ಬಿಬಿಎಂಪಿಯಲ್ಲಿ ಬ್ರಹ್ಮಾಂಡ ಭ್ರಷ್ಟಾಚಾರ

Team Udayavani, Oct 19, 2017, 1:02 PM IST

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯಲ್ಲಿ ಕಾಮಗಾರಿ ಹೆಸರಿನಲ್ಲಿ ಕೋಟ್ಯಂತರ ರೂ. ಲೂಟಿ ಮಾಡುತ್ತಿರುವುದು ಗೊತ್ತಿದ್ದರೂ ಮುಖ್ಯಮಂತ್ರಿ ಸಿದ್ದರಾಮಯ್ಯ ನಮ್ಮದು ಭ್ರಷ್ಟಾಚಾರ ರಹಿತ ಪಾರದರ್ಶಕ ಆಡಳಿತ ಎಂದು ಶುದ್ಧ ಸುಳ್ಳು ಹೇಳಿಕೊಂಡು ತಿರುಗಾಡುತ್ತಿದ್ದಾರೆ ಎಂದು ಜೆಡಿಎಸ್‌ ರಾಜ್ಯಾಧ್ಯಕ್ಷ ಎಚ್‌.ಡಿ.ಕುಮಾರಸ್ವಾಮಿ ಲೇವಡಿ ಮಾಡಿದ್ದಾರೆ. 

ಜೆಪಿ ನಗರ ನಿವಾಸದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕಪ್ಪುಪಟ್ಟಿಗೆ ಸೇರಿಸಿರುವ ಆಂಧ್ರಪ್ರದೇಶದ ಗುತ್ತಿಗೆದಾರರು ಕಿಕ್‌ಬ್ಯಾಕ್‌ ನೀಡಿ ರಾಜಾರೋಷವಾಗಿ ಗುತ್ತಿಗೆ ಪಡೆದು ಲೂಟಿಯಲ್ಲಿ ನಿರತರಾಗಿದ್ದಾರೆ. ಹಣ ಮಾಡೋರಿಗೆ ಬಿಬಿಎಂಪಿ ಸಮೃದ್ಧ ಹುಲ್ಲುಗಾವಲು ಆಗಿದೆ ಎಂದು ದೂರಿದರು.

ಟೆಂಡರ್‌ ಶ್ಯೂರ್‌ ಹೆಸರಿನಲ್ಲಿ ರಸ್ತೆ ಅಭಿವೃದ್ಧಿಗೆ ಎರಡು ಪ್ಯಾಕೇಜ್‌ ಮಾಡಲಾಗಿದೆ. ಕೋಟ್ಯಂತರ ರೂ. ಮೊದಲ ಪ್ಯಾಕೇಜ್‌ನಲ್ಲಿ 8.5 ಕಿ.ಮೀ. ರಸ್ತೆ ಅಭಿವೃದ್ಧಿಗೆ ಪ್ರಾರಂಭದಲ್ಲಿ 66 ಕೋಟಿ ರೂ. ಅಂದಾಜು ವೆಚ್ಚ ಸಿದ್ಧಪಡಿಸಿ ಅಂತಿಮವಾಗಿ 102 ಕೋಟಿ ರೂ. ನೀಡಲಾಗಿದೆ. ಎರಡನೇ ಪ್ಯಾಕೇಜ್‌ಗೆ 7.5 ಕಿ.ಮೀ. ರೆ¤ ಅಬಿವೃದ್ಧಿಗೆ 56 ಕೋಟಿ ರೂ. ಅಂದಾಜು ವೆಚ್ಚ ಸಿದ್ಧಪಡಿಸಿ ಅಂತಿಮವಾಗಿ 86 ಕೋಟಿ ರೂ. ನೀಡಲಾಗಿದೆ.

ಶೇ.70 ರಷ್ಟು ಹೆಚ್ಚುವರಿ ವೆಚ್ಚ ಕೊಡಲಾಗಿದೆ. ಒಂದು ಕಿ.ಮೀ.ಗೆ 15 ಕೋಟಿ ರೂ. ಮಾಡಲಾಗಿದೆ. ಆದರೆ, ಟೆಂಡರ್‌ ಶ್ಯೂರ್‌ ನಿಯಮಾವಳಿ ಎಲ್ಲೂ ಪಾಲನೆಯಾಗಿಲ್ಲ. ಗುತ್ತಿಗೆದಾರರಿಂದ ಕಮೀಷನ್‌ ಪಡೆದು ವೆಚ್ಚ ಹೆಚ್ಚಿಸಲಾಗಿದೆ. ಇದರಲ್ಲಿ ಭ್ರಷ್ಟಾಚಾರ ನಡೆದಿಲ್ಲವಾ ಎಂದು ಸಿದ್ದರಾಮಯ್ಯ ಹೇಳಲಿ ನೋಡೋಣ ಎಂದು ಸವಾಲು ಹಾಕಿದರು.

ಇದೇ ರೀತಿ ರಾಜಕಾಲುವೆ ಹೂಳೆತ್ತಲು  ಹಾಗೂ ರಸ್ತೆ ಅಭಿವೃದ್ಧಿ 3750 ಕೋಟಿ ರೂ. ವೆಚ್ಚ ಮಾಡಿದ್ದಾರೆ. ಒಂದು ಕಡೆಯಿಂದ ಕಾಮಗಾರಿ ಆರಂಭಿಸದೆ ಬೇಕಾದ ಕಡೆ ಕಾಮಗಾರಿ ಮಾಡಲಾಗಿದೆ. ಹೂಳು ತೆಗೆಯಲು ಶೇ.60 ರಷ್ಟು ದರ ಹೆಚ್ಚಿಸಲಾಗಿದೆ. ಇದು ಯಾವ ದೇಶದಲ್ಲಿಯೂ ನಡೆಯಲ್ಲ.

ತಾಜ್ಯ ವಿಲೇವಾರಿ ವಿಚಾರಕ್ಕೆ ಬಂದರೆ ಹಣ ಕೊಟ್ಟು ತ್ಯಾಜ್ಯ ಪಡೆದುಕೊಂಡು ಹೋಗುವವರು ಇದ್ದರೂ ಪ್ರತಿ ವಾರ್ಡ್‌ನಲ್ಲಿ 25 ರಿಂದ 30 ಕೋಟಿ ರೂ. ನಂತೆ 700 ರಿಂದ 800 ಕೋಟಿ ರೂ. ವಾರ್ಷಿಕವಾಗಿ ವೆಚ್ಚ ಮಾಡಲಾಗುತ್ತಿದೆ. ಇದೆಲ್ಲವೂ ಗುತ್ತಿಗೆದಾರರ ಜೇಬು ಸೇರುತ್ತಿದೆ ಎಂದು ದೂರಿದರು.

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು  ಎರಡು ವರ್ಷಗಳಲ್ಲಿ ಕಸದ ಸಮಸ್ಯೆ ನಿವಾರಿಸುವುದಾಗಿ ಹೇಳಿದ್ದರು. ಅದು ಸಾಧ್ಯವಾಯಿತಾ ಎಂದು ಪ್ರಶ್ನಿಸಿದರು. ಮಳೆಯಿಂದ ಉಂಟಾಗಿರುವ ಅನಾಹುತಕ್ಕೆ ಎರಡೂ ರಾಷ್ಟ್ರೀಯ ಪಕ್ಷಗಳು ಕಾರಣ. ಹತ್ತು ವರ್ಷದಲ್ಲಿ ಬೆಂಗಳೂರು ಅಭಿವೃದ್ಧಿಗೆ 22 ಸಾವಿರ ಕೋಟಿ ರೂ.ವೆಚ್ಚ ಮಾಡಲಾಗಿದೆ.

ಅಭಿವೃದ್ಧಿ ಏನು ಎಂಬುದು ಇತ್ತೀಚೆಗೆ ಸುರಿದ ಮಳೆಯಿಂದ ಅನಾಹುತವೇ ಸಾಕ್ಷಿ. ನಾಚಿಕೆಯಾಗಬೇಕು ಇವರಿಗೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ನಮ್ಮ ಪಕ್ಷ ಪಾಲಿಕೆಯಲ್ಲಿ ಕಾಂಗ್ರೆಸ್‌ ಜತೆ ಅಧಿಕಾರ ಹಂಚಿಕೆ ಮಾಡಿಕೊಂಡಿದ್ದರೂ ನಮಗೆ ಯಾವುದೇ ಅಧಿಕಾರ ಇಲ್ಲ. ಸ್ಥಾಯಿ ಸಮಿತಿ ಅಧ್ಯಕ್ಷರ ಬಳಿ ಯಾವ ಫೈಲೂ ಬರುವುದಿಲ್ಲ ಎಂದು ಹೇಳಿದರು.

ಪಾಲಿಕೆಯಲ್ಲಿ ಜೆಡಿಎಸ್‌ ತಟಸ್ಥವಾಗಿದ್ದರೂ ಕಷ್ಟ, ಕಾಂಗ್ರೆಸ್‌ ಜತೆ ಕೈ ಜೋಡಿಸಿದರೂ ಕಷ್ಟ. ತಟಸ್ಥವಾಗಿದ್ರೆ ಬಿಜೆಪಿಗೆ ಅನುಕೂಲ ಮಾಡಿಕೊಡಲು ಸೈಲೆಂಟ್‌ ಆದರು ಎಂಬ ಆರೋಪ ಕಾಂಗ್ರೆಸ್‌ನವರು ಮಾಡುತ್ತಾರೆ. ಕೋಮುವಾದಿ ಪಕ್ಷದ ಜತೆ ಹೋದರು ಎಂದು ದೂರುತ್ತಾರೆ. ಅತ್ತ ದರಿ, ಇತ್ತ ಪುಲಿ ನಮ್ಮ ಸ್ಥಿತಿಯಾಗಿದೆ ಎಂದರು.  ಮಾಜಿ ಸಚಿವ ಎಚ್‌.ವಿಶ್ವನಾಥ್‌, ವಿಧಾನಪರಿಷತ್‌ ಸದಸ್ಯ ಟಿ.ಎ.ಶರವಣ ಉಪಸ್ಥಿತರಿದ್ದರು.

ಬಿಬಿಎಂಪಿ ಲೂಟಿ ಬಗ್ಗೆ ತನಿಖೆ 
ರಾಜ್ಯದಲ್ಲಿ ಜೆಡಿಎಸ್‌ ಅಧಿಕಾರಕ್ಕೆ ಬಂದರೆ ಬಿಬಿಎಂಪಿಯಲ್ಲಿ ಹತ್ತು ವರ್ಷಗಳಲ್ಲಿ ನಡೆದಿರುವ ಭ್ರಷ್ಟಾಚಾರದ ಬಗ್ಗೆ ಸಮಗ್ರ ತನಿಖೆ ನಡೆಸಿ ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆ ನೀಡಲಾಗುವುದು. ಜನರ ಹಣ ಲೂಟಿ ಮಾಡಿರುವವರನ್ನು ಜೈಲಿಗೆ ಕಳುಹಿಸಲಾಗುವುದು. ಭ್ರಷ್ಟಾಚಾರ ನಡೆಸಲು ನಾಲ್ಕು ಬಾರಿ ಯೋಚಿಸಬೇಕು ಆ ರೀತಿಯ ಶಿಕ್ಷೆ ನೀಡಲಾಗುವುದು. ಜನತೆ ಎರಡೂ ಪಕ್ಷಗಳನ್ನು ನೋಡಿದ್ದಾರೆ. ಒಮ್ಮೆ ಜೆಡಿಎಸ್‌ಗೆ ಆರ್ಶೀವಾದ ನೀಡಲಿ ಎಂದು ಕುಮಾರಸ್ವಾಮಿ ಹೇಳಿದರು.

ಬಿಜೆಪಿಯವರಿಗೆ ನೈತಿಕತೆಯಿಲ್ಲ 
ಬಿಜೆಪಿಯವರು ರಸ್ತೆ ಗುಂಡಿ ವಿರುದ್ಧ ಪ್ರತಿಭಟನೆ ಮಾಡುತ್ತಾರೆ. ಪಾಲಿಕೆಯಲ್ಲಿ ಸುಳ್ಳು ಬಿಲ್‌ ಸೃಷ್ಟಿಸಿ ಕಡತ ಸುಟ್ಟವರು ಬಿಜೆಪಿಯವರು. ಯಡಿಯೂರಪ್ಪ, ಜಗದೀಶ್‌ ಶೆಟ್ಟರ್‌, ಅಶೋಕ್‌ ಅವರಿಗೆ ಯಾವ ನೈತಿಕತೆಯಿದೆ. 700 ಕೋಟಿ ರೂ. ಮೊತ್ತದ ಕಾಮಗಾರಿಯನ್ನೇ ಮಾಡದೆ ಡಬಲ್‌ ಬಿಲ್‌ ಕೊಟ್ಟಿದ್ದು ಯಾರು? ಅದರ ದಾಖಲೆ ಇಟ್ಟಿದ್ದಾರಾ ?. ಬಿಬಿಎಂಪಿಯಲ್ಲಿ ಲೂಟಿ ಪ್ರಾರಂಭಿಸಿದ್ದೇ ಬಿಜೆಪಿಯವರು. ಇದೀಗ ಅದನ್ನೇ ಕಾಂಗ್ರೆಸ್‌ನವರು ಅನುಸರಿಸುತ್ತಿದ್ದಾರೆ. ನಗರದಲ್ಲಿ 28 ಕ್ಷೇತ್ರ ಗೆಲ್ಲುವ ಹೊಣೆಗಾರಿಕೆ ವಹಿಸಿಕೊಂಡಿರುವ ಅಶೋಕ್‌ ಅವರು ಎದೆಮುಟ್ಟಿಕೊಂಡು ಹೇಳಲಿ, ಇವರ ಆಡಳಿತದಲ್ಲಿ ಪಾಲಿಕೆಯಲ್ಲಿ ಭ್ರಷ್ಟಾಚಾರ ನಡೆದಿಲ್ಲವಾ?
-ಎಚ್‌.ಡಿ.ಕುಮಾರಸ್ವಾಮಿ, ಮಾಜಿ ಮುಖ್ಯಮಂತ್ರಿ