ಇ-ಮಾರ್ಕೆಟ್‌ ಯೋಜನೆ ಜನರಿಗೆ ತಿಳಿಸಿ: ನಳಿನ್‌

Team Udayavani, Oct 27, 2017, 12:15 PM IST

ಪಾಂಡೇಶ್ವರ: ಅಂಚೆ ಇಲಾಖೆಯಲ್ಲಿ ಇ-ಮಾರುಕಟ್ಟೆ ಯೋಜನೆಯನ್ನು ಸಮರ್ಪಕವಾಗಿ ಜಾರಿಗೊಳಿಸಿ ಅದನ್ನು ಜನತೆಗೆ ಪರಿಚಯಿಸಲು ಮಾಹಿತಿ ಕಾರ್ಯಕ್ರಮ ಹಮ್ಮಿಕೊಳ್ಳುವಂತೆ ಸಂಸದ ನಳಿನ್‌ ಕುಮಾರ್‌ ಕಟೀಲು ಅವರು ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಅವರು ಮಂಗಳವಾರ ಇಲ್ಲಿನ ಪ್ರಧಾನ ಅಂಚೆ ಕಚೇರಿಯಲ್ಲಿ ಮಂಗಳೂರು ವಿಭಾಗ ವ್ಯಾಪ್ತಿಯ ಅಂಚೆ ಇಲಾಖೆಯ ಪ್ರಗತಿ ಪರಿಶೀಲನೆ ನಡೆಸಿದರು. ಅಂಚೆ ಇಲಾಖೆಗೆ ನಾಗರಿಕರನ್ನು ಮತ್ತಷ್ಟು ಸೆಳೆಯುವ ಸಲುವಾಗಿ ಇ-ಮಾರುಕಟ್ಟೆ ಯೋಜನೆಯನ್ನು ಜಾರಿಗೊಳಿಸುವಂತೆ ಕೇಂದ್ರ ಸರಕಾರ ಸೂಚಿಸಿದೆ. ಆದರೆ ಅಂಚೆ ಇಲಾಖೆಯ ಅ ಧಿಕಾರಿಗಳು ಇದರಲ್ಲಿ ಯಾವುದೇ ಪ್ರಗತಿಯನ್ನು ತೋರಿಸಿಲ್ಲ. ಬೆಂಗಳೂರಿನಲ್ಲಿ ಇ-ಮಾರುಕಟ್ಟೆ ಯೋಜನೆ ಜಾರಿಯಾಗಿದ್ದರೂ ಜಿಲ್ಲೆಯಲ್ಲಿ ಇನ್ನೂ ಅನುಷ್ಠಾನಗೊಳ್ಳದಿರುವ ಬಗ್ಗೆ ಅವರು ಬೇಸರ ವ್ಯಕ್ತಪಡಿಸಿದರು.

ಕೈಗಾರಿಕೆ ಜತೆಗೆ ಮಾತುಕತೆ ಒಳಿತು
ಕರಾವಳಿಯಲ್ಲಿ ಸಾಕಷ್ಟು ಸಣ್ಣ ಉದ್ದಿಮೆಗಳಿವೆ. ಬೈಕಂಪಾಡಿ, ಯೆಯ್ನಾಡಿ ಪ್ರದೇಶಗಳಿಗೆ ಭೇಟಿ ನೀಡಿ ಕೈಗಾರಿಕೆಗಳ ಜತೆಗೆ
ಮಾತುಕತೆ ನಡೆಸಿದರೆ, ಇ-ಮಾರುಕಟ್ಟೆ ಯೋಜನೆಯನ್ನು ಯಶಸ್ವಿಯಾಗಿ ಜಾರಿಗೊಳಿಸಬಹುದು. ಈ ನಿಟ್ಟಿನಲ್ಲಿ ಜನತೆಗೂ ಸೌಲಭ್ಯದ ಬಗ್ಗೆ ಮಾಹಿತಿ ನೀಡುವ ಅಗತ್ಯವಿದೆ. ಆದ್ದರಿಂದ ಅಂಚೆ ಇಲಾಖೆಯಿಂದ ಮಾಹಿತಿ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳುವಂತೆ ಅವರು ಸಲಹೆ ಮಾಡಿದರು.

ಅಧಿಕಾರಿಗಳ ಸಭೆ ನಡೆಸಿ
ಸುಕನ್ಯಾ ಸಮೃದ್ಧಿ ಹಾಗೂ ಪ್ರಧಾನ ಮಂತ್ರಿ ವಿಮಾ ಯೋಜನೆಗೆ ಆದಷ್ಟು ಹೆಚ್ಚಿನ ಜನರನ್ನು ಸೇರಿಸಬೇಕು. ಗ್ರಾಮೀಣ ಭಾಗಗಳ ಪ್ರತಿ ಬೂತ್‌ ಮಟ್ಟದಲ್ಲಿ ಅಂಚೆ ಕಚೇರಿಗಳು ಇರುತ್ತವೆ. ಅಲ್ಲದೆ ಪೋಸ್ಟ್‌ ಮ್ಯಾನ್‌ಗಳಿಗೆ ಪ್ರತಿಯೊಂದು ಮನೆಯ ಪರಿಚಯ ಇರುತ್ತದೆ. ಹಾಗಿರುವಾಗ ಈ ಯೋಜನೆಗಳು ಹೆಚ್ಚಿನ ಮನೆಗಳನ್ನು ಒಳಗೊಳ್ಳುವಂತೆ ಸುಲಭದಲ್ಲಿ ಮಾಡಿಸಲು ಸಾಧ್ಯವಿದೆ. ಈ ನಿಟ್ಟಿನಲ್ಲಿ ಪೋಸ್ಟ್‌ ಮ್ಯಾನ್‌ ಹಾಗೂ ಅಂಚೆ ಕಚೇರಿಗಳ ಅ ಧಿಕಾರಿ ಗಳಿಗೆ ಸಭೆ ನಡೆಸಿ ಗುರಿ ನಿಗದಿಪಡಿಸಲು ಸಂಸದರು ಸೂಚಿಸಿದರು.

ಗ್ರಾಮೀಣ ಪ್ರದೇಶಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ನಿರಖು ಠೇವಣಿ ಹೊಂದುವಂತೆ ಮಾಡಬೇಕು. ಅಂಚೆ ಕಚೇರಿಯ ಪಿನ್‌ ಕೋಡ್‌ ಗಳು ಬದಲಾವಣೆಗೊಂಡಾಗ ಸೂಕ್ತ ಮಾಹಿತಿ ನೀಡಬೇಕು. ಇಲ್ಲದಿದ್ದರೆ ಸ್ಥಳೀಯ ಉದ್ದಿಮೆದಾರರಿಗೆ ತೊಂದರೆಯಾಗುತ್ತದೆ ಎಂದು ಹೇಳಿದರು.

ಅಂಚೆ ಕಚೇರಿಯಲ್ಲಿ ಇ-ಪಾವತಿ ಹಾಗೂ ಹೆಚ್ಚಿನ ಸಂಖ್ಯೆಯಲ್ಲಿ ಉಳಿತಾಯ ಖಾತೆಯನ್ನು ತೆರೆಯಲು ಶ್ರಮಿಸುವಂತೆ ನಳಿನ್‌ ಕುಮಾರ್‌ ಸೂಚನೆ ನೀಡಿದರು.

ಅಂಚೆಚೀಟಿ ರಹಿತ ವ್ಯವಸ್ಥೆ ಜನರಿಗೆ ತಿಳಿಸಿ
ಅಂಚೆ ಚೀಟಿಯನ್ನು  ಲಗತ್ತಿಸದೆ ಅಂಚೆ ಬಡವಾಟೆ ಮಾಡುವ ಹೊಸ ವಿಧಾನದ ಬಗ್ಗೆ ಜನತೆಗೆ ಹೆಚ್ಚಿನ ಪರಿಚಯ ಇಲ್ಲ. ಬ್ರಹ್ಮಕಲಶೋತ್ಸವ ಮುಂತಾದ ಧಾರ್ಮಿಕ ಸಂದರ್ಭಗಳಲ್ಲಿ ಅಂಚೆ ಇಲಾಖೆಯ ಈ ಸೌಲಭ್ಯವನ್ನು ಜನತೆಗೆ ಪರಿಚಯಿಸಲು ಅಂಚೆ ಅಧಿಕಾರಿಗಳು ಮುಂದಾಗಬೇಕು. ವಿಶೇಷ ಕಾರ್ಯಕ್ರಮಗಳ ವೇಳೆ  ಅಂಚೆ ಚೀಟಿ ಹಾಗೂ ವಿಶೇಷ ಅಂಚೆ ಕವರ್‌ಗಳನ್ನು ಹೊರತರುವ ಬಗ್ಗೆ ಆಸಕ್ತಿಯನ್ನು ತೋರಿಸಬೇಕು ಎಂದು ಸಂಸದರು ಸಲಹೆ ಮಾಡಿದರು.