ಮೆಟ್ರೋ ಹೆಚ್ಚುವರಿ ಸೇವೆ

Team Udayavani, Oct 24, 2017, 12:17 PM IST

ಬೆಂಗಳೂರು: ದೀಪಾವಳಿ ಹಾಗೂ ವಾರಾಂತ್ಯದ ರಜೆ ಮುಗಿಸಿಕೊಂಡು ಸೋಮವಾರ ಬೆಳಗ್ಗೆ ನಗರಕ್ಕೆ ಹಿಂತಿರುಗಿದ ಜನರ ಅನುಕೂಲಕ್ಕಾಗಿ “ನಮ್ಮ ಮೆಟ್ರೋ’ ಹೆಚ್ಚುವರಿ ಸೇವೆ ಕಲ್ಪಿಸಿತ್ತು. ಬೆಳಗ್ಗೆ 7ರಿಂದ 11ರವರೆಗೆ ಯಶವಂತಪುರದಿಂದ ಜಯನಗರ ಹಾಗೂ ಮೆಜೆಸ್ಟಿಕ್‌ನ ಕೆಂಪೇಗೌಡ ನಿಲ್ದಾಣದಿಂದ ಬೈಯಪ್ಪನಹಳ್ಳಿಗೆ ತಲಾ 12 ಟ್ರಿಪ್‌ ಹೆಚ್ಚುವರಿ ಮೆಟ್ರೋ ಸೇವೆ ಕಲ್ಪಿಸಲಾಗಿತ್ತು.

ಇದರಿಂದ ನಗರದ ಹೊರವಲಯದಿಂದ ಹೃದಯಭಾಗಕ್ಕೆ ತೆರಳಲು ಅನುಕೂಲವಾಯಿತು. ಹಬ್ಬದ ಜತೆಗೆ ಸಾಲು-ಸಾಲು ರಜೆ ಇದ್ದುದರಿಂದ ಲಕ್ಷಾಂತರ ಜನ ತಮ್ಮ ಊರುಗಳಿಗೆ ತೆರಳಿದ್ದರು. ಅವರೆಲ್ಲಾ ಬೆಳಿಗ್ಗೆ ಒಮ್ಮೆಲೆ ನಗರ ಪ್ರವೇಶಿಸಿದ್ದರಿಂದ ತುಮಕೂರು ರಸ್ತೆ, ಮೆಜೆಸ್ಟಿಕ್‌ ಸೇರಿದಂತೆ ಪ್ರಮುಖ ರಸ್ತೆಗಳಲ್ಲಿ ಅತ್ಯಧಿಕ ಜನದಟ್ಟಣೆ ಉಂಟಾಗಿತ್ತು.

ಈ ಮಧ್ಯೆ “ಶಾರ್ಟ್‌ ಲೂಪ್‌’ ಮೆಟ್ರೋ ಸೇವೆ ಕಲ್ಪಿಸಿದ್ದರಿಂದ ಜನರಿಗೆ ಅನುಕೂಲವಾಯಿತು. ಈ “ಶಾರ್ಟ್‌ ಲೂಪ್‌’ ಸೇವೆಗಳಲ್ಲಿ ಸುಮಾರು 8ರಿಂದ 10 ಸಾವಿರ ಜನ ಪ್ರಯಾಣಿಸಿದ್ದಾರೆ ಎಂದು ಬಿಎಂಆರ್‌ಸಿಎಲ್‌ ಮೂಲಗಳು ತಿಳಿಸಿವೆ.