ಕೊಹ್ಲಿ-ಅನುಷ್ಕಾ ಆರತಕ್ಷತೆಯಲ್ಲಿ ಕುಂಬ್ಳೆ ಭಾಗಿ

Team Udayavani, Dec 28, 2017, 7:00 AM IST

ಮುಂಬೈ: ವಿರಾಟ್‌ ಕೊಹ್ಲಿ- ಅನಿಲ್‌ ಕುಂಬ್ಳೆ ನಡುವೆ ಮನಸ್ತಾಪ ಇದ್ದದ್ದು ಎಲ್ಲರಿಗೂ ಗೊತ್ತಿರುವ ವಿಷಯ. ಆದರೆ ಮುಂಬೈನಲ್ಲಿ ನಡೆದ ವಿರಾಟ್‌ ಕೊಹ್ಲಿ ಮತ್ತು ಅನುಷ್ಕಾ ಶರ್ಮ ಆರತಕ್ಷತೆ ಕಾರ್ಯಕ್ರಮದಲ್ಲಿ ಭಾರತ ತಂಡದ ಮಾಜಿ ಕೋಚ್‌ ಅನಿಲ್‌ ಕುಂಬ್ಳೆ ಭಾಗಿಯಾದರು. ಇವರೊಂದಿಗೆ ಇವರ ಪತ್ನಿ ಚೇತನಾ ಕೂಡ ಇದ್ದರು. ಇದು ಹಲವರಿಗೆ ಅಚ್ಚರಿ ಮೂಡಿಸಿದ್ದು, ಟ್ವೀಟರ್‌ನಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.

ಕೋಚ್‌ ಸ್ಥಾನದಿಂದ ಕುಂಬ್ಳೆ ಕೆಳಗಿಳಿಯಲು ಕೊಹ್ಲಿಯೇ ಕಾರಣ ಎನ್ನಲಾಗಿತ್ತು. ಕುಂಬ್ಳೆ ಫೇಸ್‌ಬುಕ್‌ನಲ್ಲಿ ಬಹಿರಂಗ ಅಸಮಾಧಾನ ಹೊರಹಾಕಿದ್ದರು ಕೂಡ. ಬಳಿಕ ಇಬ್ಬರ ನಡುವಿನ ಸಂಬಂಧ ತೀರಾ ಹದಗೆಟ್ಟಿತ್ತು. ಇಬ್ಬರು ಮಾತನ್ನು ಆಡುವುದಿಲ್ಲ ಅನ್ನುವ ಸುದ್ದಿಗಳು ಕೂಡ ಹರಿದಾಡುತ್ತಿದ್ದವು. ಆದರೆ ಆರತಕ್ಷತೆ ಕಾರ್ಯಕ್ರಮದಲ್ಲಿ ಕುಂಬ್ಳೆ ತಮ್ಮ ಪತ್ನಿಯ ಜತೆ ಆಗಮಿಸುವ ಮೂಲಕ ಎಲ್ಲ ಗಾಸಿಪ್‌ಗಳಿಗೆ ತೆರೆ ಎಳೆದಿದ್ದಾರೆ.

ಲಂಕಾ ಅಭಿಮಾನಿ ಜತೆ ಸೆಲ್ಫಿ !
ಮುಂಬೈನಲ್ಲಿ ನಡೆದ ಕೊಹ್ಲಿ-ಅನುಷ್ಕಾ ಆರತಕ್ಷತೆಯಲ್ಲಿ ಶ್ರೀಲಂಕಾದ ಕ್ರಿಕೆಟ್‌ ಅಭಿಮಾನಿ ಗಯಾನ್‌ ಸೇನನಾಯಕೆ ವಿಶೇಷ ಅತಿಥಿಯಾಗಿ ಆಗಮಿಸಿದ್ದರು. ಸ್ವತಃ ವಿರಾಟ್‌ ಕೊಹ್ಲಿ ಅಭಿಮಾನಿಯನ್ನು ಆಹ್ವಾನಿಸಿದ್ದರು. ಕ್ರಿಕೆಟ್‌ನ ಸೂಪರ್‌ ಫ್ಯಾನ್‌ ಎಂದೇ ಖ್ಯಾತಿ ಪಡೆದಿರುವ ಗಯಾನ್‌ ವಿರಾಟ್‌ ಕೊಹ್ಲಿಯ ದೊಡ್ಡ ಅಭಿಮಾನಿ. ಗಯಾನ್‌ ಮೊದಲ ಬಾರಿಗೆ ಕೊಹ್ಲಿಯನ್ನು ಭೇಟಿ ಮಾಡಿದ್ದು, 2007ರಲ್ಲಿ ನಡೆದ 19 ವರ್ಷದೊಳಗಿನ ವಿಶ್ವಕಪ್‌ ಸಂದರ್ಭದಲ್ಲಿ. ಆನಂತರ ಗಯಾನ್‌ ನಿರಂತರವಾಗಿ ಕೊಹ್ಲಿಯ ಸಂಪರ್ಕದಲ್ಲಿದ್ದರು. ಲಂಕಾಗೆ ಹೋದಾಗೆಲ್ಲ ಕೊಹ್ಲಿ ಈ ಅಭಿಮಾನಿಯನ್ನು ಭೇಟಿ ಮಾಡುತ್ತಿದ್ದರು. ಇದೇ ಆತ್ಮೀಯತೆಯ ಹಿನ್ನೆಲೆಯಲ್ಲಿ ಕೊಹ್ಲಿ ಗಯಾನ್‌ಗೆ ಆಹ್ವಾನ ನೀಡಿದ್ದರು. ಆರತಕ್ಷತೆಗೆ ಬಂದ ಗಯಾನ್‌ ಕೊಹ್ಲಿ ದಂಪತಿ ಜತೆ, ಭಾರತೀಯ ಕ್ರಿಕೆಟಿಗರ ಜತೆ ಫೋಟೋ ತೆಗೆಸಿಕೊಂಡಿದ್ದಾರೆ. ಕ್ರಿಕೆಟ್‌ ದಂತಕಥೆ ಸಚಿನ್‌ ತೆಂಡುಲ್ಕರ್‌ ಜತೆ ಸೆಲ್ಫಿ
ತೆಗೆಸಿಕೊಂಡು ಖುಷಿ ಪಟ್ಟಿದ್ದಾರೆ.