ನೀರು ಪೂರೈಸಲು ಆಗ್ರಹಿಸಿ ಧರಣಿ

Team Udayavani, Dec 31, 2017, 12:55 PM IST

ಹಟ್ಟಿ ಚಿನ್ನದ ಗಣಿ: ಕುಡಿಯುವ ನೀರು ಪೂರೈಸಲು ಆಗ್ರಹಿಸಿ ಕರವೇ ಶಿವರಾಮೇಗೌಡ ಬಣ ಕಾರ್ಯಕರ್ತರು ಶನಿವಾರ ಹಟ್ಟಿ ಗ್ರಾಮದ ಬಸ್‌ ನಿಲ್ದಾಣದ ಬಳಿ ಸಾಂಕೇತಿಕ ಧರಣಿ ನಡೆಸಿದರು.

ಈ ವೇಳೆ ಮಾತನಾಡಿದ ಕರವೇ ಜಿಲ್ಲಾಧ್ಯಕ್ಷ ಅಶೋಕ ಜೈನ, ಸ್ತಳೀಯ ಗ್ರಾಮ ಪಂಚಾಯತಿ, ತಾಲೂಕು ಮತ್ತು ಜಿಲ್ಲಾ ಪಂಚಾಯತಿ ನಿರ್ಲಕ್ಷ್ಯದಿಂದ ಗ್ರಾಮದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉಂಟಾಗಿದೆ. ಸಾರ್ವಜನಿಕರು ಕುಡಿಯುವ ನೀರಿಗಾಗಿ ಹಾಹಾಕಾರ ಪಡುವಂತಾಗಿದೆ. ಜಿಲ್ಲಾ ಪಂಚಾಯ್ತಿ ವತಿಯಿಂದ ನೀಡುತಿರುವ ಒಂದು ಟ್ಯಾಂಕರ್‌ ನೀರಿನಿಂದ ದಿನಕ್ಕೆ ಒಂದು ವಾರ್ಡ್‌ಗೆ ಸಾಕಾಗುವುದಿಲ್ಲ.

ಇದರಿಂದ ಕುಡಿಯುವ ನೀರಿನ ತೊಂದರೆ ಉಂಟಾಗಿದ್ದು, ರಾತ್ರಿ ವೇಳೆಯಲ್ಲಿ ಹಟ್ಟಿ ಕ್ಯಾಂಪಿನಿಂದ ಮಹಿಳೆಯರು, ಮಕ್ಕಳು, ಸೈಕಲ್‌ ಮೂಲಕ ನೀರು ತಂದು ಕುಡಿಯುವ ಪರಿಸ್ಥಿತಿ ಎದುರಾಗಿದೆ ಎಂದು ದೂರಿದರು. ಮನವಿ ಸ್ವೀಕರಿಸಿದ ಕಾ.ನಿ. ಅಧಿಕಾರಿ ಅಮರೇಶ ಮೇಲಧಿಕಾರಿಗಳ ಗಮನಕ್ಕೆ ತಂದು ಸಮಸ್ಯೆ ಬಗೆಹರಿಸುವುದಾಗಿ ಹೇಳಿದರು. 

ಶ್ರೀನಿವಾಸ್‌ (ಮಧುಶ್ರೀ), ಬಸವರಾಜ ಕಳ್ಳಿಮಠ, ಮೌನೇಶ ಕಾಕಾನಗರ, ಎನ್‌.ಸ್ವಾಮಿ, ನರಸಪ್ಪ ಯಾದವ, ರಾಮಾಂಜನೇಯ, ಸೂರಿ, ರಾಜು, ನಿಂಗರಾಜು, ಮಲ್ಲಿಕಾರ್ಜುನ ಚಿತ್ರನಾಳ, ನಾಗಪ್ಪ ವಂದಲಿ, ಆನಂದಯ್ಯಸ್ವಾಮಿ ಕಳ್ಳಿಮಠ ಇತರರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.