ಭಾರತದಲ್ಲಿ ಹಸಿವು, ದುರಂತಕ್ಕಿಂತ ಮಾಲಿನ್ಯಕ್ಕೆ ವಾರ್ಷಿಕ 25 ಲಕ್ಷ ಬಲಿ

Team Udayavani, Oct 20, 2017, 4:15 PM IST

ನವದೆಹಲಿ: ಇಡೀ ವಿಶ್ವದಲ್ಲಿ ಯುದ್ಧ, ಹಸಿವು, ಪ್ರಕೃತಿ ವಿಕೋಪ, ಏಡ್ಸ, ಮಲೇರಿಯಾಕ್ಕಿಂತ ಹೆಚ್ಚಾಗಿ ಪರಿಸರ ಮಾಲಿನ್ಯದಿಂದಲೇ ಸಾವನ್ನಪ್ಪುವವರ ಸಂಖ್ಯೆ ಅಧಿಕವಾಗಿದೆ ಎಂಬ ಆಘಾತಕಾರಿ ಅಂಶ ಹೊರಬಿದ್ದಿದೆ.

ಇತ್ತೀಚೆಗಷ್ಟೇ ಬಿಡುಗಡೆಯಾಗಿರುವ ದ ಲ್ಯಾನ್ಸೆಟ್ ಮೆಡಿಕಲ್ ಜರ್ನಲ್ ನ ನೂತನ ಅಂಕಿ ಅಂಶದ ಪ್ರಕಾರ, ಮಾಲಿನ್ಯದಿಂದಲೇ ಸಾವನ್ನಪ್ಪುವವರ ಪಟ್ಟಿಯಲ್ಲಿ ಭಾರತ ಅಗ್ರಸ್ಥಾನ ಪಡೆದಿದೆ. ಭಾರತದಲ್ಲಿ ವಾರ್ಷಿಕವಾಗಿ ವಾಯು ಮಾಲಿನ್ಯದಿಂದ 25 ಲಕ್ಷ ಮಂದಿ ಸಾವಿಗೀಡಾಗುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.

ಕಲುಷಿತ ನೀರು, ಮಾಲಿನ್ಯಯುಕ್ತ ಗಾಳಿಯಿಂದಾಗಿ ಹಲವಾರು ಮಂದಿ ಮೃತಪಟ್ಟಿದ್ದಾರೆ. 2015ರಲ್ಲಿ ಜಾಗತಿಕವಾಗಿ ಪರಿಸರ ಮಾಲಿನ್ಯದಿಂದ ಸಾವನ್ನಪ್ಪಿರುವ 9 ಲಕ್ಷ ಜನರು ಸಾವನ್ನಪ್ಪಿದ್ದರು. ಅದೇ ರೀತಿ ವಾಯು ಮಾಲಿನ್ಯಕ್ಕೆ 1.81 ಮಿಲಿಯನ್ ಹಾಗೂ ಕಲುಷಿತ ನೀರಿನಿಂದಾಗಿ 0.64ರಷ್ಟು ಜನರು ಸಾವಿಗೀಡಾಗುತ್ತಿರುವುದಾಗಿ ಅಧ್ಯಯನ ವರದಿ ಹೇಳಿದೆ.

ಶೇ.92ರಷ್ಟು ಮಾಲಿನ್ಯ ಕಾರಣಗಳಿಂದ ಸಾವನ್ನಪ್ಪಿರುವುದು ಕಡಿಮೆ ಮತ್ತು ಮಧ್ಯಮ ಆದಾಯ ಹೊಂದಿರುವ ದೇಶಗಳಲ್ಲಿಯೇ ಹೆಚ್ಚಾಗಿ ಕಂಡುಬಂದಿದೆ. ಕೈಗಾರಿಕೆಗಳನ್ನು ಹೆಚ್ಚಾಗಿ ಹೊಂದಿರುವ ಭಾರತ, ಚೀನಾ ಹಾಗೂ ಕಡಿಮೆ ಆದಾಯದ ಪಾಕಿಸ್ತಾನ, ಬಾಂಗ್ಲಾದೇಶ, ಮಡ್ಗಾಸ್ಕರ್ ಮತ್ತು ಕೀನ್ಯಾ ಪಟ್ಟಿಯಲ್ಲಿ ಸೇರಿರುವುದಾಗಿ ವರದಿ ಹೇಳಿದೆ.