ಅಫ್ಘಾನಿಸ್ತಾನಕ್ಕೂ ಸಿಪೆಕ್‌ ವಿಸ್ತರಣೆ: ಚೀನಾ ತಂತ್ರ

Team Udayavani, Dec 27, 2017, 7:15 AM IST

ಬೀಜಿಂಗ್‌: ಪಾಕಿಸ್ತಾನದ ಜತೆ 45 ಸಾವಿರ ಕೋಟಿ ರೂ. ವೆಚ್ಚದಲ್ಲಿ ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್‌ (ಸಿಪಿಇಸಿ) ನಿರ್ಮಾಣಕ್ಕೆ ಚೀನಾ ಸಹಿ ಹಾಕಿದ್ದು ಹಳೆಯ ಸಂಗತಿ. ಅದನ್ನೀಗ ಅಫ್ಘಾನಿಸ್ತಾನಕ್ಕೆ ವಿಸ್ತರಿಸಲು ಚೀನಾ ಮುಂದಾಗಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ವಿರುದ್ಧ ಚೀನಾ ನಡೆಸುತ್ತಿರುವ ಕುತಂತ್ರ ಇದಾಗಿದೆ. ಇಂಥ ಪ್ರಯತ್ನದ ಮೂಲಕ “ಒನ್‌ ಬೆಲ್ಟ್ ಒನ್‌ ರೋಡ್‌; ‘ ಯೋಜನೆಯನ್ನು ಐರೋಪ್ಯ ಒಕ್ಕೂಟದಿಂದಾಚೆಗೆ ವಿಸ್ತರಿಸುವ ಮಹತ್ವಾಕಾಂಕ್ಷೆಯನ್ನೂ ಚೀನಾ ಹೊಂದಿದೆ. 

ಈ ನಿಟ್ಟಿನಲ್ಲಿ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ವಿದೇಶಾಂಗ ಸಚಿವರ ಜತೆಗೆ ಕೂಡ ಮಾತುಕತೆ ನಡೆಸಿದೆ. ಅಲ್ಲಿನ ವಿದೇಶಾಂಗ ಸಚಿವ ವಾಂಗ್‌ ಇ ಎರಡೂ ದೇಶಗಳ ವಿದೇಶಾಂಗ ಸಚಿವರ ಜತೆ ಮಾತುಕತೆ ನಡೆಸಿದ್ದಾರೆ. ಯೋಜನೆ ವಿಸ್ತಾರದಿಂದ ಅಫ್ಘಾನಿಸ್ತಾನ ಮತ್ತು ಪಾಕಿಸ್ತಾನ ಮಾತ್ರವಲ್ಲದೆ ಪ್ರಾದೇಶಿಕವಾಗಿ ಕೂಡ ಅಭಿವೃದ್ಧಿ ಹೊಂದಲು ಸಾಧ್ಯ ಎಂಬಂತೆ ಮನವರಿಕೆ ಮಾಡಿದ್ದಾರೆ. 1947ರಿಂದ ಈಚೆಗೆ ಕೂಡ ಚೀನಾ ಪಾಕ್‌ ಮತ್ತು ಅಫ್ಘಾನಿಸ್ತಾನದ ಜತೆಗೆ ಉತ್ತಮ ಬಾಂಧವ್ಯ ಹೊಂದಲು ಮುಂದಾಗಿದೆ. ತಾಲಿ ಬಾನ್‌ ಉಗ್ರರ ಕರಾಳ ಹಸ್ತಕ್ಕೆ ಸಿಕ್ಕಿ ನಲುಗಿರುವ ಅಫ್ಘಾನಿಸ್ತಾನಕ್ಕೆ ಅಭಿವೃದ್ಧಿ ಕಾಮಗಾರಿಗಳೂ ಅಗತ್ಯ ಎಂದಿದ್ದಾರೆ ಚೀನಾ ಸಚಿವ. ಇಬ್ಬರಿಗೂ ಅನುಕೂಲವಾಗುವಂತೆ ಯೋಜನೆ ಜಾರಿಯಾಗಲಿ ಎಂಬ ಆಶಯ ನಮ್ಮದು ಎಂದಿದ್ದಾರೆ. ಈ ಬಗ್ಗೆ 2015ರಲ್ಲಿ ನಡೆದಿದ್ದ ಮಾತುಕತೆ ಮುರಿದು ಬಿದ್ದಿತ್ತು.

ಮತ್ತೂಂದು ಪ್ರಮುಖ ಬೆಳವಣಿಗೆಯಲ್ಲಿ ಟಿಬೆಟ್‌ನಲ್ಲಿ ಭೂಕಂಪ ಉಂಟಾಗಿ ಬ್ರಹ್ಮಪುತ್ರ ನದಿ ಪಾತ್ರದಲ್ಲಿ ಕೃತಕ ಕೆರೆಗಳು ಉಂಟಾಗಿವೆ. ಈ ಬಗ್ಗೆ ಭಾರತ ಸರ್ಕಾರಕ್ಕೆ ಮಾಹಿತಿ ನೀಡುವುದಾಗಿ ಚೀನಾ ಹೇಳಿದೆ.