ಮಾದಕ ಮಾಫಿಯಾ ಮೂಲ ಇನ್ನೂ ನಿಗೂಢ!

Team Udayavani, Oct 9, 2017, 11:56 AM IST

ಬೆಂಗಳೂರು: ರಾಜಧಾನಿಯಲ್ಲಿ ಡ್ರಗ್ಸ್‌ ಮಾರಾಟ ಜಾಲ ತನ್ನ ಕಬಂಧ ಬಾಹುಗಳನ್ನು ವಿಸ್ತರಿಸುತ್ತಲೇ ಇದೆ. ಈ ಮಾಫಿಯಾಗೆ ಕಡಿವಾಣ ಹಾಕಬೇಕಿರುವ ಪೊಲೀಸರಿಗೆ ಇದುವರೆಗೂ ಸಿಕ್ಕಿರುವುದು ಮಾದಕವ್ಯಸನಿಗಳು, ಮಾರಾಟ ಮಧ್ಯವರ್ತಿಗಳು ಮಾತ್ರ. ಆದರೆ, ಈ ಸಮಾಜಘಾತುಕ ಮಾಫಿಯಾದ ಮೂಲ ಬೇರು ಎಲ್ಲಿದೆ ಎಂಬುದು ಈಗಲೂ ನಿಗೂಢ. ಹೀಗಾಗಿ ನಗರದಲ್ಲಿ ಮಾದಕ ವಸ್ತು ಮಾರಾಟ, ಸೇವನೆ ಪ್ರಕರಣಗಳು ವರ್ಷದಿಂದ ವರ್ಷಕ್ಕೆ ವೃದ್ಧಿಸುತ್ತಲೇ ಇರುವ ಅಘಾತಕಾರಿ ಅಂಶ ಬಯಲಾಗಿದೆ.

ನಗರದಲ್ಲಿ ಕಳೆದ ಐದು ವರ್ಷಗಳಲ್ಲಿ ಮಾದಕದ್ರವ್ಯ ಸೇವನೆ, ಮಾರಾಟ ಮಾಡಿದ ಮಧ್ಯವರ್ತಿಗಳ ವಿರುದ್ಧ ಎನ್‌ಡಿಪಿಎಸ್‌ ಕಾಯ್ದೆ ಅಡಿಯಲ್ಲಿ 576 ಪ್ರಕರಣಗಳನ್ನು ದಾಖಲಿಸಿಕೊಂಡಿದ್ದು ನೂರಾರು ಆರೋಪಿಗಳ ಬಂಧನವಾಗಿದೆ. ಆಘಾತಕಾರಿ ಸಂಗತಿಯೆಂದರೆ ಈ ಪ್ರಕರಣಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿದ್ದು, 2016ರಲ್ಲಿ ರಾಜಧಾನಿಯಲ್ಲಿ ಡ್ರಗ್ಸ್‌ ಮಾರಾಟ, ಸೇವನೆ ಸಂಬಂಧಿಸಿದಂತೆ  128 ಪ್ರಕರಣಗಳು ದಾಖಲಾಗಿವೆ.

ಈ ವರ್ಷ ಸೆಪ್ಟೆಂಬರ್‌ ಅಂತ್ಯಕ್ಕೆ 281 ಪ್ರಕರಣಗಳು ದಾಖಲಾಗಿದ್ದು, 287 ಮಂದಿ ಆರೋಪಿಗಳನ್ನು ಬಂಧಿಸಿ ಕೋಟ್ಯಂತರ ರೂ. ಮೌಲ್ಯದ ಮಾದಕ ವಸ್ತುಗಳನ್ನು  ಜಪ್ತಿ ಮಾಡಲಾಗಿದೆ. ಕೆಲ ದಿನಗಳ ಹಿಂದಷ್ಟೇ ಕಾರು ಅಪಘಾತ ಪ್ರಕರಣದಲ್ಲಿ ಬಂಧಿತನಾಗಿರುವ ಉದ್ಯಮಿ ದಿ. ಆದಿಕೇಶವುಲು ಮೊಮ್ಮಗ ಗೀತಾವಿಷ್ಣು ಕಾರಿನಲ್ಲಿ 110 ಗ್ರಾಂ ಮಾದಕ ವಸ್ತು ಪತ್ತೆಯಾಗಿತ್ತು.

ಮಾದಕ ವಸ್ತುವಿನ ಮೂಲದ ಬಗ್ಗೆ ಬಾಯ್ಬಿಡಿಸಲು ಸಿಸಿಬಿ ಪೊಲೀಸರು ಆರೋಪಿ ಗೀತಾವಿಷ್ಣುನನ್ನು ಸತತ ಐದುದಿನಗಳಿಂದ ವಿಚಾರಣೆ ನಡೆಸುತ್ತಿದ್ದರೂ ಮಾಹಿತಿ ಸಿಕ್ಕಿಲ್ಲ. ಆರೋಪಿಗೆ ಆಂಧ್ರದ ಡ್ರಗ್ಸ್‌ ಜಾಲದ ಸಂಪರ್ಕವಿದ್ದು, ಅಲ್ಲಿಂದಲೇ ತರಿಸಿಕೊಂಡ ವದಂತಿಯಿದೆ. ಹಾಗೊಂದು ವೇಳೆ ಗೀತಾವಿಷ್ಣು ಹಾಗೂ ಆತನ ಸ್ನೇಹಿತರು ಮಾಹಿತಿ ನೀಡಿದರೆ ನಗರ ಪೊಲೀಸರಿಗೆ ಸವಾಲಾಗಿರುವ ಡ್ರಗ್‌ ಮಾಫಿಯಾದ ಮೂಲದ ಸುಳಿವು ಸಿಗಲಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು ಅಭಿಪ್ರಾಯಪಡುತ್ತಾರೆ.

ಸಿಸಿಬಿಯ ಮಾದಕದ್ರವ್ಯ ನಿಗ್ರಹ ವಿಭಾಗ ಹಾಗೂ ಪೊಲೀಸರು ಪ್ರತಿ ವರ್ಷ ಮಾದಕದ್ರವ್ಯ ಸೇವನೆ, ಮಾರಾಟ ಮಾಡುವ ಆರೋಪಿಗಳ ಬೆನ್ನತ್ತಿ ಹಲವರನ್ನು ಬಂಧಿಸಿ ಜೈಲುಗಟ್ಟುತ್ತಿದ್ದರೂ, ಮಾಫಿಯಾದ ಅಸಲಿ ಸೂತ್ರಧಾರರು ತೆರೆಮರೆಯಲ್ಲೇ ಇದ್ದಾರೆ.

ಹದಿಹರೆಯದವರೇ ಟಾರ್ಗೆಟ್‌: ನಗರದಲ್ಲಿ ಬೇರುಬಿಟ್ಟಿರುವ ಡ್ರಗ್ಸ್‌ ಮಾಫಿಯಾಗೆ ಖಾಸಗಿ ಕಂಪೆನಿ ಉದ್ಯೋಗಿಗಳು, ಪ್ರತಿಷ್ಠಿತ  ಕಾಲೇಜು ವಿದ್ಯಾರ್ಥಿಗಳು ಬಲಿಯಾಗುತ್ತಿದ್ದು, ವ್ಯಸನದಿಂದ ಹೊರಬರಲು ಪಡಿಪಾಟಲು ಬೀಳುತ್ತಾರೆ. ಆತಂಕದ ಸಂಗತಿಯೆಂದರೆ ವ್ಯಸನಮುಕ್ತವಾಗಲು ದಾಖಲಾಗುವವರಲ್ಲಿ ಹದಿಹರೆಯದವರೇ ಹೆಚ್ಚಿರುತ್ತಾರೆ. ಈ ಪ್ರಮಾಣ ತಿಂಗಳಿನಿಂದ ತಿಂಗಳಿಗೆ ಹೆಚ್ಚುತ್ತಿದೆ ಎಂದು ಮಾದಕವಸ್ತು ಸೇವನೆ ವ್ಯಸನ ಮುಕ್ತ ಖಾಸಗಿ ಕೇಂದ್ರ, “ಕದಂಬ’ದ ಅಧಿಕಾರಿಯೊಬ್ಬರು ಅಭಿಪ್ರಾಯಪಡುತ್ತಾರೆ.

ಮೂಲ ಪತ್ತೆ ಸವಾಲು ಏಕೆ?: ಎನ್‌ಡಿಪಿಎಸ್‌ ಕಾಯ್ದೆ ಅಡಿಯಲ್ಲಿ ನೂರಾರು ಮಂದಿಯನ್ನು ಬಂಧಿಸಿ ವಿಚಾರಣೆ ನಡೆಸಲಾಗುತ್ತದೆ. ಆದರೆ ಬಂಧಿತ ಆರೋಪಿಗಳ ಪೈಕಿ ಬಹುತೇಕರು ಮೂಲಜಾಲದ ಬಗ್ಗೆ ಬಾಯ್ಬಿಡುವುದಿಲ್ಲ. ಸಿಕ್ಕಿಬಿದ್ದಿರುವ ಆರೋಪಿಗಳಿಗೆ ಮಧ್ಯವರ್ತಿಗಳಿಂದ ಡ್ರಗ್ಸ್‌ ಸರಬರಾಜಾಗಿರುತ್ತದೆ. ಎಲ್ಲಿಂದ ಈ ಡ್ರಗ್ಸ್‌ ಬಂದಿದೆ ಎನ್ನುವುದೇ ಗೊತ್ತಿರುವುದಿಲ್ಲ. ಯಾರೊಬ್ಬರೂ ಖಚಿತ ಮಾಹಿತಿ ನೀಡುವುದಿಲ್ಲ. ಹೀಗಾಗಿಯೇ ಮೂಲ ಜಾಲ ಪತ್ತೆ ಸವಾಲಾಗಿರುತ್ತದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿ ತಿಳಿಸುತ್ತಾರೆ.

ಡ್ರಗ್ಸ್‌ ದಂಧೆಯ ಪ್ರಮುಖ ಆರೋಪಿಗಳು ಯಾರು?: ಕಳೆದ ಐದುವರ್ಷಗಳಲ್ಲಿ ಗಾಂಜಾ, ಚರಸ್‌, ಬ್ರೌನ್‌ಶುಗರ್‌, ಅಫೀಮು ಮಾರಾಟ, ಸೇವನೆ ಸಂಬಂಧ ದಾಖಲಾಗಿರುವ 576 ಪ್ರಕರಣಗಳ ಆರೋಪಿಗಳಲ್ಲಿ ಬಹುತೇಕರು ದಕ್ಷಿಣ ಆಫ್ರಿಕಾ, ನೈಜೀರಿಯಾ ಸೇರಿದಂತೆ ವಿವಿಧ ದೇಶ ಹಾಗೂ ಆಂಧ್ರಪ್ರದೇಶ, ತಮಿಳುನಾಡು ಮೂಲದವರೇ ಆಗಿದ್ದಾರೆ. ವಿದೇಶಿ ಆರೋಪಿಗಳು ಮಾದಕ ವಸ್ತುಗಳ ಸರಬರಾಜು ವೇಳೆ ಸಿಕ್ಕಿಬಿದ್ದರೆ, ನೆರೆರಾಜ್ಯ ಹಾಗೂ ಸ್ಥಳೀಯ ಆರೋಪಿಗಳು ಗಾಂಜಾ ಮಾರಾಟದ ವೇಳೆ ಸಿಕ್ಕಿಬಿದ್ದಿದ್ದಾರೆ.

ಮಾಫಿಯಾದ ಬಲಿಪಶುಗಳು!: ವಿಧ್ಯಾಭ್ಯಾಸದ ಕಾರಣ ನೀಡಿ ಪಾಸ್‌ಪೋರ್ಟ್‌ ಪಡೆದು ಸಿಲಿಕಾನ್‌ ಸಿಟಿಗೆ ಆಗಮಿಸುವ ವಿದೇಶಿ ವಿದ್ಯಾರ್ಥಿಗಳ ಪೈಕಿ ಕೆಲವರು ಡ್ರಗ್ಸ್‌ಗೆ ದಾಸರಾಗಿರುತ್ತಾರೆ. ಪರಿಚಯಸ್ಥ ಸ್ನೇಹಿತರು, ಸಂಬಂಧಿಕರಿಂದ ಕಳ್ಳ ಮಾರ್ಗಗಳ ಮೂಲಕ ನಗರಕ್ಕೆ ಮಾದಕ ದ್ರವ್ಯ ವಸ್ತುಗಳನ್ನು ತರಿಸಿಕೊಂಡು ತಾವು ಸೇವನೆ ಮಾಡಿ ಉಳಿದಿದ್ದನ್ನು ಮಾರಾಟ ಮಾಡಲು ಮುಂದಾಗುತ್ತಾರೆ. ಇದಕ್ಕೆ ನೇರವಾಗಿ ಅವರು ಟಾರ್ಗೆಟ್‌ ಮಾಡಿಕೊಳ್ಳುವುದು ಖಾಸಗಿ ಕಂಪೆನಿಗಳ ಉದ್ಯೋಗಿಗಳು ಹಾಗೂ ವಿದ್ಯಾರ್ಥಿಗಳನ್ನು. ಕೆಲವೊಮ್ಮೆ ವೀಕೆಂಡ್‌ನ‌ಲ್ಲಿ ಐಟಿ-ಬಿಟಿ ಕಂಪೆನಿಗಳ ಉದ್ಯೋಗಿಗಳು ನಡೆಸುವ ಪಾರ್ಟಿಗಳಿಗೂ ಡ್ರಗ್ಸ್‌ ತಲುಪಿರುತ್ತದೆ. ಆದರೆ ಇಂತಹ ಸಂಗತಿಗಳು ಬೆಳಕಿಗೆ ಬರುವುದೇ ಇಲ್ಲ.

ಗಾಂಜಾ ಸರಬರಾಜಿನ ಮೂಲ ಬೇರೆ: ದೇಸಿ ಡ್ರಗ್ಸ್‌ ಗಾಂಜಾ, ತಮಿಳುನಾಡು, ಆಂಧ್ರಪ್ರದೇಶ, ಪಶ್ಚಿಮ ಬಂಗಾಳ, ಬಿಹಾರ  ಸೇರಿ ಹಲವು ರಾಜ್ಯಗಳ ಮೂಲಕ ರಾಜ್ಯವನ್ನು ಪ್ರವೇಶಿಸುತ್ತದೆ. ಗಾಂಜಾದ 100, 200 ಗ್ರಾಂ.ಗಳ ಪ್ಯಾಕೆಟ್‌ ಮಾಡಿ ಸಾರ್ವಜನಿಕ ಪ್ರದೇಶಗಳಲ್ಲಿ, ಅಪರಾಧ ಚಟುವಟಿಕೆಗಳಲ್ಲಿ ಭಾಗಿಯಾದವರಿಗೆ, ಕೆಳ ವರ್ಗದ ಜನರಿಗೆ ಮಾರಾಟ ಮಾಡಲಾಗುತ್ತದೆ. ಆಘಾತಕಾರಿ ಸಂಗತಿ ಎಂದರೆ ಕೆಲ ಆರೋಪಿಗಳು ನಗರದ ನಿರ್ಮಾಣ ಹಂತದ ಕಟ್ಟಡಗಳಲ್ಲೇ ಗಾಂಜಾ ಬೆಳೆಸುತ್ತಾರೆ. ಕಳೆದ ವರ್ಷ ಯಶವಂತಪುರ ಪೊಲೀಸ್‌ ಠಾಣೆ ಸಮೀಪವೇ ನಿರ್ಮಿಸುತ್ತಿದ್ದ ಅಪಾರ್ಟ್‌ಮೆಂಟ್‌ವೊಂದರ ಶೆಡ್‌ ಸಮೀಪ ಪಶ್ಚಿಮ ಬಂಗಾಳ ಮೂಲದ ಕೂಲಿ ಕಾರ್ಮಿಕರು ಗಾಂಜಾ ಬೆಳೆಸಿರುವ ಸಂಗತಿ ಬೆಳಕಿಗೆ ಬಂದಿತ್ತು.

ಎನ್‌ಡಿಪಿಎಸ್‌ ಆ್ಯಕ್ಟ್ ಅಡಿಯಲ್ಲಿ ದಾಖಲಾದ  ಪ್ರಕರಣಗಳ ವಿವರ
-ವರ್ಷ    ಪ್ರಕರಣಗಳ ಸಂಖ್ಯೆ 
-2013    56 
-2014    42 
-2015    69 
-2016    128 
-2017 (ಸೆ.30)    281 

ಈ ವರ್ಷ ಜಪ್ತಿ ಮಾಡಿದ ಮಾದಕ ವಸ್ತುಗಳ ವಿವರ
-ಗಾಂಜಾ    287 ಕೆ.ಜಿ
-ಹಗ್ಗೀಸ್‌    6.ಕೆಜಿ 
-ಚರಸ್‌    3.ಕೆ.ಜಿ 
-ಬ್ರೌನ್‌ಶುಗರ್‌    500 ಗ್ರಾಂ.
-ಕೊಕೇನ್‌    250 ಗ್ರಾಂ.

ನಗರದಲ್ಲಿ ಡ್ರಗ್ಸ್‌ ಮಾಫಿಯಾಗೆ ಕಡಿವಾಣ ಹಾಕಲು ಪೊಲೀಸ್‌ ಇಲಾಖೆ ಹಗಲಿರುಳು ಶ್ರಮಿಸುತ್ತಿದೆ. ಮತ್ತಷ್ಟು ಪರಿಣಾಮಕಾರಿಯಾಗಿ ಡ್ರಗ್ಸ್‌ ಮಾಫಿಯಾ ನಿಯಂತ್ರಿಸಲು ಎಲ್ಲ ಡಿಸಿಪಿಗಳಿಗೂ ಸೂಚನೆ ನೀಡಲಾಗಿದೆ. ಈ ಪ್ರಕರಣಗಳಲ್ಲಿ ಬಂಧಿತರಾಗಿರುವ ಹಳೇ ಆರೋಪಿಗಳ  ಚಲನವಲನಗಳ ಬಗ್ಗೆ ನಿಗಾ ವಹಿಸುವಂತೆ ಸೂಚಿಸಲಾಗಿದೆ. 
-ಟಿ. ಸುನೀಲ್‌ಕುಮಾರ್‌, ನಗರ ಪೊಲೀಸ್‌ ಆಯುಕ್ತ

* ಮಂಜುನಾಥ ಲಘುಮೇನಹಳ್ಳಿ