ಸೆಕ್ಸ್‌ಗೆ ಪೀಡಿಸಿದ ಪ್ರಿಯಕರನನ್ನೇ ಕೊಂದಳು

Team Udayavani, Nov 5, 2017, 11:18 AM IST

ಬೆಂಗಳೂರು: ಸಹಜೀವನ ನಡೆಸುತ್ತಿದ್ದ ಬಸ್‌ ಚಾಲಕನ ಕುತ್ತಿಗೆ ಬೀಗಿದು ಕೊಲೆಗೈದು ಬಳಿಕ ಅಸಹಜ ಸಾವು ಎಂದು ಬಿಂಬಿಸಲು ಯತ್ನಿಸಿದ್ದ ಮಹಿಳೆಯನ್ನು ಕೋಣನಕುಂಟೆ ಪೊಲೀಸರು ಬಂಧಿಸಿದ್ದಾರೆ.

ರಾಮನಗರದ ಮೂಲದ ಸುನಂದಬಾಯಿ (30) ಬಂಧಿತೆ. ಅ.20ರಂದು ಪ್ರಿಯಕರ, ಕನಕಪುರ ಮೂಲದ ಮುತ್ತುರಾಜ್‌ (26) ಎಂಬಾತನ್ನು ಸುನಂದ ಕೊಲೆಗೈದಿದ್ದಳು. ಬಳಿಕ ಶವವನ್ನು ಮನೆಯಿಂದ ಸ್ವಲ್ಪ ದೂರ ಎಳೆದೊಯ್ದು ಅಸಹಜ ಸಾವು ಎಂದು ಬಿಂಬಿಸಲು ಯತ್ನಿಸಿದ್ದಳು. ಆದರೆ, ಮರಣೋತ್ತರ ಪರೀಕ್ಷೆ ವರದಿ ಆಧರಿಸಿ ವಿಚಾರಣೆ ತೀವ್ರಗೊಳಿಸಿದಾಗ ಕೊಲೆ ರಹಸ್ಯ ಬಯಲಾಗಿದೆ.

ಆರೋಪಿ ಸುನಂದಗೆ ಈಗಾಗಲೇ ವಿವಾಹವಾಗಿದ್ದು, ಇಬ್ಬರು ಮಕ್ಕಳಿದ್ದಾರೆ. ಕಳೆದ ವರ್ಷ ಪತಿ ಮೃತಪಟ್ಟ ನಂತರ ಮಕ್ಕಳನ್ನು ತಾಯಿ ಮನೆಯಲ್ಲೇ ಬಿಟ್ಟ ಆರೋಪಿ, ಖಾಸಗಿ ಬಸ್‌ ಚಾಲಕ ಮುತ್ತುರಾಜ್‌ ಜತೆ ಅಕ್ರಮ ಸಂಬಂಧ ಹೊಂದಿದ್ದರು. ಬಳಿಕ ಇಬ್ಬರೂ ಒಪ್ಪಿ ಕೋಣನಕುಂಟೆಯ ಗಣಪತಿ ನಗರದಲ್ಲಿ ಸಹಜೀವನ ನಡೆಸುತ್ತಿದ್ದರು.

ಮದ್ಯವ್ಯಸನಿಯಾಗಿದ್ದ ಮುತ್ತುರಾಜ್‌, ಕಳೆದ ಆರು ತಿಂಗಳಿಂದ ಸುನಂದಳ ಶೀಲ ಶಂಕಿಸಿ ಹಲ್ಲೆ ನಡೆಸುತ್ತಿದ್ದ. ಅಲ್ಲದೆ, ಮದ್ಯದ ಅಮಲಲ್ಲಿ ಬಲವಂತದ ಲೈಂಗಿಕ ಕ್ರಿಯೆಗೆ ಪೀಡಿಸುತ್ತಿದ್ದ. ಇದರಿಂದ ಬೇಸತ್ತ ಆರೋಪಿ, ಆತನ ಕೊಲೆಗೆ ಸಂಚು ರೂಪಿಸಿದ್ದಳು.

ಅಸಹಜ ಸಾವು ಪ್ರಕರಣ
ಮುತ್ತುರಾಜ್‌ನನ್ನು ಕೊಂದ ನಂತರ ಆತ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಬಿಂಬಿಸಲು ಸುನಂದ ಯೋಚಿಸಿದ್ದಳು. ಆದರೆ ಮನೆಯಲ್ಲಿ ಫ್ಯಾನ್‌ ಇಲ್ಲದ್ದನ್ನು ಗಮನಿಸಿ ಶವವನ್ನು ಮನೆಯಿಂದ ಸಾಗಿಸಿ, ಮರುದಿನ ಬೆಳಗ್ಗೆ ಎಂದಿನಂತೆ ಕೆಲಸಕ್ಕೆ ಹೋಗಿದ್ದಳು.

ತೆಂಗಿನ ಮರದ ಕೆಳಗೆ ಶವ ಕಂಡ ಸ್ಥಳೀಯರು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಈ ಸಂಬಂಧ ಸ್ಥಳಕ್ಕೆ ಭೇಟಿ ನೀಡಿದ ಪೊಲೀಸರು, ಅಸಹಜ ಸಾವು ಪ್ರಕರಣ ದಾಖಲಿಸಿಕೊಂಡು, ಮೃತ ದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದರು. ಆದರೆ, ಮರಣೋತ್ತರ ಪರೀಕ್ಷೆಯಲ್ಲಿ ಕತ್ತು ಬಿಗಿದು ಕೊಲೆ ಮಾಡಿರುವ ಅಂಶ ಬಯಲಾಗಿದೆ.

ಕೂಡಲೆ ಎಚ್ಚೆತ್ತ ಪೊಲೀಸರು, ಮುತ್ತುರಾಜ್‌ನ ಕುಟುಂಬ ಸದಸ್ಯರು ಹಾಗೂ ಸ್ನೇಹಿತರನ್ನು ವಿಚಾರಿಸಿದಾಗ ಆತ ಸುನಂದಾ ಜತೆ ಸಹ ಜೀವನ ನಡೆಸುತ್ತಿದ್ದ ಮಾಹಿತಿ ದೊರೆತಿದೆ. ನಂಥರ ಮುತ್ತುರಾಜ್‌ನ ಮೊಬೈಲ್‌ ಕರೆಗಳನ್ನು ಪರಿಶೀಲಿಸಿದ ಪೊಲೀಸರು, ಸುನಂದಾಳನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಆಕೆ ತಪ್ಪೊಪ್ಪಿಕೊಂಡಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಅಂದು ಕಂಠ ಪೂರ್ತಿ ಕುಡಿದಿದ್ದ
ಅ.30ರಂದು ಮುತ್ತರಾಜ್‌ ಕಂಠಪೂರ್ತಿ ಮದ್ಯ ಸೇವಿಸಿ ಮನೆಗೆ ಬಂದಿದ್ದ. ಮದ್ಯದ ಅಮಲಲ್ಲೇ ಲೈಂಗಿಕ ಕ್ರಿಯೆಗೆ ಒತ್ತಾಯಿಸಿದ್ದ. ಆಕೆ ನಿರಾಕರಿಸಿದಾಗ, “ಮತ್ತೂಬ್ಬನ ಜತೆ ಅಕ್ರಮ ಸಂಪರ್ಕ ಹೊಂದಿದ್ದೀಯ’ ಎಂದು ಅನುಮಾನಿಸಿದ್ದ. ಇದರಿಂದ ಕೋಪಗೊಂಡ ಸುನಂದ, ಅಮಲಿನಲ್ಲಿದ್ದ ಮುತ್ತುರಾಜ್‌ನ ಕುತ್ತಿಗೆಯನ್ನು ಪ್ಲಾಸ್ಟಿಕ್‌ ಹಗ್ಗದಿಂದ ಬಿಗಿದು ಕೊಲೆಗೈದಿದ್ದಳು. ನಂತರ ಶವವನ್ನು ಎಳೇದೊಯ್ದು ಮನೆಯಿಂದ ಸ್ವಲ್ಪ ದೂರದಲ್ಲಿರುವ ತೆಂಗಿನ ಮರದ ಕೆಳಗೆ ಬಿಟ್ಟು ಬಂದಿದ್ದಳು.