ನಿಂತಿದ್ದ ಟ್ರಕ್ಕಿಗೆ ಜೀಪ್‌ ಢಿಕ್ಕಿ: 13 ಸಾವು; 8 ಮಂದಿಗೆ ಗಾಯ

Team Udayavani, Nov 7, 2017, 12:22 PM IST

ಆನಂದ್‌, ಗುಜರಾತ್‌ : ಖೇಡಾ ಜಿಲ್ಲೆಯ  ಅಹ್ಮದಾಬಾದ್‌ – ಇಂದೋರ್‌ ಹೈವೇಯಲ್ಲಿ ಇಂದು ಮಂಗಳವಾರ ನಸುಕಿನ ವೇಳೆ ನಿಂತಿದ್ದ ಟ್ರಕ್ಕಿಗೆ ಜೀಪ್‌ ಡಿಕ್ಕಿಯಾದ ಭೀಕರ ಅವಘಡದಲ್ಲಿ ಕನಿಷ್ಠ 13 ಮಂದಿ ಮೃತಪಟ್ಟು ಇತರ ಎಂಟು ಮಂದಿ ಗಾಯಗೊಂಡರು.

ಮಧ್ಯಪ್ರದೇಶದ ಅಲಿರಾಜ್‌ಪುರ ಜಿಲ್ಲೆಯ ಸೇಜವಾಡಾ ಗ್ರಾಮದ ಕಾರ್ಮಿಕ ಕುಟುಂಬ ಮತ್ತು ಇತರ ಕೆಲವು ನಿವಾಸಿಗಳು ಅಹ್ಮದಾಬಾದ್‌ ಸಮಿಪದ ಧೋಲ್‌ಕಾ ದಿಂದ ಮರಳುತ್ತಿದ್ದಾಗ ಈ ದುರ್ಘ‌ಟನೆ ಇಂದು ನಸುಕಿನ 3 ಗಂಟೆಯ ವೇಳೆಗೆ ನಡೆಯಿತು. 

ನಿಂತಿದ್ದ ಟ್ರಕ್ಕಿಗೆ ಜೀಪು ಢಿಕ್ಕಿಯಾದ ರಭಸಕ್ಕೆ ಆರು ಮಹಿಳೆಯರು ಸೇರಿದಂತೆ 12 ಮಂದಿ ಸ್ಥಳದಲ್ಲೇ ಮಡಿದರು. ತೀವ್ರಗಾಯಗೊಂಡಿದ್ದ ಮಗು ಅನಂತರ ಆಸ್ಪತ್ರೆಯಲ್ಲಿ ಮೃತಪಟ್ಟಿತು. ಮೃತರಲ್ಲಿ ಜೀಪ್‌ ಚಾಲಕ ಕೂಡ ಸೇರಿದ್ದಾನೆ. ಎಂಟು ಮಂದಿ ಗಾಯಾಳುಗಳನ್ನು ಕಠಲಾಲ್‌ ಆಸ್ಪತ್ರೆಗೆ ಸೇರಿಸಲಾಗಿದೆ ಎಂದು ಕಠಲಾಲ್‌ ಪೊಲೀಸ್‌ ಠಾಣೆಯ ಎಸ್‌ಐ ಎ ಜಿ ರಾಠೊಡ್‌ ತಿಳಿಸಿದ್ದಾರೆ. 

ಅಪಘಾತಕ್ಕೆ ಈಡಾದ ವೇಳೆ ಜೀಪಿನಲ್ಲಿ ಒಟ್ಟು 25 ಮಂದಿ (ಚಾಲಕ ಸೇರಿ) ಇದ್ದರು ಎಂದು ರಾಠೊಡ್‌ ಹೇಳಿದ್ದಾರೆ.