ವಿಂಡೋ ಸೀಟಿನ ವಂಡರ್‌ ಜಗತ್ತು

Team Udayavani, Jan 6, 2018, 2:47 PM IST

 ರೈಲು ಪ್ರಯಾಣದಲ್ಲಿ ಕಿಟಕಿಯಾಚೆಗಿನ ಪ್ರಪಂಚ ಎಷ್ಟು ವೈವಿಧ್ಯತೆಯಿಂದ ಕೂಡಿರುತ್ತದೋ, ಎಷ್ಟು ಆಕರ್ಷಕವಾಗಿರುತ್ತದೋ ರೈಲಿನ ಒಳಗೂ ಅಂಥದ್ದೇ ವಾತಾವರಣವನ್ನು ನಾವು ಕಾಣಬಹುದು. ಅದನ್ನು ಕಟ್ಟಿ ಕೊಡುವ ಸಲುವಾಗಿಯೇ ಶುರುವಾದ ಒಂದು ಫೋಟೋಗ್ರಫಿ ಪ್ರಾಜೆಕ್ಟ್ ಇನ್‌ಸ್ಟಗ್ರಾಂನಲ್ಲಿದೆ. ಅದರ ಹೆಸರು “ವಿಂಡೋ ಸೀಟ್‌ ಪ್ರಾಜೆಕ್ಟ್’…

ಎಂದಾದರೂ ರೈಲಿನಲ್ಲಿ ಪ್ರಯಾಣಿಸಿದ್ದೀರಾ? ರೈಲ್ವೇ ಸ್ಟೇಷನ್‌ಗೆ ಭೇಟಿ ನೀಡಿದ್ದೀರಾ? ಕಂಡಿದ್ದರೆ ನಿಮಗೆ ಅಲ್ಲಿನ ಪ್ರಪಂಚದ ಕುರಿತು ತಿಳಿದೇ ಇರುತ್ತೆ. ಕವಿ ಕೆ.ಎಸ್‌. ನರಸಿಂಹಸ್ವಾಮಿ ಅವರ “ಎಲ್ಲಿದ್ದೀಯೇ ಮೀನಾ?’ ಕವಿತೆಯಲ್ಲಿ ಕಿಟಕಿಯಲ್ಲಿ ಬಳಿ ಕುಳಿತ ಮಗಳ ಜೊತೆ ಅವಳನ್ನು ಬೀಳ್ಕೊಡಲು ಬಂದ ತಾಯಿಯ ಚಿತ್ರಣವಿತ್ತು. ಕಿಟಕಿಯಿಂದಲೇ ಮಗಳ ತೊಡೆಯ ಮೇಲಿದ್ದ ಮೊಮ್ಮಗಳನ್ನು ನೋಡುತ್ತಾ ಮಗಳ ಜೊತೆ ರೈಲು ಹೋಗುವ ತನಕ ಸಂಭಾಷಿಸುವ ಕವಿತೆಯ ದೃಶ್ಯ ಅತಿ ಸಾಮಾನ್ಯವಾದುದು. ಇದೊಂದೇ ಅಲ್ಲ, ಇನ್ನೂ ಹತ್ತು ಹಲವು ಆಪ್ತ ಕತೆಗಳನ್ನು, ಚಿತ್ರಣಗಳನ್ನು ರೈಲು ನಿಲ್ದಾಣ ನಮ್ಮ ಮುಂದಿಡುತ್ತದೆ. ನಿಜವಾದ ಭಾರತವನ್ನು ನೋಡೋಕೆ ರೈಲು ಪ್ರಯಾಣ ಅತ್ಯುತ್ತಮ ದಾರಿ ಎಂದು ಹೇಳಿದವರು ಬೇರಾರೂ ಅಲ್ಲ, ಮಹಾತ್ಮ ಗಾಂಧಿ.

ಪ್ರಪಂಚದಲ್ಲೇ ಅತಿ ದೊಡ್ಡ ರೈಲ್ವೇ ಸಂಪರ್ಕವನ್ನು ಹೊಂದಿರುವ ದೇಶ ನಮ್ಮದು. ದಿನವೊಂದರಲ್ಲೇ ಪ್ರಯಾಣಿಸುವ ರೈಲುಗಳು 12,500. ನಮ್ಮ ದೇಶದಲ್ಲಿ ಹತ್ತಿರತ್ತಿರ ಎರಡೂವರೆ ಕೋಟಿಯಷ್ಟು ಮಂದಿ ಪ್ರತಿದಿನ ರೈಲು ಹತ್ತುತ್ತಾರೆ. ರೈಲು ಪ್ರಯಾಣದಲ್ಲಿ ಕಿಟಕಿಯಾಚೆಗಿನ ಪ್ರಪಂಚ ಎಷ್ಟು ವೈವಿಧ್ಯತೆಯಿಂದ ಕೂಡಿರುತ್ತದೋ, ಎಷ್ಟು ಆಕರ್ಷಕವಾಗಿರುತ್ತದೋ ರೈಲಿನ ಒಳಗೂ ಅಂಥದ್ದೇ ವಾತಾವರಣವನ್ನು ನಾವು ಕಾಣಬಹುದು. ಅದನ್ನು ಕಟ್ಟಿ ಕೊಡುವ ಸಲುವಾಗಿಯೇ ಶುರುವಾದ ಒಂದು ಫೋಟೋಗ್ರಫಿ ಪ್ರಾಜೆಕ್ಟ್ ಇನ್‌ಸ್ಟಗ್ರಾಂನಲ್ಲಿದೆ. ಅದರ ಹೆಸರು “ವಿಂಡೋ ಸೀಟ್‌ ಪ್ರಾಜೆಕ್ಟ್’.

ಏನಿದು ಪ್ರಾಜೆಕ್ಟ್?
ರೈಲು ಪ್ರಯಾಣದ ಸಂದರ್ಭದಲ್ಲಿ ತೆಗೆಯಲಾದ ಆಸಕ್ತಿಕರ ಫೋಟೋಗಳನ್ನು ಇಲ್ಲಿ ಅಪ್‌ಲೋಡ್‌ ಮಾಡಲಾಗುತ್ತದೆ. ಅದರ ಜೊತೆಗೊಂದು ಚೆಂದದ ಅಡಿಬರಹವೊಂದನ್ನೂ ನೀಡಿರುತ್ತಾರೆ. ಈ ಫೋಟೋಗಳನ್ನು ನೋಡುತ್ತಿದ್ದರೆ, ಯಾರಿಗೇ ಆದರೂ ರೈಲುಪ್ರಯಾಣ ಮಾಡಬೇಕೆಂಬ ಆಸೆ ಮೂಡದಿದ್ದರೆ ಕೇಳಿ! ಈಗಾಗಲೇ 20,000ಕ್ಕೂ ಅಧಿಕ ಮಂದಿ ಈ ಪೇಜ್‌ಗೆ ಚಂದಾದಾರರಾಗಿದ್ದಾರೆ. ಇಲ್ಲಿಯ ತನಕ ಸುಮಾರು 650 ಪೋಸ್ಟ್‌ಗಳನ್ನು ಹಾಕಲಾಗಿದೆ.

ಶುರುವಾಗಿದ್ದು ಹೀಗೆ…
ಈ ಪ್ರಾಜೆಕ್ಟ್‌ನ ರೂವಾರಿ ಮುಂಬೈನ ಶಾನು ಬಾಬರ್‌. ತಾವು ತೆಗೆದ ಫೋಟೋಗಳನ್ನು ಮಾತ್ರ ಆ ಪೇಜ್‌ನಲ್ಲಿ ಅಪ್‌ಲೋಡ್‌ ಮಾಡುತ್ತಿದ್ದರು. ಅದಕ್ಕೆ ಸಿಕ್ಕ ಸ್ಪಂದನೆಯಿಂದ ಸಂತಸಗೊಂಡ ಶಾನು ಅವರಿಗೆ ಆಗಲೇ ಅದನ್ನು ಒಂದು ಕಮ್ಯುನಿಟಿ ಪೇಜ್‌ ಆಗಿ ಪರಿವರ್ತಿಸುವ ಉಪಾಯ ಹೊಳೆದಿದ್ದು. ಅದೀಗ ಒಂದು ದೊಡ್ಡ ಸಂಘಟನೆಯಾಗಿ ಬೆಳೆದಿದೆ. ರೈಲಿನಲ್ಲಿ ಪ್ರಯಾಣಿಸಿದವರು ಚೆಂದ ಚೆಂದದ ಫೋಟೋಗಳನ್ನು ತೆಗೆದು  #windowseatproject  ಎಂದು ಟ್ಯಾಗ್‌ ಮಾಡಿ ಶೇರ್‌ ಮಾಡುತ್ತಿದ್ದಾರೆ.

ಇದರಲ್ಲಿ ನೀವು ಕೂಡ ರೈಲಿನಲ್ಲಿ ತೆಗೆದ ಚೆಂದದ ಫೋಟೋಗಳನ್ನು ಅಪ್‌ಲೋಡ್‌ ಮಾಡಬಹುದು.