ಚಿರು ಹುಟ್ಟುಹಬ್ಬಕ್ಕೆ ಟ್ರೇಲರ್‌ ಗಿಫ್ಟ್!

Team Udayavani, Oct 27, 2017, 12:39 PM IST

ಗುರು ದೇಶಪಾಂಡೆ ಕಳೆದ ಬಾರಿ ನಟ ಚಿಕ್ಕಣ್ಣ ಹುಟ್ಟುಹಬ್ಬಕ್ಕೊಂದು ತಮ್ಮ “ಸಂಹಾರ’ ಚಿತ್ರದ ಟ್ರೇಲರ್‌ ರಿಲೀಸ್‌ ಮಾಡಿದ್ದರು. ಈ ಬಾರಿ ನಾಯಕ ನಟ ಚಿರಂಜೀವಿ ಸರ್ಜಾ ಅವರ ಹುಟ್ಟುಹಬ್ಬಕ್ಕೂ ಚಿತ್ರದ ಟ್ರೇಲರ್‌ ಬಿಡುಗಡೆ ಮಾಡಿ ಶುಭಕೋರಿದರು.

“ಒಬ್ಬ ನಿರ್ದೇಶಕನಾಗಿ ನಾನು ಕಲಾವಿದರಿಗೆ ಇದನ್ನೇ ಗಿಫ್ಟ್ ಆಗಿ ನೀಡುತ್ತಿದ್ದೇನೆ’ ಎನ್ನುವ ಗುರುದೇಶಪಾಂಡೆ, ಈಗ ಸಿನಿಮಾ ಬಿಡುಗಡೆಯ ತರಾತುರಿಯಲ್ಲಿದ್ದಾರೆ. ಈಗಾಗಲೇ ಚಿತ್ರೀಕರಣ ಮುಗಿದು ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಲ್ಲಿ ಬಿಝಿಯಾಗಿರುವ ಚಿತ್ರತಂಡ, ನವೆಂಬರ್‌ನಲ್ಲಿ ಬಿಡುಗಡೆ ಮಾಡುವ ತಯಾರಿಯಲ್ಲಿದೆ. “ಚಿತ್ರ ನಾವಂದುಕೊಂಡಂತೆ ಮುಗಿಯಿತು. ಈ ಚಿತ್ರದ ವಿಶೇಷವೆಂದರೆ ಒಂದು ಬ್ಲೆ„ಂಡ್‌ ಫೈಟ್‌ ಮಾಡಿದ್ದೇವೆ. ಚಿತ್ರದ ನಾಯಕ ಚಿರು ಇಲ್ಲಿ ಅಂಧನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆತ ಇಲ್ಲಿ ಒಂದು ಫೈಟ್‌ ಮಾಡುತ್ತಾನೆ. ವಿಶೇಷವಾಗಿ ಕಂಫೋಸ್‌ ಮಾಡಲಾಗಿದೆ. ಮೊದಲು ನಮಗೆ ಈ ಫೈಟ್‌ ಮಾಡಬೇಕೆಂಬ ಪ್ಲ್ರಾನ್‌ ಇರಲಿಲ್ಲ. ಕೊನೆಗೆ ಆ ತರಹದ ಒಂದು ಫೈಟ್‌ ಸೇರಿಸಿದರೆ ಮಜಾವಿರುತ್ತದೆ ಎನಿಸಿ ಸೇರಿಸಿದೆವು’ ಎಂಬುದು ನಿರ್ದೇಶಕ ಗುರುದೇಶಪಾಂಡೆ. 

ಸುಮಾರು 48 ದಿನಗಳ ಕಾಲ ಮಂಗಳೂರು ಸುತ್ತಮುತ್ತ ಚಿತ್ರೀಕರಣ ಮಾಡಲಾಗಿದೆ. ಶೀಘ್ರದಲ್ಲೇ ಚಿತ್ರದ ಆಡಿಯೋ
ಬಿಡುಗಡೆಯಾಗಲಿದೆಯಂತೆ. ಚಿತ್ರದ ನಿರ್ಮಾಪಕರಾದ ವೆಂಕಟೇಶ್‌ ಕೂಡಾ ಸಿನಿಮಾ ಚೆನ್ನಾಗಿ ಮೂಡಿಬಂದ ಖುಷಿ ವ್ಯಕ್ತಪಡಿಸಿದರು. ನಾಯಕ ಚಿರು ಅಂದು ಹುಟ್ಟುಹಬ್ಬದ ಸಂಭ್ರಮದ ಜೊತೆಗೆ ಟ್ರೇಲರ್‌ ಬಿಡುಗಡೆಯಾದ ಖುಷಿಯಲ್ಲಿದ್ದರು. “ಈ ಹಿಂದೆಯೂ ನನ್ನ ಹುಟ್ಟುಹಬ್ಬದ ಸಮಯದಲ್ಲಿ ಟ್ರೇಲರ್‌ ಬಿಡುಗಡೆಯಾಗಿದೆ. ಆದರೆ, ಪತ್ರಿಕಾಗೋಷ್ಠಿ ಇರಲಿಲ್ಲ. ಈ ಬಾರಿ ಹುಟ್ಟುಹಬ್ಬದ ದಿನ ಮಾಧ್ಯಮದ ಮುಂದೆ ಬಂದಿದ್ದು ಖುಷಿಕೊಟ್ಟಿದೆ’ ಎಂದರು ಚಿರು. ಚಿತ್ರದಲ್ಲಿ ಕಾವ್ಯಾ ಶೆಟ್ಟಿ ನಟಿಸಿದ್ದು, ಜರ್ನಲಿಸ್ಟ್‌ ಆಗಿ ಕಾಣಿಸಿಕೊಂಡಿದ್ದಾರಂತೆ.