ನಂ. ವನ್‌ ಸಿಮೋನಾ ಹಾಲೆಪ್‌ಗೆ ಆಘಾತ ಗಾರ್ಸಿಯಾಗೆ ಚೀನ ಓಪನ್‌ ಪ್ರಶಸ್ತಿ

Team Udayavani, Oct 9, 2017, 7:05 AM IST

ಬೀಜಿಂಗ್‌: ಶ್ರೇಯಾಂಕರಹಿತ ಆಟಗಾರ್ತಿ ಫ್ರಾನ್ಸ್‌ನ ಕ್ಯಾರೋಲಿನ್‌ ಗಾರ್ಸಿಯಾ ಅವರು ವಿಶ್ವದ ನಂಬರ್‌ ವನ್‌ ಸಿಮೋನಾ ಹಾಲೆಪ್‌ ಅವರನ್ನು ಎರಡು ಸೆಟ್‌ಗಳ ಕಠಿನ ಹೋರಾಟದಲ್ಲಿ ಸೋಲಿಸಿ ಚೀನ ಓಪನ್‌ ಟೆನಿಸ್‌ ಕೂಟದ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ.

ಸತತ ಎರಡನೇ ವಾರ ಗಾರ್ಸಿಯಾ ಪ್ರಶಸ್ತಿ ಗೆದ್ದ ಸಾಧನೆ ಮಾಡಿದ್ದಾರೆ. ಕಳೆದ ವಾರ ಅವರು ವುಹಾನ್‌ ಓಪನ್‌ ಟೆನಿಸ್‌ ಕೂಟದ ಪ್ರಶಸ್ತಿ ಜಯಿಸಿದ್ದರು. ಒಟ್ಟಾರೆ ಇದು ಅವರ ಬಾಲ್ವೆಯ ಐದನೇ ಡಬ್ಲ್ಯುಟಿಎ ಕೂಟದ ಪ್ರಶಸ್ತಿಯಾಗಿದೆ.

ಕಾಲು ನೋವಿನ ಹೊರತಾಗಿಯೂ ಅಮೋಘ ಆಟವಾಡಿದ ಗಾರ್ಸಿಯಾ 6-4, 7-6 (7-3) ಸೆಟ್‌ಗಳಿಂದ ಜಯ ಸಾಧಿಸಿದರು. ನೋವಿನಿಂದಾಗಿ ಅವರು ಪಂದ್ಯದ ನಡುವೆ ಆಗಾಗ್ಗೆ ಚಿಕಿತ್ಸೆ ಪಡೆಯುತ್ತಿದ್ದರು. ಸತತ ಎರಡು ಪ್ರಶಸ್ತಿ ಗೆಲ್ಲುವ ಮೂಲಕ 23ರ ಹರೆಯದ ಗಾರ್ಸಿಯಾ ವಿಶ್ವದ 15ನೇ ಸ್ಥಾನದಿಂದ 9ನೇ ಸ್ಥಾನಕ್ಕೇರುವ ಸಾಧ್ಯತೆಯಿದೆ. ಈ ಸೋಲಿನಿಂದ ಸೋಮವಾರ ಘೋಷಿಸುವ ನೂತನ ರ್‍ಯಾಂಕಿಂಗ್‌ನಲ್ಲಿ ಹಾಲೆಪ್‌ ಅವರ ಅಗ್ರಸ್ಥಾನಕ್ಕೆ ಏನೂ ತೊಂದರೆಯಾಗುವುದಿಲ್ಲ.