ಮುಂಬಯಿ ಸೆಶನ್ಸ್‌ ಕೋರ್ಟ್‌ನಲ್ಲಿ ಬೆಂಕಿ: ಜೀವ ಹಾನಿ ಇಲ್ಲ

Team Udayavani, Jan 8, 2018, 10:54 AM IST

ಮುಂಬಯಿ : ಮುಂಬಯಿ ಮಹಾ ನಗರದಲ್ಲಿ ಇನ್ನೊಂದು ಬೆಂಕಿ ಅವಘಡ ಸಂಭವಿಸಿದೆ. ಈ ಬಾರಿ ದು ಘಟಿಸಿರುವುದು ಕರ್ಮವೀರ ಭಾವುರಾವ್‌ ಮಾರ್ಗದಲ್ಲಿನ ಮುಂಬಯಿ ಸೆಶನ್ಸ್‌ ಕೋರ್ಟ್‌ ಕಟ್ಟಡದಲ್ಲಿ – ಇಂದು ಸೋಮವಾರ ಬೆಳಗ್ಗೆ. 

ಬೆಂಕಿಯನ್ನು ನಂದಿಸಲು ತ್ವರಿತ ಕಾರ್ಯಾಚರಣೆಗಿಳಿದ ಕನಿಷ್ಠ ಐದು ಅಗ್ನಿಶಾಮಕಗಳು ಹರಸಾಹಸಪಟ್ಟು ಯಶಸ್ವಿಯಾದವು. ಈ ಅಗ್ನಿ ಅವಘಡದಲ್ಲಿ ಯಾವುದೇ ಜೀವ ಹಾನಿ ಸಂಭವಿಸಿರುವ ವರದಿ ಇಲ್ಲ.

ದಕ್ಷಿಣ ಮುಂಬಯಿಯಲ್ಲಿರುವ ಮುಂಬಯಿ ವಿವಿ ಕ್ಯಾಂಪಸ್‌ಗೆ ಸಮೀಪದ ಕೋರ್ಟ್‌ ಕಟ್ಟಡದಲ್ಲಿ ಬೆಂಕಿ ಕಾಣಿಸಿಕೊಂಡಿದೆ ಎಂಬ ಮಾಹಿತಿ ಅಗ್ನಿ ಶಾಮಕ ದಳಕ್ಕೆ ಇಂದು ಬೆಳಗ್ಗೆ 7.14ರ ಹೊತ್ತಿಗೆ ಸಿಕ್ಕಿತು ಎಂದು ಬಿಎಂಸಿ ಪ್ರಕೋಪ ನಿರ್ವಹಣೆ ಘಟಕದ ಅಧಿಕಾರಿಯೋರ್ವರು ಹೇಳಿದರು.

ಕಳೆದ ಎರಡು ವಾರಗಳ ಅವಧಿಯೊಳಗೆ ಮುಂಬಯಿ ಮಹಾನಗರಿಯಲ್ಲಿ ಘಟಿಸಿರುವ ಐದನೇ ದೊಡ್ಡ ಮಟ್ಟದ ಅಗ್ನಿ ದುರಂತ ಇದಾಗಿದೆ.

ಡಿ.28ರಂದು ಲೋವರ್‌ ಪರೇಲ್‌ ನಲ್ಲಿನ ಕಮಲಾ ಮಿಲ್ಸ್‌ ಆವರಣದಲ್ಲಿ ಘಟಿಸಿದ್ದ ಭೀಕರ ಅಗ್ನಿ ದುರಂತಕ್ಕೆ 14 ಮಂದಿ ಬಲಿಯಾಗಿರುವ ಘಟನೆ ಇನ್ನೂ ಜನಮನದಿಂದ ಆರಿ ಹೋಗಿಲ್ಲ. ಅಷ್ಟರೊಳಗಾಗಿ ಇಂದು ಮತ್ತೆ ಇನ್ನೊಂದು ಅಗ್ನಿ ದುರಂತ ಸಂಭವಿಸಿರುವುದು ಜನರಲ್ಲಿ ಕಳವಳ, ಭಯ ಮೂಡಿಸಿದೆ.