ಹಿಂದಿನ ಅಂತೆ-ಕಂತೆಗಳಿಗೆಲ್ಲಾ ಬ್ರೇಕ್‌!

Team Udayavani, Nov 28, 2017, 9:00 PM IST

ಮುತ್ತಪ್ಪ ರೈ ಕುರಿತ ಸಿನಿಮಾ ಮಾಡೋಕೆ ಬಂದವರು ಒಬ್ಬಿಬ್ಬರಲ್ಲ. ಅದೇಕೋ ಆ ಸಿನಿಮಾಗಳೇ ಶುರುವಾಗಲಿಲ್ಲ. ಆದರೆ, ಈಗ ಮುತ್ತಪ್ಪ ರೈ ಅವರ ಕುರಿತಾದ ಸಿನಿಮಾ ಶುರುವಾಗುವ ಸೂಚನೆ ಬಂದಿದೆ. ಅಂದಹಾಗೆ, ಮುತ್ತಪ್ಪ ರೈ ಸಿನಿಮಾ ಮಾಡೋಕೆ ಹೊರಟಿರೋದು ಬೇರಾರೂ ಅಲ್ಲ, ಪದ್ಮನಾಭ್‌. ಹೌದು, “ಜಾನ್‌ ಜಾನಿ ಜನಾರ್ದನ್‌’ ಮತ್ತು “ಕಾಲೇಜ್‌ ಕುಮಾರ್‌’ ಚಿತ್ರ ನಿರ್ಮಾಣ ಮಾಡಿದ್ದ ಪದ್ಮನಾಭ್‌, ಈಗ ರೈ ಅವರ ಕುರಿತ ಚಿತ್ರ ಮಾಡೋಕೆ ರೆಡಿಯಾಗಿದ್ದಾರೆ.

ಸದ್ಯಕ್ಕೆ ರೈ ಚಿತ್ರ ಮಾಡುವ ಬಗ್ಗೆ ಗಂಭೀರವಾಗಿ ಯೋಚನೆ ಮಾಡಿದ್ದಾರಷ್ಟೇ. ಆ ಚಿತ್ರದ ನಿರ್ದೇಶಕರ್ಯಾರು, ಹೀರೋ ಯಾರು, ತಂತ್ರಜ್ಞರು ಯಾರ್ಯಾರು ಇರುತ್ತಾರೆ ಎಂಬ ಬಗ್ಗೆ ಮಾಹಿತಿ ಇಲ್ಲ. ಪದ್ಮನಾಭ್‌, ಪ್ರತಿ ವರ್ಷ ಒಂದೊಂದು ಸಿನಿಮಾ ನಿರ್ಮಾಣ ಮಾಡುವ ನಿರ್ಧಾರ ಮಾಡಿದ್ದಾರೆ. “ರೈ’ ಅವರ ಕುರಿತಾದ ಚಿತ್ರದಲ್ಲಿ ಏನೆಲ್ಲಾ ಇರುತ್ತೆ ಎಂಬ ಪ್ರಶ್ನೆ ಎದುರಾಗಬಹುದು.

ಹಿಂದಿಯ “ವಾಸ್ತವ್‌’ ಮತ್ತು “ಸರ್ಕಾರ್‌’ ರೀತಿಯಂತೆಯೇ “ರೈ’ ಕುರಿತ ಚಿತ್ರವೂ ಮೂಡಿಬರಲಿದೆ ಎಂಬುದು ಸುದ್ದಿ. ಮುತ್ತಪ್ಪ ರೈ ಅವರ ಕುರಿತು ಸಿನಿಮಾ ಮಾಡುವುದಾಗಿ ಹೇಳಿದ ಹಲವರಲ್ಲಿ ನಿರ್ಮಾಪಕ ಧನರಾಜ್‌ ಕೂಡಾ ಒಬ್ಬರು. ಈ ಹಿಂದೆ ದರ್ಶನ್‌  ಅಭಿನಯದಲ್ಲಿ ಧನರಾಜ್‌ “ರೈ’ ಎಂಬ ಚಿತ್ರ ಮಾಡುವುದಾಗಿ ಅನೌನ್ಸ್‌ ಮಾಡಿದ್ದರು. ಆದರೆ, ಅದು ಸೆಟ್ಟೇರಲಿಲ್ಲ.

ಇತ್ತೀಚೆಗೆ ನಿರ್ದೇಶಕ ರಾಮ್‌ಗೊಪಾಲ್‌ ವರ್ಮ, ವಿವೇಕ್‌ ಒಬೇರಾಯ್‌ ಅಭಿನಯದಲ್ಲಿ “ರೈ’ ಚಿತ್ರ ಮಾಡುವುದಾಗಿ ಘೋಷಿಸಿದ್ದರು. ಅಷ್ಟೇ ಅಲ್ಲ, ಒಂದು ಸಮಾರಂಭವೂ ನಡೆದಿತ್ತು. ಆ ಚಿತ್ರವನ್ನು ಸಿ.ಆರ್‌.ಮನೋಹರ್‌ ನಿರ್ಮಿಸಬೇಕಿತ್ತು. ಅದೂ ಸಹ ನಿಂತು ಹೋಯಿತು. ಇನ್ನೆಲ್ಲೋ, ಸುದೀಪ್‌ ಅಭಿನಯದಲ್ಲಿ ರೈ ಕುರಿತ “ಅಪ್ಪಾ’ ಎಂಬ ಚಿತ್ರ ಮಾಡಲಾಗುತ್ತದಂತೆ ಎಂಬ ಮಾತುಗಳೂ ಕೇಳಿಬಂದಿದ್ದವು.

ಆ ಎಲ್ಲಾ ಅಂತೆ-ಕಂತೆಗಳು ಕೇಳಿಬಂದವೇ ಹೊರತು, ಸಿನಿಮಾ ಸೆಟ್ಟೇರಲಿಲ್ಲ. ಈಗ ಪದ್ಮನಾಭ್‌ ಆ ಅಂತೆ-ಕಂತೆಗಳಿಗೆ ಬ್ರೇಕ್‌ ಹಾಕಲು ಅಣಿಯಾಗುತ್ತಿದ್ದಾರೆ. ಅದಕ್ಕೂ ಮುನ್ನ, “ಕಾಲೇಜ್‌ ಕುಮಾರ್‌’ ಚಿತ್ರವನ್ನು ತೆಲುಗಿನಲ್ಲಿ ನಿರ್ಮಿಸುವುದಕ್ಕೆ ವೇದಿಕೆ ಸಜ್ಜಾಗಿದೆ. ತಮಿಳಿನಲ್ಲೂ ಮಾತುಕತೆ ನಡೆದಿದೆ. ಈ ಎರಡು ವಿಷಯಗಳ ಬಗ್ಗೆ ಸದ್ಯಕ್ಕೆ ತಲೆ ಕೆಡಿಸಿಕೊಂಡಿರುವ ಪದ್ಮನಾಭ್‌, ಮುಂದಿನ ವರ್ಷ ರೈ ಅವರ ಕುರಿತು ಸಿನಿಮಾ ನಿರ್ಮಿಸುವ ಸಾಧ್ಯತೆ ಇದೆ.