ಚೀನಾ ಓಪನ್‌ ಬ್ಯಾಡ್ಮಿಂಟನ್‌: ಸೈನಾ ಎರಡನೇ ಸುತ್ತಿಗೆ

Team Udayavani, Nov 16, 2017, 7:10 AM IST

ಶಾಂಘೈ(ಚೀನಾ): ಕಳೆದ ವಾರವಷ್ಟೇ ಪಿ.ವಿ.ಸಿಂಧು ಅವರನ್ನು ಸೋಲಿಸಿ ರಾಷ್ಟ್ರೀಯ ಚಾಂಪಿಯನ್‌ ಆಗಿರುವ ಸೈನಾ ನೆಹ್ವಾಲ್‌ ಚೀನಾ ಓಪನ್‌ನಲ್ಲಿ 2ನೇ ಸುತ್ತಿಗೆ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಬುಧವಾರ ನಡೆದ ಮಹಿಳಾ ಸಿಂಗಲ್ಸ್‌ನಲ್ಲಿ ಸೈನಾ ನೆಹ್ವಾಲ್‌ 21-12, 21-13 ರಿಂದ ಅಮೆರಿಕದ ಬೈವೆನ್‌ ಜಾಂಗ್‌ ವಿರುದ್ಧ ಗೆಲುವು ಪಡೆದರು. ಎರಡೂ ಗೇಮ್‌ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಲಂಡನ್‌ ಒಲಿಂಪಿಕ್ಸ್‌ ಕಂಚಿನ ಪದಕ ವಿಜೇತೆ ಸೈನಾ ಎದುರಾಳಿಗೆ ಭರ್ಜರಿ ಏಟು ನೀಡಿದರು. ಯಾವ ಹಂತದಲ್ಲಿಯೂ ಅಮೆರಿಕ ಆಟಗಾರ್ತಿಗೆ ಮೇಲುಗೈ ಸಾಧಿಸಲು ಅವಕಾಶವನ್ನೇ ನೀಡಲಿಲ್ಲ. ಸೈನಾ 2ನೇ ಸುತ್ತಿನಲ್ಲಿ ವಿಶ್ವ ನಂ.5ನೇ ಶ್ರೇಯಾಂಕಿತೆ ಜಪಾನ್‌ನ ಆಕನೆ ಯಮಗುಚಿ ಸವಾಲನ್ನು ಎದುರಿಸಲಿದ್ದಾರೆ.

ಸೌರಭ್‌ ವರ್ಮಾಗೆ ಸೋಲು: ಪುರುಷರ ಸಿಂಗಲ್ಸ್‌ನಲ್ಲಿ ಭಾರತದ ಭರವಸೆಯ ಪ್ರತಿಭೆ ಸೌರಭ್‌ ವರ್ಮಾ 14-21, 21-15, 11-21 ರಿಂದ ಫ್ರಾನ್ಸ್‌ನ ಬ್ರೈಸ್‌ ಲಿವರ್ಡೆಜ್‌ ವಿರುದ್ಧ ಸೋಲುಂಡರು. 55 ನಿಮಿಷಗಳ ಕಾಲ ನಡೆದ ಗೇಮ್‌ನಲ್ಲಿ ಭಾರತೀಯ ಆಟಗಾರ ಹೋರಾಟದ ಸೋಲುಕಂಡರು.

ಉಳಿದಂತೆ ಪುರುಷರ ಡಬಲ್ಸ್‌ನಲ್ಲಿ ಸಾತ್ವಿಕ್‌ ಮತ್ತು ಚಿರಾಗ್‌ ಶೆಟ್ಟಿ ಜೋಡಿ ಗೆಲುವು ಸಾಧಿಸಿದೆ. ಮಹಿಳಾ ಡಬಲ್ಸ್‌ನಲ್ಲಿ ಅಶ್ವಿ‌ನಿ ಪೋನ್ನಪ್ಪ ಮತ್ತು ಸಿಕ್ಕಿ ರೆಡ್ಡಿ ಜೋಡಿ ಸೋಲುಂಡಿದೆ.