ಬಾಂಗ್ಲಾ ಟಿ20ಯಲ್ಲಿ ಗೇಲ್‌ ಅಬ್ಬರ: ಐಪಿಎಲ್‌ ಕನಸಿಗೆ ಜೀವ

Team Udayavani, Dec 10, 2017, 6:40 AM IST

ಮೀರ್ಪುರ್‌ (ಬಾಂಗ್ಲಾ): ಇತ್ತೀಚೆಗೆ ಬ್ಯಾಟಿಂಗ್‌ಗಿಂತ ಹೆಚ್ಚಾಗಿ ವಿವಾದಗಳಲ್ಲೇ ಮುಳುಗಿರುವ ಸ್ಫೋಟಕ ಆಟಗಾರ ಕ್ರಿಸ್‌ ಗೇಲ್‌ ಕಡೆಗೂ ಸಿಡಿದಿದ್ದಾರೆ. ತಾವೊಬ್ಬರೇ ಏಕಾಂಗಿ ಬ್ಯಾಟಿಂಗ್‌ನಿಂದ ತಂಡದ ಗೆಲುವಿಗೆ ಕಾರಣವಾಗಿದ್ದಾರೆ. 

ರಂಗ್ಪುರ ರೈಡರ್ಸ್‌ ಪರ ಆಡಿದ ಗೇಲ್‌ ಖುಲಾ° ಟೈಟಾನ್ಸ್‌ ವಿರುದ್ಧ ಅಬ್ಬರಿಸಿದರು. ಕೇವಲ 51 ಎಸೆತದಲ್ಲಿ 14 ಸಿಕ್ಸರ್‌, 6 ಬೌಂಡರಿ ಸಹಿತ 126 ರನ್‌ ಗಳಿಸಿದರು. ಯಾವುದೇ ಟಿ20 ಕೂಟದಲ್ಲಿ ನಾಕೌಟ್‌ ಹಂತದಲ್ಲಿ ಬ್ಯಾಟ್ಸ್‌ಮನ್‌ ಒಬ್ಬನ ಗರಿಷ್ಠ ಗಳಿಕೆಯಿದು. ಈ ಅಬ್ಬರದಿಂದ ರಂಗ್ಪುರ ಸುಲಭ ಗೆಲುವು ಗಳಿಸಿತು. ಇದು ಗೇಲ್‌ ಐಪಿಎಲ್‌ನಲ್ಲಿ ಉಳಿದುಕೊಳ್ಳುವ ಅವಕಾಶವನ್ನು ಹೆಚ್ಚಿಸಿದೆ. ಕಳೆದ ಎರಡು ಐಪಿಎಲ್‌ ಆವೃತ್ತಿಗಳಿಂದ ನಿರಂತರವಾಗಿ ವಿಫ‌ಲವಾಗುತ್ತಿರುವ ಗೇಲ್‌ರನ್ನು ಉಳಿಸಿಕೊಳ್ಳುವ ಉತ್ಸಾಹದಲ್ಲಿ ಆರ್‌ಸಿಬಿ ಇಲ್ಲ ಎಂದು ಹೇಳಲಾಗಿದೆ. ಅವರ ಈ ಫಾರ್ಮ್ನಿಂದ ಆರ್‌ಸಿಬಿ ಕೈಬಿಟ್ಟರೂ ಬೇರೆ ತಂಡಕ್ಕೆ ಆಯ್ಕೆಯಾಗುವ ಸಾಧ್ಯತೆಯನ್ನು ಹೆಚ್ಚಿಸಿದೆ.