ಉಪರಾಷ್ಟ್ರಪತಿಗೂ ಮೋಸಮಾಡಿದ್ದ  ಸುಳ್ಳು ಜಾಹೀರಾತು!

Team Udayavani, Dec 30, 2017, 1:04 PM IST

ನವದೆಹಲಿ: ಸುಳ್ಳು ಜಾಹೀರಾತುಗಳಿಂದ ಉಪ ರಾಷ್ಟ್ರಪತಿಯೇ ಮೋಸ ಹೋಗಿದ್ದಾರೆ! ಅಚ್ಚರಿಯಾದರೂ ಇದು ಸತ್ಯ. ಖುದ್ದು ವೆಂಕಯ್ಯ ನಾಯ್ಡು ಅವರೇ  ರಾಜ್ಯಸಭೆಯಲ್ಲಿ ಈ ವಿಚಾರ ತಿಳಿಸಿ ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾರೆ. ಉಪರಾಷ್ಟ್ರಪತಿಯಾದ ಹೊಸತರಲ್ಲಿ
ತೂಕ ಇಳಿಸುವ ಮಾತ್ರೆಗಳ ಜಾಹೀರಾತೊಂದನ್ನು ನೋಡಿದ್ದರಂತೆ. ತಕ್ಷಣವೇ ಅವನ್ನು ಕೊಳ್ಳಲು ಮುಂದಾದ ಅವರು, ಅವುಗಳಿಗೆ ನಿಗದಿಗೊಳಿಸಲಾಗಿದ್ದ 1000 ರೂ.ಗಳನ್ನು ಪಾವತಿಸಿದರಂತೆ. ಕೆಲವೇ ದಿನಗಳಲ್ಲಿ ಅವರಿಗೆ ಇ-ಮೇಲ್‌ ಕಳುಹಿಸಿದ ಆ ಕಂಪನಿಯು, ತೂಕವನ್ನು ಕೆಲವೇ ದಿನಗಳಲ್ಲಿ ಇಳಿಸುವ ಮ್ಯಾಜಿಕ್‌ ಮಾತ್ರೆಗಳೂ ಇದ್ದು ಅವಕ್ಕೆ ಮತ್ತೆ 1000 ರೂ. ಪಾವತಿಸಬೇಕು.

ಮ್ಯಾಜಿಕ್‌ ಮಾತ್ರೆಗಳಿಗೆ ಹಣ ಪಾವತಿಸಿದರೆ ಮಾತ್ರ ಈ ಹಿಂದೆ ಆರ್ಡರ್‌ ಮಾಡಿರುವ ಮಾತ್ರೆಗಳನ್ನು ಕಳುಹಿಸಲಾಗುವುದು ಎಂದು ಬರೆದಿತ್ತಂತೆ. ಇದರಿಂದ ಅನುಮಾನಗೊಂಡ ನಾಯ್ಡು, ಗ್ರಾಹಕ ವ್ಯವಹಾರಗಳ ಸಚಿವ ರಾಮ್‌ ವಿಲಾಸ್‌ ಪಾಸ್ವಾನ್‌ ಅವರಿಗೆ ಪತ್ರ ಬರೆದು ತನಿಖೆ ನಡೆಸುವಂತೆ ಕೋರಿದ್ದರಂತೆ. ಆಗ, ನಡೆದ ತನಿಖೆಯಲ್ಲಿ ಆ ಕಂಪನಿ ಭಾರತದ್ದಾಗಿರದೇ ಅಮೆರಿಕದ್ದು ಎಂದು ಗೊತ್ತಾಯಿತಂತೆ! ಇದನ್ನು ಹೇಳಿದ ನಾಯ್ಡು, ಇಂಥ ಸುಳ್ಳು ಜಾಹೀರಾತುಗಳನ್ನು ತಪ್ಪಿಸಲು ತುರ್ತು ಕ್ರಮ ಕೈಗೊಳ್ಳಬೇಕೆಂದು ಸೂಚಿಸಿದ್ದಾರೆ.