ಬೆಳ್ಳಿತಾರೆ ಪಿ.ವಿ. ಸಿಂಧುಗೆ ವಿಮಾನದಲ್ಲಿ ಸಿಬಂದಿಯ ಕಿರುಕುಳ 

Team Udayavani, Nov 4, 2017, 2:37 PM IST

ಮುಂಬಯಿ: ಒಲಂಪಿಕ್ಸ್‌ ಬೆಳ್ಳಿ ಪದಕ ವಿಜೇತೆ, ಪ್ರಖ್ಯಾತ ಬ್ಯಾಡ್ಮಿಂಟನ್‌ ಆಟಗಾರ್ತಿಗೆ ವಿಮಾನದಲ್ಲಿಯೇ  ಸಿಬಂದಿಯೊಬ್ಬ ಅಸಭ್ಯವಾಗಿ ವರ್ತಿಸಿ ಕಿರುಕುಳ ನೀಡಿದ್ದಾನೆ.

ಈ ವಿಚಾರವನ್ನು ಶನಿವಾರ ಸ್ವತಃ ಸಿಂಧು ಅವರೇ ಟ್ವೀಟರ್‌ನಲ್ಲಿ ಬರೆದುಕೊಂಡು, ತನಗಾದ ಕಿರುಕುಳವನ್ನು ಬಹಿರಂಗಪಡಿಸಿದ್ದಾರೆ.

‘ಮುಂಬಯಿಗೆ ಪ್ರಯಾಣಿಸುತ್ತಿದ್ದ ವೇಳೆ ಇಂಡಿಗೋ 6 ಇ 608 ಸಂಖ್ಯೆಯ ವಿಮಾನದಲ್ಲಿ ನನಗೆ ಅತ್ಯಂತ ಕೆಟ್ಟ ಅನುಭವವಾಯಿತು. ಅಜಿತೇಶ್‌ ಎಂಬ ಸಿಬಂದಿ  ಕಿರುಕುಳ ನೀಡಿದ್ದಾನೆ’ ಎಂದು ಸಿಂಧು ಟ್ವೀಟ್‌ ಮಾಡಿದ್ದಾರೆ.

ಇನ್ನೊಂದು ಟ್ವೀಟ್‌ನಲ್ಲಿ ‘ಅಜಿತೇಶ್‌ ನನ್ನೊಂದಿಗೆ ತೀರಾ ಕೆಟ್ಟದಾಗಿ ನಡೆದುಕೊಂಡಿದ್ದು, ಗಗನಸಖಿ  ಬಂದು ಆ ಬಗ್ಗೆ ಆಕ್ಷೇಪ ವ್ಯಕ್ತ ಪಡಿಸಿದರೂ ಆತ ಆಕೆಯೊಂದಿಗೂ ಅನುಚಿತವಾಗಿ ವರ್ತಿಸಿದ. ನನಗೆ ಇದು ತೀವ್ರ ಅಚ್ಚರಿ ಉಂಟು ಮಾಡಿತು. ಇಂತಹ ಕೆಲಸಗಾರರು ಇಂಡಿಗೋದಂತಹ ಪ್ರತಿಷ್ಠಿತ ಸಂಸ್ಥೆಗಳಲ್ಲಿದ್ದರೆ ಸಂಸ್ಥೆಯ ಹೆಸರು ಕೆಡಿಸುತ್ತಾರೆ’ ಎಂದು ಬರೆದಿದ್ದಾರೆ.