ದುಬೈ ಬ್ಯಾಡ್ಮಿಂಟನ್‌: ಸೆಮೀಸ್‌ಗೇರಿದ ಸಿಂಧು

Team Udayavani, Dec 15, 2017, 6:55 AM IST

ದುಬೈ: ಭಾರತದ ಖ್ಯಾತ ಬ್ಯಾಡ್ಮಿಂಟನ್‌ ತಾರೆ ಒಲಿಂಪಿಕ್ಸ್‌ ಬೆಳ್ಳಿ ಪದಕ ವಿಜೇತೆ ಪಿ.ವಿ.ಸಿಂಧು ದುಬೈ ವಿಶ್ವ ಸೂಪರ್‌ ಸೀರಿಸ್‌ ಫೈನಲ್ಸ್‌ನ ಸೆಮಿಫೈನಲ್‌ ತಲುಪಿದ್ದಾರೆ. ಇವರು “ಎ’ ಗುಂಪಿನ 2ನೇ ಪಂದ್ಯದಲ್ಲಿ ಜಪಾನ್‌ನ ಸಯಾಕ ಸ್ಯಾಟೊ ಅವರನ್ನು 21-13, 21-12 ಗೇಮ್‌ಗಳ ಅಂತರದಿಂದ ಸೋಲಿಸಿದರು. ಎರಡು ಗೇಮ್‌ನಲ್ಲೂ ಸಿಂಧು ಆಕ್ರಮಣಕಾರಿ ಆಟ ಪ್ರದರ್ಶಿಸಿದರು. ಎದುರಾಳಿಗೆ ಎಲ್ಲೂ ಚೇತರಿಕೆ ಕಾಣಲು ಅವರು ಅವಕಾಶವನ್ನೇ ನೀಡಲೇ ಇಲ್ಲ. ಪರಿಣಾಮ ಪಂದ್ಯವನ್ನು ಸುಲಭವಾಗಿ ನೇರ ಗೇಮ್‌ನಿಂದ ಗೆದ್ದುಕೊಂಡರು.

ಶ್ರೀಕಾಂತ್‌ ಔಟ್‌: ಕಿದಂಬಿ ಶ್ರೀಕಾಂತ್‌ ಪುರುಷರ ಸಿಂಗಲ್ಸ್‌ ಗುಂಪು “ಬಿ’ ವಿಭಾಗದ ಎರಡನೇ ಪಂದ್ಯದಲ್ಲೂ ಸೋಲುಂಡರು. ಈ ಮೂಲಕ ಕೂಟದಿಂದ ಅಧಿಕೃತವಾಗಿ ಹೊರಬಿದ್ದರು. ಇವರನ್ನು ತೈವಾನ್‌ ಆಟಗಾರ ಚೊವ್‌ ಟಿನ್‌ ಚೆನ್‌ 21-18, 21-18 ಗೇಮ್‌ಗಳ ಅಂತರದಿಂದ ಸೋಲಿಸಿದರು. ಮೊದಲ ಗೇಮ್‌ನಲ್ಲಿ ಶ್ರೀಕಾಂತ್‌ ಬಿರುಸಿನ ಹೋರಾಟ ಪ್ರದರ್ಶಿಸಿದರು. ಆದರೂ 18-21ರಿಂದ ಎದುರಾಳಿಗೆ ಶರಣಾದರು. 1-0 ಅಂತರದ ಹಿನ್ನಡೆ ಅನುಭವಿಸಿದರು. ಎರಡನೇ ಗೇಮ್‌ನಲ್ಲೂ ಶ್ರೀಕಾಂತ್‌ ಗೆಲುವಿಗಾಗಿ ಇನ್ನಿಲ್ಲದ ಹೋರಾಟ ನಡೆಸಿದರು. ಅಂತಿಮವಾಗಿ 18-21ರಿಂದ ತಲೆ ಭಾಗಿದರು. 2-0 ನೇರ ಸೆಟ್‌ಗಳ ಅಂತರದಿಂದ ಶರಣಾದರು. ಶ್ರೀಕಾಂತ್‌ ತಮ್ಮ ಗುಂಪಿನ ಮೊದಲ ಪಂದ್ಯದಲ್ಲಿ ಡೆನ್ಮಾರ್ಕ್‌ನ ವಿಕ್ಟರ್‌ ವಿರುದ್ಧ ಸೋಲುಕಂಡಿದ್ದರು.