ಕಂಬಳದಲ್ಲಿ ಕೋಣ ಓಡಿಸುವವರನ್ನು ಗುರುತಿಸುವುದು ಹೆಮ್ಮೆ: ವಿಲ್ಫ್ರೆಡ್ 

Team Udayavani, Dec 24, 2017, 10:56 AM IST

ಪಡುಪಣಂಬೂರು: ಕಂಬಳದ ಕೋಣಗಳ ಹಿಂದೆ ಓಡುವುದು ನೋಡಿದಷ್ಟು ಸುಲಭವಲ್ಲ, ನನ್ನ ಚೊಚ್ಚಲ ಓಟದಲ್ಲಿ ಮೈ ಕೈಗೆ ಗಾಯ ಮಾಡಿಕೊಂಡು ಎರಡು ತಿಂಗಳು ಮನೆಯಲ್ಲಿಯೇ ಇದ್ದ ನನಗೆ ಈಗ ಕೋಣಗಳನ್ನು ಓಡಿಸುವವನಾಗಿ ಗುರುತಿಸುತ್ತಿರುವುದು ಹೆಮ್ಮೆಯ ವಿಷಯ ಎಂದು ಹೇಳಿದವರು ಕಂಬಳದ ಕೋಣಗಳ ಓಟಗಾರ ವಿಲ್ಫ್ರೆಡ್  ಕೊಲ್ಲೂರು. ಅವರು ಪಡುಪಣಂಬೂರುವಿನಲ್ಲಿ ನಡೆಯುತ್ತಿರುವ ಮೂಲ್ಕಿ ಸೀಮೆ ಅರಸು ಕಂಬಳದ ಬಾಕಿಮಾರು ಗದ್ದೆಯಲ್ಲಿ ‘ಉದಯವಾಣಿಯ ಸುದಿನ’ದೊಂದಿಗೆ ತಮ್ಮ ಅನುಭವವನ್ನು ಹಂಚಿಕೊಂಡರು.

ಮೂಲ್ಕಿ ಬಳಿಯ ಬಳ್ಕುಂಜೆ ಕೊಲ್ಲೂರು ನಿವಾಸಿಯಾಗಿರುವ ವಿಲ್ಫ್ರೆಡ್ ಅವರು ವೃತ್ತಿಯಲ್ಲಿ ರಿಕ್ಷಾ ಚಾಲಕರು, ಮೂಲ್ಕಿ ಬಸ್‌ ನಿಲ್ದಾಣದಲ್ಲಿ ಚಿರಪರಿಚಿತರು. ಹವ್ಯಾಸಿ ನಾಟಕ ಕಲಾವಿದರು, ಗೃಹರಕ್ಷಕ ದಳದಲ್ಲಿಯೂ ಸೇವೆ ಸಲ್ಲಿಸಿರುವ ಇವರು, ಕಳೆದ 10 ವರ್ಷದಿಂದ ಕಂಬಳದ ಕೋಣ ಓಡಿಸುವ ಓಟಗಾರರಾಗಿದ್ದಾರೆ.

ತಮ್ಮ ಮೊದಲ ಓಟದಲ್ಲಿ ಕೋಣಗಳು ಇವರನ್ನು ಬೀಳಿಸಿದ್ದರಿಂದ ಸುಮಾರು ಎರಡು ತಿಂಗಳು ಮನೆಯಲ್ಲಿಯೇ ಉಳಿಯ ಬೇಕಾಯಿತು ಆದರೂ ಛಲ ಬಿಡದೇ ಕೋಣದ ನೊಗವನ್ನು ಹಿಡಿದು ಈಗ ಕರ್ನಿರೆ ಅಣ್ಣು ಶೆಟ್ಟಿ, ಕವತ್ತಾರು ಎಲಿಯಾಸ್‌ ಪಿಂಟೋ, ಪಟ್ಟೆ ಅಂಗಡಿಗುತ್ತು ಲೋಕನಾಥ ಶೆಟ್ಟಿ, ಧನಂಜಯ ಮಟ್ಟು, ಮಾನಂಪಾಡಿ ಗೋವಿಂದ ಕೋಟ್ಯಾನ್‌ ಇತರ ಮನೆತನ ಕೋಣಗಳನ್ನು ಓಡಿಸುತ್ತಿದ್ದಾರೆ. ವಿಶೇಷವೆಂದರೆ ಮೂಲ್ಕಿ ಸೀಮೆಯ ಸಾಂಪ್ರದಾಯಿಕ ಕಂಬಳವಾಗಿರುವ ಶಿಮಂತೂರು ಬಾವ ಹಾಗೂ ಬಪ್ಪನಾಡು ಬಡಗುಹಿತ್ಲು ದಿ. ಲಿಂಗಪ್ಪ ಪೂಜಾರಿ ಮನೆತನದ ಕೋಣಗಳನ್ನು ಅಧಿಕೃತವಾಗಿ ಇವರೇ ಓಡಿಸುತ್ತಿದ್ದಾರೆ. ತಮ್ಮ ಹತ್ತು ವರ್ಷದ ಅನುಭವದಲ್ಲಿ ಮಧ್ಯೆ ಎರಡು ವರ್ಷ ವಿದೇಶಕ್ಕೆ ಉದ್ಯೋಗಕ್ಕೆ ತೆರಳಿದ್ದಾಗಲೂ ಸಹ ಕಂಬಳದ ಸಮಯದಲ್ಲಿಯೇ ರಜೆಯನ್ನು ಕಳೆದು ಕೋಣಗಳನ್ನು ಓಡಿಸಿದ್ದರು. 

ಪರಂಪರೆ ಉಳಿಯಬೇಕು
ಕಂಬಳಕ್ಕೆ ಸಣ್ಣವನಿರುವಾಗ ಹೆತ್ತವರೊಂದಿಗೆ ತೆರಳುತ್ತಿದ್ದಾಗಲೇ ನಾನೂ ಸಹ ಅವರಂತೆ ಓಡಬೇಕು ಎಂಬ ಆಸೆ ನನ್ನನ್ನೀಗ ಕಂಬಳದ ಓಟಗಾರನನ್ನಾಗಿ ಮಾಡಿದೆ. ಆರಂಭದಲ್ಲಿ ಕೋಣಗಳನ್ನು ಹಿಡಿಯಲು ಹೋಗುತ್ತಿದ್ದೆ. ಆಗ 100 ರೂಪಾಯಿ ಸಿಗುತ್ತಿತ್ತು. ಕಂಬಳದ ಕೋಣ ಹಿಡಿಯುವ ಯಜಮಾನರು ಖುಷಿಯಿಂದ ನೀಡುತ್ತಾರೆ. ನನಗೆ ಹಣ ಮುಖ್ಯವಲ್ಲ ನಮ್ಮ ಪರಂಪರೆ ಜಾತಿ, ಮತ ಭೇದವಿಲ್ಲದೆ ನಿರಂತರವಾಗಿ ನಡೆಯಬೇಕು ಎಂಬ ಆಶಯ ನನ್ನದು.
 –ವಿಲ್ಫ್ರೆಡ್ 
  ಕೋಣಗಳ ಓಟಗಾರ, ಕೊಲ್ಲೂರು