಾರೆ. ಇನ್ನು, ಚಿತ್ರಕ್ಕೆ ಅರ್ಜುನ್‌ ಜನ್ಯಾ ಸಂಗೀತ ನೀಡುತ್ತಿದ್ದು, ಅಕ್ಟೋಬರ್‌ 20ರಿಂದ ಹಾಡುಗಳ ದ್ವನಿಮುದ್ರಣ ಕಾರ್ಯ ಆರಂಭವಾಗಲಿದೆ.

“ಪೈಲ್ವಾನ್‌’ ಚಿತ್ರವನ್ನು ಆರ್‌.ಆರ್‌.ಆರ್‌. ಮೋಷನ್‌ ಪಿಕ್ಚರ್ ಬ್ಯಾನರ್‌ನಡಿ ಸ್ವಪ್ನ ಕೃಷ್ಣ ಮತ್ತು ಕೃಷ್ಣ ನಿರ್ಮಿಸುತ್ತಿದ್ದಾರೆ. ಇನ್ನು ನಿರ್ದೇಶನ ಮಾಡುವ ಜೊತೆಗೆ ಕಥೆ ಹಾಗೂ ಚಿತ್ರಕಥೆಯನ್ನು ಕೃಷ್ಣ ರಚಿಸಿದ್ದಾರೆ. ಈ ಚಿತ್ರಕ್ಕಾಗಿ ದಾವಣಗೆರೆ, ಹುಬ್ಬಳ್ಳಿ ಸುತ್ತಮುತ್ತ ಚಿತ್ರದ ಪ್ರಮುಖ ದೃಶ್ಯಗಳ ಚಿತ್ರೀಕರಣ ನಡೆಯಲಿದೆ. ಕರುಣಾಕರನ್‌ ಅವರು ಛಾಯಾಗ್ರಹಣ ಮಾಡಲಿದ್ದಾರೆ.