ಮಹರ್ಷಿ ವಾಲ್ಮೀಕಿಗೆ ಎಲ್ಲೆಡೆ ನಮನ

Team Udayavani, Oct 6, 2017, 12:28 PM IST

ಇಂಡಿ: ಮಹರ್ಷಿ ವಾಲ್ಮೀಕಿ ಬರೆದ ರಾಮಾಯಣ ಮಹಾಕಾವ್ಯ ಭಕ್ತಿ, ಸತ್ಯ, ನ್ಯಾಯ ನೀತಿಗಳ ಆಧಾರ ಸ್ಥಂಭವಾಗಿದ್ದು, ಮಾನವೀಯ ನೆಲೆಗಟ್ಟಿನ ಮೇಲೆ ನಡೆಯಲು ದಾರಿ ದೀಪವಾಗಿದೆ. ರಾಮಾಯಣ ಮಹಾಕಾವ್ಯ ಮೂರುಸಾವಿರ ಭಾಷೆಗಳಲ್ಲಿ ಅನುವಾದಗೊಂಡಿದೆ ಎಂದು ಶಾಸಕ ಯಶವಂತರಾಯಗೌಡ ಪಾಟೀಲ ಹೇಳಿದರು.

ಪಟ್ಟಣದ ವಿಜಯಪುರ ವಾಲ್ಮೀಕಿ ಸಮುದಾಯ ಭವನದಲ್ಲಿ ತಾಲೂಕು ಆಡಳಿತ, ತಾಲೂಕು ಪಂಚಾಯತ್‌, ಪುರಸಭೆ ಹಾಗೂ ಸಮಾಜ ಕಲ್ಯಾಣ ಇಲಾಖೆ ಸಂಯುಕ್ತಾಶ್ರಯದಲ್ಲಿ ಆಯೋಜಿಸಿದ್ದ ಮಹರ್ಷಿ ವಾಲ್ಮೀಕಿ ಜಯಂತ್ಯುತ್ಸವ ಕಾರ್ಯಕ್ರಮದಲ್ಲಿ ಮಹರ್ಷಿ ವಾಲ್ಮೀಕಿ ಭಾವಚಿತ್ರಕ್ಕೆ ಪೂಜೆ ನೆರವೇರಿಸಿ ಅವರು ಮಾತನಾಡಿದರು.

ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ದೀನ ದಲಿತರ ಬಗ್ಗೆ ಅಪಾರ ಕಾಳಜಿ ಹೊಂದಿದ್ದಾರೆ. ಶೋಷಿತ ಸಮುದಾಯದ ಅಭಿವೃದ್ಧಿಗಾಗಿ ಸಮಾಜ ಕಲ್ಯಾಣ ಇಲಾಖೆಯಿಂದ 20 ಸಾವಿರ ಕೋಟಿ ಹಣ ನೀಡಿ ಸಮುದಾಯದ ಏಳ್ಗೆಗೆ ಶ್ರಮಿಸುತ್ತಿದ್ದಾರೆ ಎಂದರು.

ಗುತ್ತಿಬಸವಣ, ಮುಳವಾಡ ಏತನೀರಾವರಿ ಯೋಜನೆಗಳು ಅಂತಿಮ ಹಂತದಲ್ಲಿವೆ. ತಾಲೂಕಿನ ಬಹುಹಳ್ಳಿ ಕುಡಿಯುವ ನೀರಿನ ಯೋಜನೆ ಕೆರೆತುಂಬುವ ಯೋಜನೆಗಳು ಪ್ರಾರಂಭವಾಗಿವೆ. ನಿಂಬಾಳ, ಹಂಜಗಿ, ಅರ್ಜನಾಳ, ಕೊಟ್ನಾಳ ಕೆರೆಗಳು ಮುಖ್ಯಮಂತ್ರಿಗಳು ಜಿಲ್ಲೆಗೆ ಭೇಟಿ ನೀಡುವ ಪೂರ್ವದಲ್ಲಿ ಈ ಭಾಗದ ಕೆರೆಗಳನ್ನು ತುಂಬಿಸುವುದಾಗಿ ಹೇಳಿದರು.

ಕ್ಷೇತ್ರ ಸಮನ್ವಯಾಧಿಕಾರಿ ಸಿ.ಎಂ. ಬಂಡಗಾರ ಮಹರ್ಷಿ ವಾಲ್ಮೀಕಿ ಕುರಿತು ಉಪನ್ಯಾಸ ನೀಡಿದರು. ಪುರಸಭೆ ಅಧ್ಯಕ್ಷ ಶ್ರೀಕಾಂತ ಕುಡಿಗನೂರ, ತಾ.ಪಂ ಅಧ್ಯಕ್ಷ ರುಕ್ಮುದೀನ್‌ ತದ್ದೇವಾಡಿ, ತಾ.ಪಂ ಸದಸ್ಯ ಅಣ್ಣಪ್ಪ ಬಿದರಕೋಟಿ, ಉಪವಿಭಾಗಾಧಿಕಾರಿ ಮಹಾದೇವಪ್ಪ ಮುರಗಿ, ಜಿ.ಪಂ ಮಾಜಿ ಸದಸ್ಯೆ ಸುನಂದಾ ವಾಲಿಕಾರ, ಬಿಇಒ ಜೆ.ಟಿ. ತಳಕೇರಿ, ಇಲಿಯಾಸ ಬೋರಾಮಣಿ, ತಹಶೀಲ್ದಾರ ಸಂತೋಷ ಮ್ಯಾಗೇರಿ, ತಾ.ಪಂ ಅಧಿಕಾರಿ ರಾಜಕುಮಾರ ತೊರವಿ, ಪುರಸಭೆ ಮುಖ್ಯಾಧಿಕಾರಿ ಎಸ್‌.ಡಿ. ನಾಯ್ಕ, ಸಮಾಜಕಲ್ಯಾಣ ಅಧಿಕಾರಿ ಆರ್‌.ವಿ. ಕೊಕಟನೂರ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಅಧಿಕಾರಿ ಗೋವರ್ಧನ ಬಿ.ಸಿ, ಡಿವೈಎಸ್‌ಪಿ ರವೀದ್ರ ಶಿರೂರ ವೇದಿಕೆಯಲ್ಲಿದ್ದರು.

ನೌಕರ ಸಂಘದ ಅಧ್ಯಕ್ಷ ಬಸವರಾಜ ರಾವೂರ, ಸಣ್ಣ ನೀರಾವರಿ ಅಧಿಕಾರಿ ಎಸ್‌.ಎಸ್‌. ಬಿರಾದಾರ, ಪಿಎಸ್‌ಐ ಎಸ್‌.ಜಿ. ಬಿರಾದಾರ, ಪ್ರಶಾಂತ ಕಾಳೆ, ದೈಹಿಕ ಶಿಕ್ಷಣಾಧಿಕಾರಿ ಎ.ಬಿ. ಕೌಲಗಿ, ಪಂಡೀತ ಕೊಡಹೊನ್ನ, ನಿಜಣ್ಣಾ ಕಾಳೆ, ಶ್ರೀಶೈಲ ವಾಲಿಕಾರ (ಅಂಜುಟಗಿ), ಮಹೇಶ ಹೊನ್ನಬಿಂದಗಿ, ಧರ್ಮರಾಜ ವಾಲಿಕಾರ, ಜಾವೀದ ಮೋಮಿನ, ಗುರವ ಪಿ. ಮತ್ತಿತರರು ಇದ್ದರು.