ದೇವೇಗೌಡರೇ ಲಾಲುರನ್ನು ಮೇವು ಹಗರಣದಲ್ಲಿ ಸಿಲುಕಿಸಿದ್ದು: ಮಿಶ್ರಾ

Team Udayavani, Dec 28, 2017, 7:05 AM IST

ಪಾಟ್ನಾ: “ಮಾಜಿ ಪ್ರಧಾನಿ ದೇವೇಗೌಡರೇ ಮೇವು ಹಗರಣದಲ್ಲಿ ಬಿಹಾರದ ಮಾಜಿ ಸಿಎಂ ಲಾಲು ಪ್ರಸಾದ್ ಯಾದವ್ರನ್ನು ಸಿಲುಕಿಸಿದ್ದು’. ಹೀಗೆಂದು ಆರೋಪ ಮಾಡಿದ್ದು ಕಾಂಗ್ರೆಸ್‌ ನಾಯಕ ಡಾ.ಜಗನ್ನಾಥ್‌ ಮಿಶ್ರಾ. ಈ ಬಗ್ಗೆ ಬಿಜೆಪಿ ವಿರುದ್ಧ ಆರೋಪ ಮಾಡುವುದು ಸರಿಯಲ್ಲ ಎಂದೂ ಅವರು ಹೇಳಿದ್ದಾರೆ.

ಬುಧವಾರ ಪಾಟ್ನಾದಲ್ಲಿ ಮಾತನಾಡಿದ ಅವರು ಮೇವು ಹಗರಣ ಬೆಳಕಿಗೆ ಬಂದು ರಾಷ್ಟ್ರ ಮಟ್ಟದಲ್ಲಿ ಸುದ್ದಿಯಾಗುವ ಸಂದರ್ಭದಲ್ಲಿ ಎಚ್‌.ಡಿ.ದೇವೇಗೌಡ ಮತ್ತು  ಐ.ಕೆ.ಗುಜ್ರಾಲ್‌ ಪ್ರಧಾನಮಂತ್ರಿ ಗಳಾಗಿದ್ದರು. ಹೀಗಾಗಿ ಲಾಲು ಮತ್ತು ಅವರ ಕುಟುಂಬ ಸದಸ್ಯರು ಈ ಬಗ್ಗೆ ಬಿಜೆಪಿ ವಿರುದ್ಧ ಆರೋಪಗಳನ್ನು ಮಾಡು ತ್ತಿರುವುದು ಸರಿಯಲ್ಲ ಎಂದಿದ್ದಾರೆ. 

ಕಾಂಗ್ರೆಸ್‌ ಅಧ್ಯಕ್ಷರಾಗಿದ್ದ ದಿ.ಸೀತಾರಾಮ್‌ ಕೇಸರಿ ಅವರ ಒತ್ತಾಸೆಯ ಮೇರೆಗೆ ಹಗರಣದಲ್ಲಿ ತಮ್ಮ ಹೆಸರನ್ನೂ ಸೇರಿಸಲಾಯಿತು ಎಂದು ಆರೋಪ ಮಾಡಿದ್ದಾರೆ. ಹೀಗಾಗಿ ದಶಕ ಗಳ ಹಿಂದಿನ ಬಹುಕೋಟಿ ಹಗರಣಕ್ಕೆ ಹೊಸತೊಂದು ಟ್ವಿಸ್ಟ್‌ ಸಿಕ್ಕಿದಂತಾಗಿದೆ. ರಾಂಚಿಯಲ್ಲಿರುವ ಸಿಬಿಐನ ವಿಶೇಷ ಕೋರ್ಟ್‌ ಆರ್‌ಜೆಡಿ ನಾಯಕನನ್ನು ತಪ್ಪಿತಸ್ಥ ಎಂದು ಪರಿಗಣಿಸಿದ್ದರಿಂದ ಅವರು ಈಗ ಕಾರಾಗೃಹದಲ್ಲಿದ್ದಾರೆ.