ಟಿಪ್ಪು ಮರಿಮೊಮ್ಮಕ್ಕಳಿಗೆ ಟಿಪ್ಪು ಏಕತಾ ಪ್ರಶಸ್ತಿ

Team Udayavani, Nov 15, 2017, 11:35 AM IST

ಬೆಂಗಳೂರು: ಅಖೀಲ ಕರ್ನಾಟಕ ಸೂಫಿ ಸಂಘ, ಇನ್ನಿತರ ಸಂಘಗಳ ಜೊತೆಗೂಡಿ ನಗರದಲ್ಲಿ ಮಂಗಳವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಟಿಪ್ಪುಸುಲ್ತಾನ್‌ 8ನೇ ಪೀಳಿಗೆಯ ಮರಿಮೊಮ್ಮಕ್ಕಳಾದ ಯುವರಾಜ ಫ‌ರಾಜ್‌ ಅಲಿ ಷಾ ಸುಲ್ತಾನ್‌ ಮತ್ತು ಬಿಲಾಲ್‌ ಅಲಿ ಷಾ ಅವರಿಗೆ “ಟಿಪ್ಪು ಸುಲ್ತಾನ್‌ ಏಕತಾ ‘ಪ್ರಶಸ್ತಿ ನೀಡಿ ಸನ್ಮಾನಿಸಿತು.

ಇದೇ ವೇಳೆ ಮಾತನಾಡಿದ ಹಿರಿಯ ವಕೀಲ ಎಂ.ಎಸ್‌.ಮುಕರಂ, ರಾಜ್ಯ ಸರ್ಕಾರ  ಟಿಪ್ಪುಸುಲ್ತಾನ್‌ ಕುಟುಂಬಸ್ಥರಿಗೆ ಬೆಂಗಳೂರಿನಲ್ಲಿ ವಾಸಿಸಲು ಆಶ್ರಯ ನೀಡಬೇಕು ಎಂದು ಒತ್ತಾಯಿಸಿದರು. ಈ ಹಿಂದೆ ಯುವರಾಜ ಫ‌ರಾಜ್‌ ಅಲಿ ಷಾ ಸುಲ್ತಾನ್‌, ಮಾಜಿ ಮುಖ್ಯಮಂತ್ರಿ ಜೆ.ಹೆಚ್‌ ಪಟೇಲ್‌ ಸರ್ಕಾರದ ಆಡಳಿತದ ವೇಳೆ ಬೆಂಗಳೂರಿನಲ್ಲಿ ನೆಲೆಸಲು ಆಶ್ರಯ ಕೇಳಿ ಮನವಿಸಲ್ಲಿಸಿದ್ದರು. ಅಲ್ಲದೆ ಬಿ.ಎಸ್‌. ಯಡಿಯೂರಪ್ಪ ಕೂಡ ಈ ಬಗ್ಗೆ ಆಶ್ವಾಸನೆಯನ್ನು ನೀಡಿದ್ದರು.

ಆದರೆ ಇನ್ನೂ ಇದು ಕಾರ್ಯಗತಕ್ಕೆ ಬಂದಿಲ್ಲ ಎಂದು ಹೇಳಿದರು. ಇದೇ ವೇಳೆ ಮಾತನಾಡಿದ ಯುವರಾಜ ಫ‌ರಾಜ್‌ ಅಲಿ ಷಾ ಸುಲ್ತಾನ್‌ ಮತ್ತು ಬಿಲಾಲ್‌ ಅಲಿ ಷಾ, ಟಿಪ್ಪುಸುಲ್ತಾನ್‌ ಜಯಂತಿಯನ್ನು ಅದ್ಧೂರಿಯಾಗಿ ಆಚರಿಸಿದ ರಾಜ್ಯ ಸರ್ಕಾರಕ್ಕೆ ಧನ್ಯವಾದ ಹೇಳಿದರು.