ನಟ ಸುದೀಪ್‌ ನಿವಾಸದಲ್ಲಿ ಭೋಜನ ಸವಿದ ಎಚ್‌ಡಿಕೆ

Team Udayavani, Dec 18, 2017, 6:35 AM IST

ಬೆಂಗಳೂರು: ಮಾಜಿ ಮುಖ್ಯಮಂತ್ರಿ ಹಾಗೂ ಜೆಡಿಎಸ್‌ ರಾಜ್ಯಾಧ್ಯಕ್ಷ ಎಚ್‌.ಡಿ.ಕುಮಾರಸ್ವಾಮಿ ಅವರು ಭಾನುವಾರ ಚಿತ್ರನಟ ಕಿಚ್ಚ ಸುದೀಪ್‌ ನಿವಾಸಕ್ಕೆ ಭೇಟಿ ನೀಡಿ ಮಾತುಕತೆ ನಡೆಸಿದ್ದಾರೆ.

ಕುಮಾರಸ್ವಾಮಿ ಅವರು ತಮ್ಮ ನಿವಾಸಕ್ಕೆ ಆಗಮಿಸಿದ ವೇಳೆ ಸುದೀಪ್‌ ಅವರು ತಮ್ಮ ಕೈಯಾರೆ ಅಡುಗೆ ಮಾಡಿ ಬಡಿಸಿದ್ದು ಈ ಭೇಟಿಯ ವಿಶೇಷತೆಯಾಗಿತ್ತು.

ಇತ್ತೀಚೆಗೆ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದ ಕುಮಾರಸ್ವಾಮಿ ಅವರಿಗೆ ಶುಭ ಕೋರಿದ್ದ ಸುದೀಪ್‌, ತಮ್ಮ ಮನೆಗೆ ಬರುವಂತೆ
ಆಹ್ವಾನಿಸಿದ್ದರು. ಅದರಂತೆ ಸೋಮವಾರ ಮಧ್ಯಾಹ್ನ ಕುಮಾರಸ್ವಾಮಿ ಅವರು ಸುದೀಪ್‌ ಮನೆಗೆ ತೆರಳಿದ್ದರು. ಕುಮಾರಸ್ವಾಮಿ ಅವರನ್ನು ಬರಮಾಡಿಕೊಂಡ ಸುದೀಪ್‌ ಅವರು ತಾವೇ ಅಡುಗೆ ಮಾಡಿ ತಮ್ಮ ಕೈಯಾರೆ ಅದನ್ನು ಕುಮಾರಸ್ವಾಮಿ ಅವರಿಗೆ ಬಡಿಸಿದರು.

ಭೋಜನ ಸೇವಿಸುವುದರೊಂದಿಗೆ ಸುಮಾರು ಎರಡು ಗಂಟೆ ಕಾಲ ಇಬ್ಬರೂ ಮಾತುಕತೆ ನಡೆಸಿದರು. ಈ ವೇಳೆ, ಸುದೀಪ್‌ ಅವರ ತಂದೆ ಸರೋವರ್‌ ಸಂಜೀವ್‌, ಜೆಡಿಎಸ್‌ನ ರಮೇಶ್‌ ಬಾಬು, ಮನೋಹರ್‌ ಇದ್ದರು.