ಪಾರ್ಕಿಂಗ್‌ ಪ್ಲೇಸಲ್ಲೂ ಮಹಿಳಾ ಮೀಸಲು

Team Udayavani, Nov 13, 2017, 12:53 PM IST

ಬೆಂಗಳೂರು: ಪಾಲಿಕೆಯ ಎಲ್ಲ ಪ್ರಮುಖ ರಸ್ತೆಗಳು ಹಾಗೂ ಮಾಲ್‌ಗ‌ಳ ಪಾರ್ಕಿಂಗ್‌ ಸ್ಥಳದಲ್ಲಿ ಮಹಿಳಾ ಮೀಸಲು ವ್ಯವಸ್ಥೆ ಜಾರಿಗೊಳಿಸುವುದಾಗಿ ಮೇಯರ್‌ ಆರ್‌.ಸಂಪತ್‌ರಾಜ್‌ ತಿಳಿಸಿದ್ದಾರೆ.

ಭಾನುವಾರ ನಗರದ ಕಮರ್ಷಿಯಲ್‌ ಸ್ಟ್ರೀಟ್‌ ಹಾಗೂ ಗರುಡಾ ಮಾಲ್‌ ಪಾರ್ಕಿಂಗ್‌ ಸ್ಥಳದಲ್ಲಿ ಮಹಿಳೆಯವರಿಗೆ ಶೇ.20ರಿಂದ 25ರಷ್ಟು ಜಾಗವನ್ನು ಕಾಯ್ದಿರಿಸುವ ವ್ಯವಸ್ಥೆಗೆ ಚಾಲನೆ ನೀಡಿ ಮಾತನಾಡಿದ ಅವರು, ಪಾರ್ಕಿಂಗ್‌ನಲ್ಲೂ ಮಹಿಳೆಯರಿಗೆ ಜಾಗ ಮೀಸಲಿಡುವ ವ್ಯವಸ್ಥೆಯನ್ನು ಹಿಂದೆ ಬ್ರಿಗೇಡ್‌ ರಸ್ತೆಯಲ್ಲಿ ಆರಂಭಿಸಿದ್ದು, ಅದರಂತೆ ಹೆಚ್ಚಿನ ಜನರು ಬರುವ ಕಮರ್ಷಿಯಲ್‌ ಸ್ಟ್ರೀಟ್‌ ಹಾಗೂ ಗರುಡಾ ಮಾಲ್‌ಗ‌ಳಲ್ಲಿಯೂ ಆರಂಭಿಸಲಾಗಿದೆ ಎಂದರು.

ಸಚಿವ ರೋಷನ್‌ ಬೇಗ್‌ ಅವರೊಂದಿಗೆ ಕಮರ್ಷಿಯಲ್‌ ಸ್ಟ್ರೀಟ್‌ನಲ್ಲಿ ವ್ಯವಸ್ಥೆಯನ್ನು ಮಹಿಳೆಯರಿಗೆ ಮುಕ್ತಗೊಳಿಸಿದ ಅವರು, ನಗರದ ಪ್ರಮುಖ ವಾಣಿಜ್ಯ ಸ್ಥಳಗಳಲ್ಲಿ ಕಮರ್ಷಿಯಲ್‌ ಸ್ಟ್ರೀಟ್‌ ಸಹ ಒಂದಾಗಿದ್ದು, ನಿತ್ಯ ಸಾವಿರಾರು ಜನರು ಇಲ್ಲಿಗೆ ಭೇಟಿ ನೀಡುತ್ತಾರೆ.

ಇಲ್ಲಿ ಒಟ್ಟು 72 ವಾಹನಗಳ ನಿಲುಗಡೆಗೆ ಅವಕಾಶವಿದ್ದು, ಆ ಪೈಕಿ ಮಹಿಳೆಯರಿಗೆ 15 ಹಾಗೂ ಅಂಗವಿಕಲರಿಗೆ 3 ವಾಹನ ನಿಲುಗಡೆ ಸ್ಥಳಗಳನ್ನು, ಗರುಡಮಾಲ್‌ನಲ್ಲಿ ಒಟ್ಟು 972 ವಾಹನಗಳ ನಿಲುಗಡೆಗೆ ಅವಕಾಶವಿದ್ದು, ಅದರಲ್ಲಿ 195 ಪಾರ್ಕಿಂಗ್‌ ಸ್ಥಳಗಳನ್ನು ಮಹಿಳೆಯರಿಗೆ ಕಾಯ್ದಿರಿಸಲಾಗಿದೆ ಎಂದರು.