ಪೆಟ್ರೋಲ್‌ ದರ ಇಳಿಕೆಗೆ ಸಂಸತ್‌ನಲ್ಲಿ ಮಸೂದೆ

Team Udayavani, Dec 10, 2017, 8:00 AM IST

ಮುಂಬಯಿ: ಪೆಟ್ರೋಲ್‌ ಬೆಲೆ ಇಳಿಸುವ ನಿಟ್ಟಿನಲ್ಲಿ, ಮಿಥನಾಲ್‌ ಮಿಶ್ರಣದ ಪ್ರಮಾಣವನ್ನು ಶೇ.15ಕ್ಕೆ ಏರಿಕೆ ಮಾಡಿ ನೀತಿ ರೂಪಿಸಲಾಗುತ್ತದೆ ಎಂದು ಕೇಂದ್ರ ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಹೇಳಿದ್ದಾರೆ. ಅಲ್ಲದೆ ಇದರಿಂದ ಮಾಲಿನ್ಯ ಕೂಡ ಕಡಿಮೆ ಯಾಗಲಿದೆ. ಮುಂಬರುವ ಅಧಿವೇಶನದಲ್ಲಿ ಈ ನೀತಿಯನ್ನು ಮಂಡಿಸಲಾಗುತ್ತದೆ. ಮಿಥನಾಲ್‌ಅನ್ನು ಕಲ್ಲಿದ್ದಲಿನಿಂದ ತಯಾರಿಸಲಾಗುತ್ತದೆ. ಪ್ರತಿ ಲೀಟರ್‌ಗೆ ಇದರ ವೆಚ್ಚ ಕೇವಲ 22 ರೂ. ಆಗಿರುತ್ತದೆ. ಅದರಲ್ಲೂ ಚೀನಾದಲ್ಲಿ ಕಲ್ಲಿದ್ದಲು ಉಪ ಉತ್ಪನ್ನ ಕೇವಲ ಪ್ರತಿ ಲೀಟರ್‌ಗೆ 17 ರೂ.ಯಲ್ಲಿ ಸಿಗುತ್ತದೆ. ಹೀಗಾಗಿ ಈ ನಿರ್ಧಾರದಿಂದ ವೆಚ್ಚದ ಜತೆಗೆ ಮಾಲಿನ್ಯವೂ ಕಡಿಮೆಯಾಗುತ್ತದೆ ಎಂದು ಅವರು ಹೇಳಿದ್ದಾರೆ.

ಮುಂಬಯಿಯ ದೀಪಕ್‌ ಫ‌ರ್ಟಿಲೈಸರ್ಸ್‌ ಮತ್ತು ರಾಷ್ಟ್ರೀಯ ಕೆಮಿಕಲ್ಸ್‌ ಆಂಡ್‌ ಫ‌ರ್ಟಿಲೈಸರ್ಸ್‌ ಸೇರಿದಂತೆ ಹಲವು ಕಂಪೆನಿಗಳು ಮಿಥನಾಲ್‌ ಉತ್ಪಾದಿಸಬಲ್ಲವು. ಈಗಾಗಲೇ ವೋಲ್ವೋ ಕಂಪೆನಿಯು ವಿಶೇಷ ಇಂಜಿನ್‌ ತಯಾರಿಸಿದ್ದು, ಇದು ಮಿಥನಾಲ್‌ ಬಳಸಿ ಚಲಿಸಬಲ್ಲದು ಮತ್ತು ಸ್ಥಳೀಯವಾಗಿ ಉತ್ಪಾದಿಸಿದ ಮಿಥನಾಲ್‌ಅನ್ನೇ ಇದರಲ್ಲಿ ಉಪಯೋಗಿಸಬಹುದಾಗಿದೆ. ಪ್ರಾಯೋಗಿಕ ವಾಗಿ 25 ಬಸ್‌ಗಳನ್ನು ಈ ಇಂಜಿನ್‌ ಬಳಸಿ ಓಡಿಸಲು ನಿರ್ಧರಿಸಲಾಗಿದೆ.

ಅಲ್ಲದೆ ಪೆಟ್ರೋಲಿಯಂ ಸಚಿವಾಲಯಕ್ಕೆ ಈ ಸಂಬಂಧ ಸಲಹೆ ನೀಡಲಾಗಿದ್ದು, 70 ಸಾವಿರ ಕೋಟಿ ರೂ. ವೆಚ್ಚದಲ್ಲಿ ಪೆಟ್ರೋಲಿಯಂ ರಿಫೈನರಿಗಳನ್ನು ನಿರ್ಮಿಸುವುದರ ಬದಲಿಗೆ ಈ ಆಯ್ಕೆಯ ಬಗ್ಗೆ ಯೋಚಿಸುವಂತೆ ಸೂಚಿಸಲಾಗಿದೆ ಎಂದು ಗಡ್ಕರಿ ಇದೇ ವೇಳೆ ಹೇಳಿದ್ದಾರೆ.

60 ಸಾವಿರ ಕೋಟಿ ರೂ. ಹೂಡಿಕೆ
ಮುಂಬಯಿನ ಜೆಎನ್‌ಪಿಟಿ ಎಸ್‌ಇಝೆಡ್‌ನ‌ಲ್ಲಿ 24 ಕಂಪೆನಿಗಳು ಹೂಡಿಕೆ ಮುಂದೆ ಬಂದಿದ್ದು, ಒಟ್ಟು 60 ಸಾವಿರ ಕೋಟಿ ರೂ. ಹೂಡಿಕೆ ಮಾಡಲಾಗುತ್ತಿದೆ ಎಂದು ಗಡ್ಕರಿ ಇದೇ ವೇಳೆ ಹೇಳಿದ್ದಾರೆ. ಈ ಹೂಡಿಕೆಯಿಂದಾಗಿ 1.50 ಲಕ್ಷ ಉದ್ಯೋಗ ಸೃಷ್ಟಿಯಾಗಲಿದೆ. ಈಗಾ ಗಲೇ ಮೊಬೈಲ್‌ ತಯಾರಿಕೆ ಕಂಪೆನಿ ಫಾಕ್ಸ್‌ಕಾನ್‌ ತನ್ನ ಫ್ಯಾಕ್ಟರಿ ಸ್ಥಾಪಿಸಲು ಬಯಸಿದೆ ಎಂದು ಹೇಳಲಾಗಿತ್ತು. ಸಾಗರಮಾಲಾ ಯೋಜನೆಯಡಿಯಲ್ಲಿ 2 ಲಕ್ಷ ಕೋಟಿ ರೂ. ಮೊತ್ತದ ಕಾಮಗಾರಿ ಚಾಲ್ತಿಯಲ್ಲಿದೆ. ಇನ್ನೂ ಹಲವು ಯೋಜನೆಗಳು ಕಾರ್ಯಗತಗೊಳ್ಳಲಿವೆ ಎಂದು ಅವರು ಹೇಳಿದ್ದಾರೆ.