ಕೋಲ್ಕತಾದಲ್ಲಿ ಮುನಿಸಿಕೊಂಡರು ಫ‌ುಟ್ಬಾಲ್‌ ದೇವರು ಮರಡೋನಾ

Team Udayavani, Dec 14, 2017, 1:13 PM IST

ಕೋಲ್ಕತಾ: ಅಭಿಮಾನಿಗಳ ಆರಾಧ್ಯ ದೈವ, ಅರ್ಜೆಂಟೀನಾ ಮಾಜಿ ಫ‌ುಟ್ಬಾಲಿಗ ಡಿಯಾಗೊ ಮರಡೋನಾ ದಕ್ಷಿಣ ಕೋಲ್ಕತಾ ಕ್ಲಬ್‌ ಕಾರ್ಯಕ್ರಮಕ್ಕೆ ತೆರಳಿದ ವೇಳೆ ತಾಳ್ಮೆ ಕಳೆದುಕೊಂಡು ಸಿಟ್ಟಾದರು. ಅಷ್ಟೇ ಅಲ್ಲ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಾಗದೇ ವಾಪಸ್‌ ಹೋಟೆಲ್‌ಗೆ ಮರಳಿದ ಘಟನೆ ಕೂಡ ನಡೆಯಿತು.

ಮರಡೋನಾ ಕೋಪಕ್ಕೆ ಕಾರಣವಾಗಿದ್ದು ಕಿಕ್ಕೀರಿದು ತುಂಬಿದ್ದ ಅಭಿಮಾನಿಗಳ ವರ್ತನೆ. ಮರಡೋನಾ ಸ್ಥಳೀಯ ಕ್ಲಬ್‌ ಕಾರ್ಯಕ್ರಮವೊಂದಕ್ಕಾಗಿ ಆಗಮಿಸಿದ್ದರು. ಈ ವೇಳೆ ನೂರಾರು ಸಂಖ್ಯೆಯಲ್ಲಿ ಅಭಿಮಾನಿಗಳು ತುಂಬಿಕೊಂಡಿದ್ದರು. ಮರಡೋನಾಗೆ ಕಾರಿನಿಂದ ಕೆಳಕ್ಕೆ ಇಳಿಯಲು ಸಾಧ್ಯವಾಗಲೇ ಇಲ್ಲ. ಭದ್ರತಾ ಅಧಿಕಾರಿಗಳು ಅಭಿಮಾನಿಗಳನ್ನು ನಿಯಂತ್ರಿಸುವಲ್ಲಿ ಹರಸಾಹಸ ಪಟ್ಟರು. 2 ನಿಮಿಷ ಇಳಿಯುತ್ತೇನೆ ಎಂದರು ಅಭಿಮಾನಿಗಳು ಕೇಳಲಿಲ್ಲ. ಇದರಿಂದ ಮರಡೋನಾ ಅಭಿಮಾನಿಗಳ ವಿರುದ್ಧ ತಾಳ್ಮೆ ಕಳೆದುಕೊಂಡರು. ಡಿಯಾಗೊ ಸಿಟ್ಟಾಗಿದ್ದನ್ನು ಗಮನಿಸಿದ ಕಾರ್ಯಕ್ರಮದ ಸಂಘಟಕರು ಅವರನ್ನು ಕೆಳಕ್ಕೆ ಇಳಿಯುವಂತೆ ಮತ್ತೆ ಹೇಳಲಿಲ್ಲ. ಮರಡೋನಾ ಕಾರ್ಯಕ್ರಮದ ಸ್ಮರಣಾರ್ಥ ಸಿದ್ಧಪಡಿಸಿದ್ದ ಹಾಳೆಗೆ ಕಾರಿನಲ್ಲೇ ಕುಳಿತು ಸಹಿ ಮಾಡಿ ವಾಪಸ್‌ ಹೋಟೆಲ್‌ಗೆ ಮರಳಿದರು.