ಆಸ್ಪತ್ರೆ ಬೆಡ್ಡಲ್ಲಿ ಜ್ಯೂಸ್‌ ಕುಡಿವ ಜಯಲಲಿತಾ ವಿಡಿಯೋ ರಿಲೀಸ್‌

Team Udayavani, Dec 20, 2017, 12:15 PM IST

ಚೆನ್ನೈ : ಆರ್‌ ಕೆ ನಗರ ಉಪ ಚುನಾವಣೆಗೆ ಒಂದು ದಿನ ಇರುವಂತೆಯೇ ತಮಿಳುನಾಡಿನ ದಿವಂಗತ ಮುಖ್ಯಮಂತ್ರಿ ಜೆ ಜಯಲಲಿತಾ ಅವರು ನಿಧನಹೊಂದುವುದಕ್ಕೆ ಕೆಲವೇ ದಿನ ಮೊದಲು ಚೆನ್ನೈ ಅಪೋಲೋ ಆಸ್ಪತ್ರೆಯಲ್ಲಿ  ಚಿಕಿತ್ಸೆ ಪಡೆಯುತ್ತಿದ್ದಾಗಿನ, ಈ ವರೆಗೂ ಯಾರೂ ನೋಡಿರದ, ವಿಡಿಯೋ ಚಿತ್ರಿಕೆಯೊಂದನ್ನು ಇಂದು ಬುಧವಾರ ಬಿಡುಗಡೆ ಮಾಡಲಾಗಿದೆ.

ಆರ್‌ ಕೆ ನಗರ ವಿಧಾನ ಸಭಾ ಕ್ಷೇತ್ರವನ್ನು ಜಯಲಲಿತಾ ಅವರು ತಮ್ಮ ನಿಧನದ ವರೆಗೂ ಹೊಂದಿದ್ದರು. ವಿಡಿಯೋದಲ್ಲಿ ಜಯಲಲಿತಾ ಅವರು ಆಸ್ಪತ್ರೆಯ ಬೆಡ್‌ ಮೇಲೆ ಕುಳಿತು ಒಂದು ಗ್ಲಾಸ್‌ ಜ್ಯೂಸ್‌ ಹೀರುತ್ತಾ ಟಿವಿ ನೋಡುತ್ತಿರುವುದು ಕಂಡ ಬರುತ್ತದೆ. 

ಈ ವಿಡಿಯೋವನ್ನು ಟಿಟಿವಿ ದಿನಕರನ್‌ ಅವರ ಬೆಂಬಲಿಗ ಪಿ ವೆಟ್ರಿವೇಲ್‌ ಅವರು ಬಿಡುಗಡೆಮಾಡಿದ್ದಾರೆ. 

“ಜಯಲಲಿತಾ ಅವರು ಆಸ್ಪತ್ರೆಯಲ್ಲಿದ್ದಾಗ ಯಾರೂ ಆಕೆಯನ್ನು ಭೇಟಿಯಾಗಿಲ್ಲ ಎನ್ನುವ ಮಾತು ಸುಳ್ಳು. ಇದಕ್ಕೆ ಈ ವಿಡಿಯೋ ಚಿತ್ರಿಕೆಯೇ ಸಾಕ್ಷಿ. ನಾವು ಈ ವಿಡಿಯೋ ಬಿಡುಗಡೆ ಮಾಡಲು ಹಲವು ದಿನಗಳ ಕಾಲ ಕಾದೆವು; ಈಗ ನಮಗೆ ಅನ್ಯ ಮಾರ್ಗವೇ ಇಲ್ಲದೆ ಈಗ ಇದನ್ನು ಬಿಡುಗಡೆ ಮಾಡುತ್ತಿದ್ದೆಯೇ; ತನಿಖಾ ಆಯೋಗ ಈ ತನಕವೂ ನಮ್ಮನ್ನು ಕರೆಸಿಕೊಂಡಿಲ್ಲ; ಕರೆಸಿಕೊಂಡಲ್ಲಿ ನಾವು ಈ ವಿಡಿಯೋವನ್ನು ಅವರಿಗೆ ಸಾಕ್ಷ್ಯವಾಗಿ ಒದಗಿಸಲಿದ್ದೇವೆ’ ಎಂದು ವೆಟ್ರಿವೇಲ್‌ ಹೇಳಿದರು.

72 ದಿನ ಅಪೋಲೋ ಆಸ್ಪತ್ರೆಯಲ್ಲಿದ್ದ ಜಯಲಲಿತಾ ಅವರು 2016ರ ಡಿ.5ರಂದು ನಿಧನ ಹೊಂದಿದ್ದರು. ಆಕೆಯ ಸಾವಿನ ಕಾರಣವನ್ನು ನಿಗೂಢ ಗೊಳಿಸುವ ಹಲವಾರು ಬಗೆಯ ವದಂತಿಗಳು ಕಳೆದ ಒಂದು ವರ್ಷದಿಂದಲೂ ಚಾಲ್ತಿಯಲ್ಲಿವೆ. ಅನೇಕರ ಪ್ರಕಾರ ಜಯಲಲಿತಾ ಸಾವು ಸಹಜವಾದದ್ದು; ನಿಜಕ್ಕಾದರೆ ಆಕೆಯನ್ನು ಕೊಲ್ಲಲಾಗಿತ್ತು’ ಎಂದು ವೇಟ್ರಿವೇಲ್‌ ಆರೋಪಿಸಿದರು. 

ಮೂಲಗಳ ಪ್ರಕಾರ ಆರ್‌ ಕೆ ನಗರ ಉಪ ಚುನಾವಣೆಗೆ ಒಂದ ದಿನ ಇರುವಾಗ ದಿನಕರನ್‌ ಬಣ ಈ ವಿಡಿಯೋ ಚಿತ್ರಿಕೆಯನ್ನು ಬಿಡುಗಡೆ ಮಾಡಿರುವುದು ಮತದಾರರ ಮೇಲೆ ಪ್ರಭಾವ ಬೀರುವ ಉದ್ದೇಶದಿಂದಲೇ ಎನ್ನಲಾಗಿದೆ.