ಪಂಡಿತ್‌ ರಾಜನ್‌ ಸಾಜನ್‌ ಮಿಶ್ರಾಗೆ ಆಳ್ವಾಸ್‌ ವಿರಾಸತ್‌ ಪ್ರಶಸ್ತಿ

Team Udayavani, Dec 28, 2017, 12:07 PM IST

ಮೂಡಬಿದಿರೆ: ಪ್ರಸಿದ್ಧ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಗಾಯಕ ಸಹೋದರರಾದ ಪಂಡಿತ್‌ ರಾಜನ್‌ ಸಾಜನ್‌ ಮಿಶ್ರಾ ಅವರನ್ನು “ಆಳ್ವಾಸ್‌ ವಿರಾಸತ್‌ 2018′ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ ಎಂದು ಆಳ್ವಾಸ್‌ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ| ಎಂ. ಮೋಹನ ಆಳ್ವ ಪತ್ರಿಕಾಗೋಷ್ಠಿಯಲ್ಲಿ 
ಪ್ರಕಟಿಸಿದರು.

ಜ. 12ರಂದು ಪ್ರಾರಂಭವಾಗಲಿರುವ 24ನೇ ವರ್ಷದ “ಆಳ್ವಾಸ್‌ ವಿರಾಸತ್‌ -2018′ ಮೂರು ದಿನಗಳ ರಾಷ್ಟ್ರೀಯ ಸಾಂಸ್ಕೃತಿಕ ಉತ್ಸವದಲ್ಲಿ 1 ಲಕ್ಷ ರೂ. ಗೌರವಧನ ಸಹಿತ ಪ್ರಶಸ್ತಿ ಪ್ರದಾನ ಮಾಡಲಾಗುವುದು. ಬನಾರಸ್‌ ಘರಾನಾ ಸಂಗೀತ ವಿದ್ವಾಂಸ ಪಂ| ಹನುಮಾನ್‌ ಪ್ರಸಾದ್‌ ಹಾಗೂ ಮಾವ ಪಂ| ಗೋಪಾಲ್‌ ಮಿಶ್ರಾ ಅವರ ಗರಡಿಯಲ್ಲಿ ಪಳಗಿರುವ ರಾಜನ್‌ ಸಾಜನ್‌ ಮಿಶ್ರಾ ಸಹೋದರರು ಪಾರಂಪರಿಕ ಸಂಗೀತದೊಂದಿಗೆ ಸಮಕಾಲೀನ ಸಂಗೀತ ರಸಧಾರೆಗಳ ಬೆಸೆಯುವಿಕೆಯಿಂದ ಪ್ರೇಕ್ಷಕರಲ್ಲಿ ಹೊಸ ಅನುಭೂತಿ ಮೂಡಿಸುವಲ್ಲಿ ಸಾರ್ಥಕತೆ ಕಂಡವರು. ಸಂಗೀತ ಕ್ಷೇತ್ರದ ಸಾಧನೆಗಾಗಿ ಪದ್ಮಭೂಷಣ, ಸಂಗೀತ ನಾಟಕ ಅಕಾಡೆಮಿ, ತಾನ್‌ಸೇನ್‌, ಓಂಕಾರ್‌ನಾಥ್‌ ಥಾಕುರ್‌, ಕಾಶಿ ಗೌರವ, ಯಶ ಭಾರತಿಯೇ ಮೊದಲಾದ ಪ್ರಶಸ್ತಿಗಳೊಂದಿಗೆ ವಿಶೇಷವಾಗಿ ಅಮೆರಿಕದ ಬಾಲ್ಟಿಮೋರಾ ಪಟ್ಟಣದ ಗೌರವ ಪೌರ ಪ್ರತಿನಿಧಿತ್ವವೂ ಒಲಿದು ಬಂದಿದೆ ಎಂದು ಅವರು ತಿಳಿಸಿದರು.