ಗುಜರಾತ್‌ ಚುನಾವಣೆ: 70 ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆ

Team Udayavani, Nov 17, 2017, 3:31 PM IST

ಅಹ್ಮದಾಬಾದ್‌ : ಗುಜರಾತ್‌ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸುವ ತನ್ನ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಭಾರತೀಯ ಜನತಾ ಪಕ್ಷ ಇಂದು ಶುಕ್ರವಾರ ಬಿಡುಗಡೆಗೊಳಿಸಿದೆ.

70 ಮಂದಿ ಅಭ್ಯರ್ಥಿಗಳನ್ನು ಒಳಗೊಂಡ ಈ ಪಟ್ಟಿಯಲ್ಲಿ ಮುಖ್ಯಮಂತ್ರಿ ವಿಜಯ್‌ ರೂಪಾಣಿ (ರಾಜ್‌ಕೋಟ್‌ ಪಶ್ಚಿಮ ಕ್ಷೇತ್ರದಿಂದ), ಉಪ ಮುಖ್ಯಮಂತ್ರಿ ನಿತಿನ್‌ಭಾಯ್‌ ಪಟೇಲ್‌ (ಮೆಹಸಾನಾ ಕ್ಷೇತ್ರ) ಮತ್ತು ಗುಜರಾತ್‌ ಬಿಜೆಪಿ ಅಧ್ಯಕ್ಷ ಜಿತುಭಾಯ್‌ ವಘಾನಿ (ಭಾವನಗರ ಪಶ್ಚಿಮ) ಅವರ ಹೆಸರುಗಳು ಸೇರಿವೆ. 

ಈ ಪಟ್ಟಿಯಲ್ಲಿ ಕಾಂಗ್ರೆಸ್‌ ತೊರೆದು ಬಂದ 14 ಮಂದಿ ಕೂಡ ಸೇರಿದ್ದಾರೆ. ಈ ಮೊದಲ ಪಟ್ಟಿಯಲ್ಲಿರುವ ಅನೇಕರು ಹಾಲಿ ಶಾಸಕರಾಗಿದ್ದು ತಮ್ಮ ಕ್ಷೇತ್ರದಿಂದಲೇ ಕಣಕ್ಕಿಳಿಯಲಿದ್ದಾರೆ. 

ಆಶ್ಚರ್ಯಕರವಾಗಿ ಮತ್ತು ಎಲ್ಲರ ಊಹೆಗೆ ವಿರುದ್ಧವಾಗಿ ಪತಿದಾರ್‌ ಅನಾಮತ್‌ ಆಂದೋಲನ್‌ ಸಮಿತಿ (ಪಾಸ್‌) ಸದಸ್ಯರಾದ ವರುಣ್‌ ಪಟೇಲ್‌ ಮತ್ತು ರೇಶ್ಮಾ ಪಟೇಲ್‌ ಅವರ ಹೆಸರು ಈ ಮೊದಲ ಪಟ್ಟಿಯಲ್ಲಿ ಸೇರಿಲ್ಲ. 

ವಾಧ್ವಾನ್‌ ಕ್ಷೇತ್ರದ ಶಾಸಕಿ ವರ್ಷಾಬೆನ್‌ ದೋಷಿ ಮತ್ತು ಧರೀ ಕ್ಷೇತ್ರದ ಬಿಜೆಪಿ ಶಾಸಕ ನಳಿನ್‌ ಕೊಟಾಡಿಯಾ ಅವರನ್ನು  ಕೈಬಿಡಲಾಗಿದೆ. ಇವರ ಬದಲಿಗೆ ಧನಜೀ ಭಾಯ್‌ ಪಟೇಲ್‌ ವಾಧ್ವಾನ್‌ ಕ್ಷೇತ್ರದಿಂದಲೂ, ದಿಲೀಪ್‌ ಸಂಘಾನಿ ಧರೀ ಕ್ಷೇತ್ರದಿಂದಲೂ ಸ್ಪರ್ಧಿಸಲಿದ್ದಾರೆ. 

ಈ ಮೊದಲ ಪಟ್ಟಿಯ ಅಭ್ಯರ್ಥಿಗಳನ್ನು ಅಂತಿಮಗೊಳಿಸುವ ಸಭೆಯಲ್ಲಿ ಇಂದು ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ರಾಜನಾ‌ಥ್‌ ಸಿಂಗ್‌, ಸುಶ್ಮಾ ಸ್ವರಾಜ್‌ ಮತ್ತು ಬಿಜೆಪಿ ಕೇಂದ್ರೀಯ ಚುನಾವಣಾ ಸಮಿತಿಯ ಇತರ ಸದಸ್ಯರು ಪಾಲ್ಗೊಂಡಿದ್ದರು. 

ಗುಜರಾತ್‌ ವಿಧಾನಸಭಾ ಚುನಾವಣೆ ಡಿಸೆಂಬರ್‌ನಲ್ಲಿ ಎರಡು ಹಂತಗಳಲ್ಲಿ ನಡೆಯಲಿದೆ. 89 ಸ್ಥಾನಗಳಿಗೆ ನಡೆಯುವ ಮೊದಲ ಹಂತದ ಚುನಾವಣೆಯು ಡಿ.9ರಂದು ಹಾಗೂ 93 ಸ್ಥಾನಗಳಿಗೆ ನಡೆಯುವ ಚುನಾವಣೆ ಡಿ.14ರಂದು ನಡೆಯಲಿದೆ. 

ಗುಜರಾತ್‌ ಮತ್ತು ಹಿಮಾಚಲ ಪ್ರದೇಶ ಚುನಾವಣಾ ಫ‌ಲಿತಾಂಶ ಡಿ.18ರಂದು ಪ್ರಕಟಗೊಳ್ಳಲಿದೆ.