ಯಕ್ಷಗಾನ ಜಾಗೃತಿ ವೇದಿಕೆ ಅಸ್ತಿತ್ವಕ್ಕೆ

Team Udayavani, Dec 6, 2017, 10:27 AM IST

ಕೋಟ: ಯಕ್ಷಗಾನ ಕಲೆಯನ್ನು ಆಧುನಿಕತೆಯಿಂದ ಸಂರಕ್ಷಿಸಲು ಯಕ್ಷಗಾನ ಜಾಗೃತಿ ವೇದಿಕೆ ಜನ್ಮ ತಾಳಿದೆ.ಆಧುನೀಕರಣದ ಅಬ್ಬರಕ್ಕೆ ಯಕ್ಷ ಗಾನವೂ ತನ್ನ ಹಿಂದಿನ ಮೌಲ್ಯ ಗಳನ್ನು ಕಳೆದುಕೊಳ್ಳುತ್ತಿದೆ. ಈಗಲೇ ಎಚ್ಚೆತ್ತುಕೊಳ್ಳದಿದ್ದರೆ ಕಲೆಯ ಅಸ್ತಿತ್ವಕ್ಕೆ  ಧಕ್ಕೆ ಬರಬಹುದೆಂಬ ಕಾಳಜಿ ಹಿಂದೆ ಈ ವೇದಿಕೆ ಅವತರಿಸಿದೆ.

ಯಕ್ಷಗಾನದ ಕುರಿತು ಆಸಕ್ತಿ ಹಾಗೂ ಹಿಂದಿನಂತೆಯೇ ಮುಂದುವರಿಯಲೆಂಬ ಕಾಳಜಿ ಉಳ್ಳ ಒಂದಷ್ಟು  ಯಕ್ಷಪ್ರೇಮಿಗಳು ಯಕ್ಷಗಾನ ಜಾಗೃತಿ ವೇದಿಕೆಯನ್ನು ಸ್ಥಾಪಿಸಿದ್ದಾರೆ. ಯಕ್ಷಗಾನದ ಲೋಪ- ದೋಷ ಸರಿಪಡಿಸಲು ಈ ವೇದಿಕೆ ಶ್ರಮಿಸಲಿದೆ.  ಸಾಲಿಗ್ರಾಮದಲ್ಲಿ ಇತ್ತೀಚೆಗೆ ನಡೆದ ವೇದಿಕೆಯ ಸಭೆಯಲ್ಲಿ ಹಿರಿಯ ಯಕ್ಷಗಾನ ವಿಮರ್ಶಕ ಬೇಳೂರು ರಾಘವ ಶೆಟ್ಟಿ ಅವರನ್ನು  ಸಂಚಾಲಕರನ್ನಾಗಿ,  ಪ್ರೊ| ಕೆ. ಶಂಕರ ಜೋಯಿಷ್‌ ಅವರನ್ನು ಸಹ ಸಂಚಾಲಕರಾಗಿ ಆಯ್ಕೆ ಮಾಡಲಾಗಿದೆ. ಪ್ರಮುಖವಾಗಿ ಬಡಗುತಿಟ್ಟಿನ ಯಕ್ಷಗಾನ ಪ್ರದರ್ಶನವನ್ನು ಅದರ ಮೂಲ ತಿಟ್ಟಿಗೆ ತರುವುದು ಹಾಗೂ ಈ ಕುರಿತು ಮೇಳದ ಯಜಮಾನರಿಗೆ ಮನವಿ ಸಲ್ಲಿಸುವುದು, ಪೂರ್ವಚಾರದ ಪ್ರಕಾರ ಯಕ್ಷಗಾನವನ್ನು ಪ್ರದರ್ಶನಗೊಳಿಸುವಂತೆ ಮೇಳಗಳಿಗೆ ಒತ್ತಾಯಿಸಲು ಹರಿಕೆದಾರರಿಗೆ ಮನವಿ ಮಾಡುವುದು ವೇದಿಕೆಯ ಉದ್ದೇಶಗಳು.

ಇದಲ್ಲದೇ, ವೇಷಧಾರಿಣಿಯನ್ನು ಶಿಸ್ತು ಬದ್ಧಗೊಳಿಸಲು ಪ್ರಯತ್ನಿಸುವುದು, ದೇವಸ್ಥಾನದ ಆಡಳಿತ ಹೊಂದಿದ ಮೇಳಗಳಲ್ಲಿ ಯಕ್ಷಗಾನದ ಸಮರ್ಪಕತೆಯನ್ನು ಜಾರಿಗೆ ತರುವಂತೆ ಸಂಬಂಧಿಸಿದ ಸರಕಾರಿ ಅಧಿಕಾರಿಗಳಿಗೆ ಮನವಿ ಸಲ್ಲಿಸುವುದು,  ಪರಿಣತ ಕಲಾವಿದರಿಂದ ಪ್ರಾತ್ಯಕ್ಷಿಕೆ ಸಹಿತ ಸರಣಿಯನ್ನು ಏರ್ಪಡಿಸುವುದು, ಹವ್ಯಾಸಿಗಳ ಮಹಾ ಸಮ್ಮೇಳನ ನಡೆಸಿ ಅವರಿಗೆ ಸಂಪ್ರದಾಯದ ಮನವರಿಕೆ ಮಾಡುವುದು, ಹಾಡುಗಾರಿಕೆ, ಬಣ್ಣಗಾರಿಕೆ, ವೇಷ-ಭೂಷಣ, ರಂಗ ಕ್ರಿಯೆಗಳ ಸ್ವರೂಪ ಶೈಲಿಗಳನ್ನು ಸತ್‌ಪರಂಪರೆಗೆ ಸಮ್ಮತವಾಗುವಂತೆ ಉತ್ತಮ ಮಾದರಿಗಳನ್ನು ರೂಪಿಸುವುದು ಮತ್ತು ದಾಖಲೀಕರಿಸುವುದು, ಮಾಧ್ಯಮಗಳ ಮೂಲಕ ಯಕ್ಷಗಾನಕ್ಕೆ ಸಂಬಂಧಿಸಿದಂತೆ ಉತ್ತಮ ವಿಷಯಗಳನ್ನು ಪ್ರಸಾರಪಡಿಸುವುದು, ಅಶಕ್ತ ಕಲಾವಿದರಿಗೆ ನೆರವು ನೀಡುವುದು ಮುಂತಾದ ಧ್ಯೇಯವನ್ನು ಸಂಘಟನೆ ಹೊಂದಿದೆ.

ವೇದಿಕೆಯಲ್ಲಿ ಹಿರಿಯ ಯಕ್ಷಗಾನ ವಿಮರ್ಶಕರಾದ ಡಾ|ಕೆ.ಎಂ. ರಾಘವ ನಂಬಿಯಾರ್‌, ಗುಂಡ್ಮಿ ಸದಾನಂದ ಐತಾಳ, ಜಿ.ಆರ್‌.ಗಣಪಯ್ಯ ನಾವುಡ, ಸುರೇಂದ್ರ ಪಣಿಯೂರು, ಐರೋಡಿ ಗೋವಿಂದಪ್ಪ, ಕೃಷ್ಣಮೂರ್ತಿ ಉರಾಳ, ಮಂಜುನಾಥ ಪ್ರಭು, ಕೃಷ್ಣಮೂರ್ತಿ, ನಾಗರತ್ನಾ ಜಿ.ಹೇಳೆì, ಅಶೋಕ್‌ ಆಚಾರ್ಯ ಸಾೖಬ್ರಕಟ್ಟೆ ಅವರಿದ್ದು, ಜತೆಗೆ ಪ್ರಭಾಕರ ನಾೖರಿ, ಜಗದೀಶ್‌ ಆಚಾರ್ಯ, ವಿಶ್ವನಾಥ ಗಾಣಿಗ,  ಗಿರೀಶ್‌ ಗಾಣಿಗ ಬೆಟ್ಲಕ್ಕಿ, ಉಮಾನಾಥ ಶೆಟ್ಟಿ, ಕುಶ ಆಚಾರ, ಪಾಂಡುರಂಗ ಶೆಟ್ಟಿ ಮತ್ತಿತರರು ಕಿರಿಯ ಯಕ್ಷಾಭಿಮಾನಿಗಳು ಸದಸ್ಯರಾಗಿದ್ದಾರೆ.

ಯಕ್ಷಗಾನ ಕ್ಷೇತ್ರದಲ್ಲಿ ಒಂದಷ್ಟು  ಸುಧಾರಣೆಯ ಸಂಕಲ್ಪದೊಂದಿಗೆ ಈ ಸಂಘಟನೆ ರಚನೆಯಾಗಿದೆ ಎಂಬುದು ಸಂಘಟನೆಯವರ ಅಭಿಪ್ರಾಯ.

ಬಡಗುತಿಟ್ಟಿನ ಯಕ್ಷಗಾನ ಪ್ರದರ್ಶನದಲ್ಲಿ ಇದೀಗ ಮೂಲ ತಿಟ್ಟು ಹಾಗೂ ಪೂರ್ವಚಾರಗಳು ಮಾಯವಾಗಿವೆ. ವೇಷಧಾರಿಗಳ  ಶಿಸ್ತು ಕೂಡ ತಪ್ಪಿದೆ. ಹೀಗಾಗಿ ಯಕ್ಷಗಾನದ ಸಮರ್ಪಕತೆಯನ್ನು ಉಳಿಸಿಕೊಳ್ಳಲು ಪ್ರಯತ್ನಿಸಬೇಕೆಂಬ ಉದ್ದೇಶದಿಂದ ಸಮಾನ ಮನಸ್ಕರು ಸೇರಿ ಈ ಸಂಘಟನೆಯನ್ನು ಸ್ಥಾಪಿಸಿದ್ದೇವೆ. ಮನವಿ, ಪ್ರಾತ್ಯಕ್ಷಿಕೆ ಸಮ್ಮೇಳನ, ದಾಖಲೀಕರಣ ಮುಂತಾದವುಗಳ ಮೂಲಕ ಕಲೆಯ ಬೆಳವಣಿಗೆಗೆ ಪ್ರಯತ್ನಿಸಬೇಕೆನ್ನುವ ಉದ್ದೇಶ ಸಂಘಟನೆಯದ್ದು.
-ಬೇಳೂರು ರಾಘವ ಶೆಟ್ಟಿ ,  ಸಂಚಾಲಕರು ಯಕ್ಷಗಾನ ಜಾಗೃತಿ ವೇದಿಕೆ

 ರಾಜೇಶ ಗಾಣಿಗ ಅಚ್ಲಾಡಿ