ಪ್ರಥಮ್‌ ಹೊಸ ಬಿಲ್ಡಪ್‌!

Team Udayavani, Oct 9, 2017, 10:43 AM IST

ಗಾಂಧಿನಗರದಲ್ಲಿ ಎಲ್ಲವೂ ಹೀಗೆ ಅಂತ ಹೇಳ್ಳೋದು ಕಷ್ಟ. ಯಾಕೆಂದರೆ, ಇಲ್ಲಿ ಎಷ್ಟೇ ಹೆಸರು ಮಾಡಿದ್ದರೂ, ಅದೆಷ್ಟೇ ಮಾತುಗಳನ್ನು ಹರಿಬಿಟ್ಟರೂ ಅದೃಷ್ಟ ಅನ್ನೋದು ಇರದೇ ಹೋದರೆ, ಎಷ್ಟು ಗುರುತಿಸಿಕೊಂಡರೂ ಪ್ರಯೋಜನವಿಲ್ಲ. ಇಲ್ಲೀಗ ಹೇಳಹೊರಟಿರುವ ವಿಷಯ, ಬಿಗ್‌ಬಾಸ್‌ ಖ್ಯಾತಿಯ ಪ್ರಥಮ್‌ ಬಗ್ಗೆ. ಹಾಗಂತ ಪ್ರಥಮ್‌, ಮತ್ತೆ ಯಾರ ಜತೆಯೂ ಜಗಳ ಮಾಡಿಕೊಂಡಿಲ್ಲ. ಆದರೆ, ಅವರೀಗ ಇನ್ನೊಂದು ಹೊಸ ಚಿತ್ರಕ್ಕೆ ಕೈ ಹಾಕಿದ್ದಾರೆ!

ಹೌದು, ಅವರು ನಿರ್ದೇಶಿಸಿದ, ಅಭಿನಯಿಸಿದ ಯಾವ ಚಿತ್ರವೂ ಬಂದಿಲ್ಲ. ಆದರೆ, ಒಂದರ ಮೇಲೊಂದು ಚಿತ್ರ ಮಾತ್ರ ಸೆಟ್ಟೇರುತ್ತಲೇ ಇದೆ. ಬಿಡುಗಡೆ ಭಾಗ್ಯದ ಬಗ್ಗೆ ಸ್ವತಃ ಅವರಿಗೇ ಗೊತ್ತಿರದಿದ್ದರೂ, ಸುಖಾಸುಮ್ಮನೆ “ಬಿಲ್ಡಪ್‌’ ಮಾತುಗಳಿಗೇನೂ ಬರವಿಲ್ಲ. ಅಂದಹಾಗೆ, ಪ್ರಥಮ್‌ ಈಗ ಹೊಸ ಚಿತ್ರ ನಿರ್ದೇಶಿಸುತ್ತಿದ್ದಾರೆ. ಆ ಚಿತ್ರಕ್ಕೆ “ಬಿಲ್ಡಪ್‌’ ಎಂದು ನಾಮಕರಣ ಮಾಡಿದ್ದಾರೆ. “ಇವನದು ಬರೀ ಇದೇ ಆಯ್ತು ಗುರು’ ಇದು ಶೀರ್ಷಿಕೆಯ ಅಡಿಬರಹ.

ಈ ಹಿಂದೆ “ದೇವ್ರೌನೆ ಬುಡುಗುರು’ ಎಂಬ ಚಿತ್ರ ನಿರ್ದೇಶಿಸಿದ್ದ ಪ್ರಥಮ್‌, ಆ ಚಿತ್ರವಿನ್ನೂ ಮುಗಿದೇ ಇಲ್ಲ, ಆಗಲೇ ಇನ್ನೊಂದು ಚಿತ್ರ ನಿರ್ದೇಶನಕ್ಕೆ ಕೈ ಹಾಕಿದ್ದಾರೆ. ಈ ಚಿತ್ರದಲ್ಲಿ ಅವರು ನಟನೆ ಜತೆಗೆ ನಿರ್ದೇಶನವನ್ನೂ ಮಾಡುತ್ತಿದ್ದಾರೆ. ಅದೊಂದು ಸೂಪರ್‌ಸ್ಟಾರ್‌ ಮತ್ತು ಕುರುಡು ದೆವ್ವದ ಕಥೆಯಂತೆ. ಇಲ್ಲಿ ವಿಶೇಷ ವ್ಯಕ್ತಿಗಳು ಸಹ ಕಾಣಿಸಿಕೊಳ್ಳಲಿದ್ದಾರಂತೆ. ತೆಲುಗು ಮೂಲದ ಉದ್ಯಮಿಯೊಬ್ಬರು ನಿರ್ಮಾಣ ಮಾಡೋಕೆ ಮುಂದಾಗಿದ್ದಾರಂತೆ.

ಕನ್ನಡ ಹಾಗು ತೆಲುಗು ಭಾಷೆಯಲ್ಲಿ ತಯಾರು ಮಾಡುವ ಯೋಚನೆ ನಿರ್ಮಾಪಕರಿಗಿದೆಯಂತೆ. ಆದರೆ, ಇಲ್ಲಿ ಚಿತ್ರದ ಶೀರ್ಷಿಕೆ ಹೊರತಾಗಿ ಬೇರೇನೂ ಪಕ್ಕಾ ಆಗಿಲ್ಲ. ಚಿತ್ರದಲ್ಲಿ ನಾಯಕಿ ಯಾರು, ತಂತ್ರಜ್ಞರು ಯಾರು, ಯಾರೆಲ್ಲ ಇರುತ್ತಾರೆ, ಯಾವಾಗ ಚಿತ್ರೀಕರಣ ಶುರು ಇತ್ಯಾದಿ ಪ್ರಶ್ನೆಗಳಿಗೆ ಪ್ರಥಮ್‌ ಬಳಿ ಉತ್ತರವಿಲ್ಲ. ಆದರೆ, “ಬಿಲ್ಡಪ್‌’ ಶೀರ್ಷಿಕೆ ಮಾತ್ರ ಪಕ್ಕಾ ಆಗಿದೆ, ಮಿಕ್ಕಿದ್ದು ಇಷ್ಟರಲ್ಲೇ ಗೊತ್ತಾಗುತ್ತೆ ಎಂದಷ್ಟೇ ಹೇಳಿ ಸುಮ್ಮನಾಗುತ್ತಾರೆ ಪ್ರಥಮ್‌.

ಅಂದಹಾಗೆ, ಪ್ರಥಮ್‌ ಈಗ “ಎಂಎಲ್‌ಎ”, “ದೇವರಂಥ ಮನುಷ್ಯ’ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರಗಳು ಮುಗಿಯುವ ಹಂತದಲ್ಲಿವೆಯಂತೆ. ಆದರೆ, ಯಾವಾಗ ಎಂಬುದು ಗೊತ್ತಿಲ್ಲ. ಆದರೂ ಇನ್ನೂ ಮೂರ್‍ನಾಲ್ಕು ಚಿತ್ರಗಳಲ್ಲಿ ನಟಿಸುವ ಸಾಧ್ಯತೆ ಇದೆ. ಆದರೆ, ನನಗೆ ಸಮಯವಿಲ್ಲ ಎನ್ನುತ್ತಲೇ, “ಬಿಲ್ಡಪ್‌’ ಬಗ್ಗೆ ಹೇಳಿಕೊಳ್ಳುತ್ತಾರೆ ಪ್ರಥಮ್‌.

ಅದೇನೆ ಇರಲಿ, ಒಂದು ಸಿನಿಮಾವಾದರೂ ಬಿಡುಗಡೆಯಾದರೆ ಸಾಕು ಅಂತ ಅವರೂ ಕಾಯುತ್ತಿದ್ದಾರೆ. ಅವರ ನಿರ್ದೇಶನದ ಮೊದಲ ಚಿತ್ರದ ಕಥೆ ಏನಾಯ್ತು? ಅಂದರೆ, ಅದಕ್ಕೆ ನನ್ನ ಡೇಟ್ಸೇ ಇಲ್ಲ ಅನ್ನುತ್ತಾರೆ ಪ್ರಥಮ್‌. ಹಾಗಾದರೆ, ಇಷ್ಟೊಂದು ಬಿಜಿ ನಡುವೆ “ಬಿಲ್ಡಪ್‌’ ಚಿತ್ರ ನಿರ್ದೇಶನಕ್ಕೆ ಅಣಿಯಾಗುತ್ತಿದ್ದಾರೆ. ಹಾಗಾದರೆ, “ಬಿಲ್ಡಪ್‌’ ಕಥೆ ಏನೆಂಬುದು ಮುಂದಿರುವ ಪ್ರಶ್ನೆ.