ಭ್ರಷ್ಟಾವಾರದ ವಿರುದ್ಧ ಎಚ್‌ಎಎಲ್‌ನ ವಿಜಿಥಾನ್‌

Team Udayavani, Nov 7, 2017, 1:25 PM IST

ಬೆಂಗಳೂರು: ಪ್ರತಿಷ್ಠಿತ ಹಿಂದೂಸ್ತಾನ್‌ ಏರೋನಾಟಿಕ್ಸ್‌ ಲಿ., (ಎಚ್‌ಎಎಲ್‌) ಭಾನುವಾರ ಭ್ರಷ್ಟಾಚಾರ ವಿರೋಧಿ ಹೋರಾಟದ ಬಗ್ಗೆ ಜಾಗೃತಿ ಮೂಡಿಸಲು “ವಿಜಿಥಾನ್‌’ ಹಮ್ಮಿಕೊಂಡಿತ್ತು. ಭ್ರಷ್ಟಾಚಾರ ವಿರುದ್ಧದ ಈ ವಿಶೇಷ ನಡಿಗೆಯಲ್ಲಿ ಎಚ್‌ಎಎಲ್‌ ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ಟಿ. ಸುವರ್ಣರಾಜು, ಮುಖ್ಯ ವಿಚಕ್ಷಣ ಅಧಿಕಾರಿ ಬಿ. ಸೆಲ್ವಕುಮಾರ್‌ ಭಾಗವಹಿಸಿದ್ದರು.

ನಗರದ ಕಂಠೀರವ ಕ್ರೀಡಾಂಗಣದಿಂದ ಸುಮಾರು 2 ಕಿ.ಮೀ. ಈ “ವಿಜಿಥಾನ್‌’ ನಡೆಯಿತು. ಈ ಸಂದರ್ಭದಲ್ಲಿ ಮಾತನಾಡಿದ ಟಿ. ಸುವರ್ಣರಾಜು, ಭ್ರಷ್ಟಾಚಾರ ವಿರುದ್ಧ ಹೋರಾಡಲು ದೇಶದ ಪ್ರತಿಯೊಬ್ಬ ಪ್ರಜೆ ಕೈಜೋಡಿಸಬೇಕಿದೆ. ಈ ನಿಟ್ಟಿನಲ್ಲಿ ಐಕ್ಯತೆ ಮತ್ತು ಸಮಗ್ರತೆಯನ್ನು ಪ್ರದರ್ಶಿಸಬೇಕು. ಅಂದಾಗ ಭ್ರಷ್ಟಾಚಾರ ಮುಕ್ತ ಸಮಾಜ ನಿರ್ಮಾಣ ಸಾಧ್ಯ ಎಂದು ಹೇಳಿದರು. 

“ಭ್ರಷ್ಟಾಚಾರ ಮುಕ್ತ ಭಾರತ ನಿರ್ಮಾಣ; ನನ್ನ ದೂರದೃಷ್ಟಿ’ ಶೀರ್ಷಿಕೆ ಅಡಿ ಎಚ್‌ಎಎಲ್‌ ವತಿಯಿಂದ ಎಚ್‌ಎಎಲ್‌ ಕೇಂದ್ರ ಹಾಗೂ ವಿಭಾಗೀಯ ಕಚೇರಿಗಳಲ್ಲಿ ಕಳೆದ ಒಂದು ವಾರದಿಂದ ಭ್ರಷ್ಟಾಚಾರ ವಿರೋಧಿ ಜನಜಾಗೃತಿ ಸಪ್ತಾಹ ನಡೆಯುತ್ತಿದೆ. ಈಚೆಗೆ ನಡೆದ ಗೋಷ್ಠಿಯೊಂದರಲ್ಲಿ ರಾಜ್ಯ ನಿವೃತ್ತ ಪೊಲೀಸ್‌ ಮಹಾನಿರ್ದೇಶಕ ಆರ್‌.ಕೆ. ದತ್ತ, “ಭ್ರಷ್ಟಾಚಾರದ ಪ್ರಭಾವ’ ಕುರಿತು ಮಾತನಾಡಿದರು. ಇದಲ್ಲದೆ ವಿವಿಧ ಸಂವಾದ, ಚರ್ಚೆಗಳನ್ನೂ ಏರ್ಪಡಿಸಲಾಗಿತ್ತು.