ನಿಮ್ಮ ಅಪ್ಪನಿಗಿಂತ ಚೆನ್ನಾಗಿ ಡ್ಯಾನ್ಸ್‌ ಮಾಡಿದ್ದೀಯ!

Team Udayavani, Dec 17, 2017, 12:58 PM IST

ರವಿಚಂದ್ರನ್‌ ಪುತ್ರ ಮನೋರಂಜನ್‌ ನಾಯಕರಾಗಿರುವ “ಬೃಹಸ್ಪತಿ’ ಚಿತ್ರದ ಆಡಿಯೋ ಬಿಡುಗಡೆ ಇತ್ತೀಚೆಗೆ ನಡೆಯಿತು. ಆಡಿಯೋ ಬಿಡುಗಡೆ ಮಾಡುವ ಮುನ್ನ ಚಿತ್ರದ ಹಾಡುಗಳ ಜೊತೆಗೆ ನಟ ಮನೋರಂಜನ್‌ ಅವರ ಲೈವ್‌ ಪರ್‌ಫಾರ್ಮೆನ್ಸ್‌ ಕೂಡಾ ಇತ್ತು. ಚಿತ್ರದ ದೃಶ್ಯವೊಂದನ್ನು ಮನೋರಂಜನ್‌ ಹಾಗೂ ಸಹನಟ ಮಾಡಿ ತೋರಿಸಿದರು. ಎರಡು ಪುಟದಷ್ಟು ಡೈಲಾಗ್‌ ಅನ್ನು ಮನೋರಂಜನ್‌ ಒಂದೇ ಉಸಿರಿನಲ್ಲಿ ಹೇಳುವ ಮೂಲಕ ಚಪ್ಪಾಳೆ ಗಿಟ್ಟಿಸಿದರು. ಇನ್ನು, ಹಾಡಿನಲ್ಲಿ ಮನೋರಂಜನ್‌ ಡಾನ್ಸ್‌ ನೋಡಿಯೇ ಎಲ್ಲರೂ ಖುಷಿಯಾಗಿದ್ದರು. ಈ ಖುಷಿಯನ್ನು ವೇದಿಕೆಗೆ ಬಂದ ನಿರ್ಮಾಪಕ ಮುನಿರತ್ನ ಅವರು ತಮ್ಮದೇ ಶೈಲಿಯಲ್ಲಿ ವ್ಯಕ್ತಪಡಿಸಿದರು. ಅದು “ನಿಮ್ಮ ಅಪ್ಪನಿಗಿಂತ ಚೆನ್ನಾಗಿ ಡ್ಯಾನ್ಸ್‌ ಮಾಡಿದ್ದೀಯ’ ಎನ್ನುವ ಮೂಲಕ.

ಹೌದು, ಮುನಿರತ್ನ ಹೀಗೆ ನೇರವಾಗಿ ಹೇಳಿ ಮನೋರಂಜನ್‌ ಬೆನ್ನು ತಟ್ಟಿದರು. “ನಿನ್ನ ಪರ್‌ಫಾರ್ಮೆನ್ಸ್‌, ಅದರಲ್ಲೂ ಡ್ಯಾನ್ಸ್‌ ನೋಡಿ ಖುಷಿಯಾಯಿತು. ನಿಜ ಹೇಳಬೇಕೆಂದರೆ ನಿಮ್ಮ ಅಪ್ಪನಿಗಿಂತ ಚೆನ್ನಾಗಿ ಡ್ಯಾನ್ಸ್‌ ಮಾಡಿದ್ದೀಯ. ಇದರಲ್ಲಿ ಮುಚ್ಚುಮರೆಯಿಲ್ಲ. ಇವತ್ತು ಈ ವೇದಿಕೆಯಲ್ಲಿ ಅವರಿದ್ದರೂ ಇದೇ ಮಾತನ್ನು ಹೇಳುತ್ತಿದ್ದೆ’ ಎನ್ನುವ ಮೂಲಕ ಮನೋರಂಜನ್‌ ಡ್ಯಾನ್ಸ್‌ ಬಗ್ಗೆ ಮೆಚ್ಚುಗೆ ಸೂಚಿಸಿದರು. ಅಂದಹಾಗೆ, ಮನೋರಂಜನ್‌ ಅವರ “ಬೃಹಸ್ಪತಿ’ ಚಿತ್ರ ತಮಿಳಿನಲ್ಲಿ ಧನುಶ್‌ ನಟಿಸಿರುವ “ವಿಐಪಿ’ ಚಿತ್ರದ ರೀಮೇಕ್‌. ಈ ಚಿತ್ರವನ್ನು ನಂದಕಿಶೋರ್‌ ನಿರ್ದೇಶಿಸಿದ್ದಾರೆ. ಚಿತ್ರ ಮುಂದಿನ ತಿಂಗಳು ಬಿಡುಗಡೆಯಾಗಲಿದೆ.