ಮಾನ್ಯತೆ ಬೇಕು ಅನ್ನೋರು ಹೋರಾಟಕ್ಕೆ ಬರಲಿ

Team Udayavani, Nov 12, 2017, 11:50 AM IST

ಕೊಪ್ಪಳ: ಲಿಂಗಾಯತ ಧರ್ಮಕ್ಕೆ ಸಾಂವಿಧಾನಿಕ ಮಾನ್ಯತೆ ದೊರೆಯುವುದು ನೂರಕ್ಕೆ ನೂರು ಖಚಿತ. ಕೆಲವರು ನಮ್ಮ ಹೋರಾಟಕ್ಕೆ ಬರುತ್ತಿಲ್ಲ. ಬಿಜೆಪಿ ಸೇರಿ ನಮ್ಮ ಕಾಂಗ್ರೆಸ್‌ ಪಕ್ಷದ ಮುಖಂಡರೂ ಒಳಗೆ ಕುಳಿತಿದ್ದಾರೆ. ಧರ್ಮಕ್ಕೆ ಮಾನ್ಯತೆ ಬೇಕೆನ್ನುವವರು ತಾಕತ್ತಿದ್ದರೆ ಹೊರ ಬಂದು ಹೋರಾಟ ಮಾಡಲಿ ಎಂದು ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಸಚಿವ ವಿನಯ ಕುಲಕರ್ಣಿ ಸವಾಲು ಹಾಕಿದರು. 

ನಗರದಲ್ಲಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಬಿಜೆಪಿ ಸೇರಿ ಕೆಲವು ನಾಯಕರು ಎಲ್ಲಿ ನಮಗೆ ಮೇಲಿಂದ ನೋಟಿಸ್‌ ಬರುತ್ತದೆಯೋ ಎಂದು ಹೆದರಿ ಒಳಗೆ ಕುಳಿತಿದ್ದಾರೆ. ಅವರು ಯಾರು ಎಂದು ಮಾಧ್ಯಮ ಸೇರಿ ಜನಸಾಮಾನ್ಯರಿಗೂ ಗೊತ್ತಿದೆ.

ಲಿಂಗಾಯತ ಧರ್ಮ, ಸಮಾಜ, ಧರ್ಮದ ಮಾನ್ಯತೆ ಬೇಕೆನ್ನುವವರು ಹೊರ ಬಂದು ಹೋರಾಟಕ್ಕಿಳಿಯಲಿ.
ಲಿಂಗಾಯತ ಧರ್ಮದ ಹೋರಾಟದಲ್ಲಿ ಯಾರೆಲ್ಲ ಇಲ್ಲವೋ ಅವರೆಲ್ಲ ಒಳಗೆ ಕುಳಿತಂತೆ ಎಂದು ತಿಳಿದುಕೊಳ್ಳಿ. ನನಗೊಬ್ಬ ಯಾವುದೋ ಮಠದ ಸ್ವಾಮೀಜಿ ನೋಟಿಸ್‌ ಕಳಿಸಿದ್ದಾರೆ. ಅಂಥ ನೂರು ನೋಟಿಸ್‌ ಬಂದರೂ ನಾನು ಯಾವುದೇ ಕಾರಣಕ್ಕೂ ಹೆದರಲ್ಲ ಎಂದರು.