ಉದ್ಯಮಿ ವಿಜಯ ಮಲ್ಯ ಜೀವಕ್ಕೆ ತೊಂದರೆಯಿಲ್ಲ

Team Udayavani, Nov 15, 2017, 6:40 AM IST

ಹೊಸದಿಲ್ಲಿ: ಸಾಲ ಮಾಡಿ ತೀರಿಸಲಾರದೆ ವಿದೇಶಕ್ಕೆ ಓಡಿ ಹೋಗಿ ತಲೆಮರೆಸಿಕೊಂಡಿರುವ ಉದ್ಯಮಿ ವಿಜಯ ಮಲ್ಯ ಜೀವಕ್ಕೆ ಅಪಾಯ ಉಂಟಾಗದಂತೆ ಚೆನ್ನಾಗಿಯೇ ನೋಡಿಕೊಳ್ಳುತ್ತೇವೆ, ಕಳುಹಿಸಿಕೊಡಿ ಎಂದು ಬ್ರಿಟನ್‌ ನ್ಯಾಯಾಲಯಕ್ಕೆ ಮನವಿ ಸಲ್ಲಿಸಲು ಭಾರತ ಮುಂದಾಗಿದೆ. 

ಈ ಸಂಬಂಧ ಸೋಮವಾರ ಗೃಹ ಕಾರ್ಯದರ್ಶಿ ರಾಜೀವ್‌ ಗೌಬ ನೇತೃತ್ವದಲ್ಲಿ ಉನ್ನತ ಅಧಿಕಾರಿಗಳ ಮಟ್ಟದ ಸಭೆ ನಡೆದಿದ್ದು ಮಲ್ಯ ಜೀವಕ್ಕೆ ಯಾವುದೇ ಹಾನಿ ಆಗದಂತೆ ನೋಡಿಕೊಳ್ಳುವುದಾಗಿ ಭರವಸೆ ನೀಡಲು ನಿರ್ಧರಿಸಲಾಗಿದೆ.

ಈಗಾಗಲೇ ಅಲ್ಲಿನ ನ್ಯಾಯಾಲಯ ತಲೆಮರೆಸಿಕೊಂಡಿರುವ ಇಬ್ಬರು ಭಾರತೀಯರನ್ನು ಸ್ವದೇಶಕ್ಕೆ ಕಳುಹಿಸಲು ಒಪ್ಪಿಗೆ ನೀಡಿರಲಿಲ್ಲ. ಇದಕ್ಕೆ ತಿಹಾರ್‌ ಜೈಲಿನಲ್ಲಿರುವ ಅವ್ಯವಸ್ಥೆಯ ಕಾರಣವನ್ನೇ ಮುಂದಿಟ್ಟಿತ್ತು. ಹೀಗಾಗಿ ಮಲ್ಯ ವಿಚಾರದಲ್ಲಿ ಹಾಗಾಗ ಬಾರದು ಎಂಬ ಕಾರಣದಿಂದಾಗಿ ಚೆನ್ನಾಗಿ ನೋಡಿಕೊಳ್ಳುವ ಬಗ್ಗೆ ಭರವಸೆ ನೀಡುವ ನಿರ್ಧಾರ ಕೈಗೊಳ್ಳಲಾಗಿದೆ. ಅಲ್ಲದೆ ಮುಂಬಯಿಯ ಅರ್ಥರ್‌ ಮತ್ತು ದಿಲ್ಲಿಯ ತಿಹಾರ್‌ ಜೈಲಿನ ಭದ್ರತೆ ಬಗ್ಗೆ ಭರವಸೆ ನೀಡಲಾಗಿದೆ.