ಉದಯವಾಣಿ ದೀಪಾವಳಿ ವಿಶೇಷಾಂಕ ಬಿಡುಗಡೆ

Team Udayavani, Oct 17, 2017, 9:56 AM IST

ಕಲಬುರಗಿ: “ಉದಯವಾಣಿ’ ದಿನಪತ್ರಿಕೆಯ ದೀಪಾವಳಿ ವಿಶೇಷಾಂಕವನ್ನು ಸೋಮವಾರ ಮಹಾದಾಸೋಹಿ ಸಂಸ್ಥಾನದ ಪೀಠಾಧಿಪತಿಗಳು ಹಾಗೂ ಶರಣಬಸವ ವಿಶ್ವವಿದ್ಯಾಲಯದ ಕುಲಾಧಿಪತಿಗಳಾದ ಡಾ| ಶರಣಬಸವಪ್ಪ ಅಪ್ಪ ಅವರು ಮಹಾಸಂಸ್ಥಾನದಲ್ಲಿ ಬಿಡುಗಡೆ ಮಾಡಿದರು.

ಏಳು ವರ್ಷಗಳ ಹಿಂದೆ ಉದಯವಾಣಿ ಕಲಬುರಗಿ ಆವೃತ್ತಿಗೆ ತಾವೇ ಚಾಲನೆ ನೀಡಿದ್ದನ್ನು ನೆನಪಿಸಿದ ಅವರು, ಕರಾವಳಿ ಭಾಗದ ನಂ.1 ಪತ್ರಿಕೆಯಾಗಿರುವ “ಉದಯವಾಣಿ’ ಕಲ್ಯಾಣ ಕರ್ನಾಟಕದ ಈ ಭಾಗದಲ್ಲೂ ಮನೆ ಮಾತಾಗಿರುವುದು ಪತ್ರಿಕೆಯ ಸಾಮಾಜಿಕ ಕಾಳಜಿಗೆ ಸಾಕ್ಷಿ. ಕಲ್ಯಾಣ ಕರ್ನಾಟಕದ ಅಭಿವೃದ್ಧಿಗೆ ತನ್ನದೇ ಆದ ಕೊಡುಗೆ ನೀಡುತ್ತಿದೆ ಎಂದು ಶ್ಲಾಘಿಸಿದರು.

ಸಾಹಿತ್ಯ ಲೋಕದಲ್ಲಿ ತನ್ನದೇ ಛಾಪು ಮೂಡಿಸಿರುವ ಉದಯವಾಣಿ ಬಳಗದ ದೀಪಾವಳಿ ವಿಶೇಷಾಂಕ, ನಾಡಿನ ದಿಗ್ಗಜರ ಕಥೆ-ಕವನಗಳು, ಪ್ರಬಂಧಗಳನ್ನು ಒಳಗೊಂಡು ಮಾದರಿಯಾಗಿದೆ. ವಿಶೇಷಾಂಕದ ಎಲ್ಲ ಲೇಖನಗಳು ಸಂಗ್ರಹ ಯೋಗ್ಯವಾಗಿವೆ ಎಂದು ಡಾ|ಅಪ್ಪ ತಿಳಿಸಿದರು.

ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಕಾರ್ಯದರ್ಶಿ ಬಸವರಾಜ ದೇಶಮುಖ, ಶರಣಬಸವ ವಿಶ್ವವಿದ್ಯಾಲಯದ ಕುಲಪತಿ ಡಾ| ನಿರಂಜನ ನಿಷ್ಠಿ, ಸಹಕುಲಪತಿ ಡಾ| ವಿ.ಡಿ.ಮೈತ್ರಿ, ಕುಲಸಚಿವ ಡಾ|ಅನೀಲಕುಮಾರ ಬಿಡವೆ, ನಂದಿನಿ ಡಾ| ನಿರಂಜನ ನಿಷ್ಠಿ, ಉದಯವಾಣಿ ಕಲಬುರಗಿ ಆವೃತ್ತಿ ಹಿರಿಯ ವರದಿಗಾರ ಹಣಮಂತರಾವ ಭೈರಾಮಡಗಿ, ಜಾಹೀರಾತು ಸಹಾಯಕ ವ್ಯವಸ್ಥಾಪಕ ನಾಗಶೆಟ್ಟಿ ಡಾಕುಳಗಿ, ಪ್ರಸರಣ ಪ್ರತಿನಿಧಿ ರೇವಣಸಿದ್ದ ಜವಳಿ ಸೇರಿದಂತೆ ಇತರರು ಹಾಜರಿದ್ದರು.