ಹಂತಕರ ಪತ್ತೆಗೆ ಆಗ್ರಹಿಸಿ ಸುಪ್ರೀಂ ಮೆಟ್ಟಿಲೇರಿದ ಕಲಬುರ್ಗಿ ಕುಟುಂಬ

Team Udayavani, Jan 8, 2018, 6:30 AM IST

ಧಾರವಾಡ: ಚಿಂತಕ ಡಾ.ಎಂ.ಎಂ. ಕಲಬುರ್ಗಿ ಹತ್ಯೆ ಮಾಡಿರುವ ಹಂತಕರ ಪತ್ತೆ ಕಾರ್ಯ ಇನ್ನಷ್ಟು
ಚುರುಕುಗೊಳಿಸಲು ಆಗ್ರಹಿಸಿ ಕಲಬುರ್ಗಿ ಕುಟುಂಬ ಸದಸ್ಯರು ಇದೀಗ ಸುಪ್ರೀಂ ಕೋರ್ಟ್‌ ಮೊರೆ ಹೋಗಿದ್ದಾರೆ.

2017, ಡಿ.16ರಂದೇ ಸುಪ್ರೀಂ ಕೋರ್ಟ್‌ನಲ್ಲಿ ರಿಟ್‌ ಪಿಟಿಷನ್‌ ಹಾಕಿದ್ದು, ಜ.10ರಂದು ಈ ಪ್ರಕರಣದ ವಿಚಾರಣೆ
ನಡೆಯಲಿದೆ. ಮಹಾರಾಷ್ಟ್ರದ ವಕೀಲ ಅಭಯ ನೇವಗಿ ಕಲಬುರ್ಗಿ ಕುಟುಂಬದ ಪರ ವಾದ ಮಂಡಿಸಲಿದ್ದಾರೆ.

ಈ ಕುರಿತು “ಉದಯವಾಣಿ’ಯೊಂದಿಗೆ ಡಾ.ಕಲಬುರ್ಗಿ ಅವರ ಪುತ್ರ ಶ್ರೀವಿಜಯ ಕಲಬುರ್ಗಿ ಮಾತನಾಡಿ, ನಮ್ಮ ತಂದೆ ಹತ್ಯೆಯಾಗಿ ವರ್ಷಗಳೇ ಕಳೆದರೂ ತನಿಖೆ ಶೀಘ್ರವಾಗಿ ನಡೆಯುತ್ತಿಲ್ಲ. ಇದು ಹೀಗೆ ವಿಳಂಬವಾದರೆ ಸಾಕ್ಷéಗಳು
ನಾಶವಾಗುತ್ತವೆ ಎಂಬ ಆತಂಕ ನಮ್ಮನ್ನು ಕಾಡುತ್ತಿದೆ. ಅದರರ್ಥ ಕರ್ನಾಟಕ ಸರ್ಕಾರ ಏನೂ ಕೆಲಸ ಮಾಡುತ್ತಿಲ್ಲ ಎಂದಲ್ಲ. ಆದರೆ, ಅವರು ಮಾಡುತ್ತಿರುವ ಪ್ರಯತ್ನ ಇನ್ನಷ್ಟು ಹೆಚ್ಚಬೇಕು. ಶೀಘ್ರವೇ ಹಂತಕರನ್ನು ಬಂಧಿಸಬೇಕು ಎನ್ನುವ ಆಗ್ರಹ ನಮ್ಮದು. ಹೀಗಾಗಿ ಸುಪ್ರೀಂ ಕೋರ್ಟ್‌ನಲ್ಲಿ ನ್ಯಾಯ ಕೋರಿದ್ದೇವೆ ಎಂದರು.