ತಾಜ್‌ ಪ್ರವಾಸಿಗರಿಗೆ ಮಿತಿ, ದಿನಕ್ಕೆ 40 ಸಾವಿರ ಮಂದಿಗೆ ಅವಕಾಶ

Team Udayavani, Jan 4, 2018, 6:45 AM IST

ಹೊಸದಿಲ್ಲಿ: ವಾರಾಂತ್ಯ ಮತ್ತು ರಜಾದಿನಗಳಲ್ಲಿ ವಿಶ್ವಪ್ರಸಿದ್ಧ ತಾಜ್‌ಮಹಲ್‌ ವೀಕ್ಷಣೆಗೆ ಅಪಾರ ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸುವುದನ್ನು ತಡೆಯಲು, ದಿನವೊಂದಕ್ಕೆ ಪ್ರವಾಸಿಗರ ಸಂಖ್ಯೆಯನ್ನು ಮಿತಿಗೊಳಿಸಲು ಕೇಂದ್ರ ಸರಕಾರ ಚಿಂತನೆ. ದಿನಕ್ಕೆ 40 ಸಾವಿರ ಪ್ರವಾಸಿಗರನ್ನಷ್ಟೇ ಒಳಗೆ ಬಿಡಲು ನಿರ್ಧರಿಸುವ ಸಾಧ್ಯತೆಗಳಿವೆ. ಈ ಸಂಬಂಧ ಪುರಾತತ್ವ ಇಲಾಖೆ ಈಗಾಗಲೇ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ. ಪ್ರವಾಸಿಗರ ಸಂಖ್ಯೆಯನ್ನು ಮಿತಿಗೊಳಿಸುವುದರ ಜತೆಗೆ, ಒಬ್ಬ ಪ್ರವಾಸಿಯು ತಾಜ್‌ ಮಹಲ್‌ ವೀಕ್ಷಿಸುವ ಅವಧಿಯನ್ನೂ ಮೂರು ಗಂಟೆಗೆ ಸೀಮಿತಗೊಳಿಸುವ ಸಾಧ್ಯತೆಯಿದೆ. ಜ.20ರಿಂದ ಹೊಸ ನಿರ್ಧಾರ ಜಾರಿಯಾಗಲಿದೆ. ಗಮನಾರ್ಹ ಅಂಶವೆಂದರೆ ವಿದೇಶೀಯರಿಗೆ ಯಾವುದೇ ರೀತಿಯ ಮಿತಿ ಹೇರಲಾಗಿಲ್ಲ.

ಕಳೆದ ಗುರುವಾರ ತಾಜ್‌ಮಹಲ್‌ ವೀಕ್ಷಣೆಗೆ ಅಪಾರ ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸಿದ್ದರಿಂದ, ಕಾಲು¤ಳಿತ ಉಂಟಾಗಿತ್ತು. ಇದರಿಂದಾಗಿ ಒಂದು ಪ್ರವೇಶದ್ವಾರದಲ್ಲಿ ಐವರು ಗಾಯಗೊಂಡಿದ್ದರು. ಈ ಹಿನ್ನೆಲೆಯಲ್ಲಿ ಪುರಾತತ್ವ ಇಲಾಖೆ ಸ್ಥಳಕ್ಕೆ ಆಗಮಿಸಿ ಪರಿಸ್ಥಿತಿ ಪರಿಶೀಲನೆ ನಡೆಸಿದ್ದು,  ಸ ರ ಕಾ ರಕ್ಕೆ ಈ ಸಲಹೆ ನೀಡಿದೆ. ಸಾಮಾನ್ಯವಾಗಿ 35 ರಿಂದ 40 ಸಾವಿರ ಜನರು ತಾಜ್‌ಮಹಲ್‌ಗೆ ಆಗಮಿಸುತ್ತಾರೆ. ಆದರೆ ರಜಾ ದಿನಗಳು ಮತ್ತು ವಾರಾಂತ್ಯದಲ್ಲಿ ಪ್ರವಾಸಿಗರ ಸಂಖ್ಯೆ ಅತಿ ಹೆಚ್ಚಾಗುತ್ತದೆ. ಕೆಲವು ಬಾರಿ 60 ರಿಂದ 70 ಸಾವಿರ ಜನರು ಇಲ್ಲಿಗೆ ಆಗಮಿಸುತ್ತಾರೆ. ಸದ್ಯ ಪ್ರವಾಸಿಗರ ಸಂಖ್ಯೆಯಲ್ಲಿ ಯಾವ ಮಿತಿಯೂ ಇಲ್ಲ. ಅಷ್ಟೇ ಅಲ್ಲ, ಒಮ್ಮೆ ಪ್ರವೇಶ ದ್ವಾರದಲ್ಲಿ ಟಿಕೆಟ್‌ ಪಡೆದು ಒಳಪ್ರವೇಶಿಸಿದರೆ ಇಡೀ ದಿನಬೇಕಾದರೂ ಪ್ರವಾಸಿಗರು ಇರಬಹುದಾಗಿದೆ.