ಡಾರ್ಜಿಲಿಂಗ್‌: ಕೇಂದ್ರ ಪಡೆಗಳ ಹಿಂದೆಗೆತಕ್ಕೆ ಹೈಕೋರ್ಟ್‌ ತಡೆ

Team Udayavani, Oct 17, 2017, 4:27 PM IST

ಕೋಲ್ಕತ : ಡಾರ್ಜಿಲಿಂಗ್‌ ನಿಂದ ಕೇಂದ್ರ ಪಡೆಗಳನ್ನು ತೆರವು ಗೊಳಿಸುವುದಕ್ಕೆ ಕೋಲ್ಕತ ಹೈಕೋರ್ಟ್‌ ಇಂದು ಮಂಗಳವಾರ ತಡೆಯಾಜ್ಞೆ ನೀಡಿದೆ.

ಪ್ರಕ್ಷುಬ್ಧ ಡಾರ್ಜಿಲಿಂಗ್‌ನಿಂದ ಕೇಂದ್ರ ಪಡೆಗಳನ್ನು ಹಿಂದೆಗೆದುಕೊಳ್ಳುವ ನಿರ್ಧಾರವು ರಾಜಕೀಯವಾಗಿ ಮತ್ತು ಆಡಳಿತಾತ್ಮಕವಾಗಿ ಕೆಟ್ಟ ನಿರ್ಧಾರವಾಗಿದೆ ಎಂದು ಪಶ್ಚಿಮ ಬಂಗಾಲದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹಸಚಿವ ರಾಜನಾಥ್‌ ಸಿಂಗ್‌ ಅವರಿಗೆ ಪತ್ರ ಬರೆದಿದ್ದರು. 

ಅಂತೆಯೇ ಪಶ್ಚಿಮ ಬಂಗಾಲ ರಾಜ್ಯ ಹೈಕೋರ್ಟ್‌ ಮೆಟ್ಟಲೇರಿ ಡಾರ್ಜಿಲಿಂಗ್‌ನಿಂದ ಕೇಂದ್ರ ಪಡೆಗಳನ್ನು ಹಿಂಪಡೆಯುವುದರ ವಿರುದ್ಧ ತಡೆಯಾಜ್ಞೆ ನೀಡಬೇಕೆಂದು ಕೋರಿತ್ತು. 

ದೀಪಾವಳಿ ಹಬ್ಬದ ವೇಳೆ ಇತರೆಡೆಗಳಲ್ಲಿ ಕೇಂದ್ರ ಪಡೆಗಳನ್ನು ಬಳಸುವ ಸಲುವಾಗಿ ಡಾರ್ಜಿಲಿಂಗ್‌ನಲ್ಲಿ ಈ ಹಿಂದೆ ನಿಯೋಜಿಸಲಾಗಿದ್ದ 15 ಕೇಂದ್ರೀಯ ಸಶಸ್ತ್ರ ಪೊಲೀಸ್‌ ತುಕಡಿಗಳ ಪೈಕಿ ಹತ್ತನ್ನು ಹಿಂದೆಗೆದುಕೊಳ್ಳಲು ಕೇಂದ್ರ ಗೃಹ ಸಚಿವಾಲಯ ಆದೇಶಿಸಿರುವುದಾಗಿ ಭಾನುವಾರ ವರದಿಯಾಗಿತ್ತು.