ಸಮಸ್ಯೆ ಯಾರಿಗೆ ಹೇಳ್ಳೋಣ?

Team Udayavani, Jan 8, 2018, 12:26 PM IST

ಅಫಜಲಪುರ: ಗ್ರಾಮೀಣ ಭಾಗದ ಜನರ ಬಳಿಯೇ ಹೋಗಿ ಸಮಸ್ಯೆಗಳನ್ನು ಬಗೆಹರಿಸಲು ಜನಸ್ಪಂದನ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದ್ದು, ಈ ವೇಳೆ ಅಧಿಕಾರಿಗಳು ಬಾರದಿದ್ದರೆ ಶಿಸ್ತು ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಗ್ರೇಡ್‌ 2 ತಹಶೀಲ್ದಾರ್‌ ಪ್ರಭಾಕರ ಖಜೂರಿ ಎಚ್ಚರಿಸಿದರು. ತಾಲೂಕಿನ ಘತ್ತರಗಿ ಗ್ರಾಪಂನಲ್ಲಿ ಅಧ್ಯಕ್ಷೆ ಸಂಗಮ್ಮ ಅಪ್ಪಾರಾವ್‌ ಅಧ್ಯಕ್ಷತೆಯಲ್ಲಿ ನಡೆದ ಜನಸ್ಪಂದನ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಗ್ರಾಪಂ ಸದಸ್ಯರಾದ ಘೋಷಯ್ಯ ಆಲಮೇಲ, ಭಗವಂತ ವಗ್ಗೆ, ಸುಭಾಷ ಹಂಚಿನಾಳ ಹಾಗೂ ಗ್ರಾಪಂ ಸದಸ್ಯರು ಈ ವೇಳೆ ಮಧ್ಯ ಪ್ರವೇಶಿಸಿ, ಗ್ರಾಮಸ್ಥರ ಸಮಸ್ಯೆಗಳನ್ನು ಸಂಬಂಧಪಟ್ಟ ಅಧಿಕಾರಿಗಳಿಗೆ ತಿಳಿಸಬೇಕೆಂದರೆ ಇಲಾಖೆಗಳ ಮುಖ್ಯಾಧಿಕಾರಿಗಳು ಬರುವುದಿಲ್ಲ, ಸಹಾಯಕರನ್ನು ಜನಸ್ಪಂದನ ಕಾರ್ಯಕ್ರಮಕ್ಕೆ ಕಳುಹಿಸುತ್ತಾರೆ. ಅವರಿಗೆ ಸರಿಯಾದ ಮಾಹಿತಿಯೇ ಇರುವುದಿಲ್ಲ. ಹೀಗಾದರೆ ಗ್ರಾಮಸ್ಥರ ಸಮಸ್ಯೆಗಳಿಗೆ ಪರಿಹಾರ ಸಿಗಲು ಹೇಗೆ ಸಾಧ್ಯ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಘತ್ತರಗಿ ಗ್ರಾಮ ಐತಿಹಾಸಿಕ ಧಾರ್ಮಿಕ ಕೇಮದ್ರವಾಗಿದೆ. ಘತ್ತರಗಾ ಮತ್ತು ಹವಳಗಾ ಧಾರ್ಮಿಕ ಸ್ಥಳಗಳಾಗಿದ್ದು, ಇಲ್ಲಿ ಶುದ್ಧ ಕುಡಿಯುವ ನೀರಿನ ಅವಶ್ಯಕತೆ ಇದೆ. ಗ್ರಾಮದಲ್ಲಿರುವ ವಿದ್ಯುತ್‌ ಕಂಬಗಳು ಹಾಳಾಗಿವೆ, ತಂತಿಗಳು ಜೋತು ಬಿದ್ದಿವೆ, ಗ್ರಾಮದ ಹೊಸ ಬಡಾವಣೆಗೆ ವಿದ್ಯುತ್‌ ಸಂಪರ್ಕವಿಲ್ಲ. ಕೊಳ್ಳೂರು ಘತ್ತರಗಾ ರಸ್ತೆ ಕಾಮಗಾರಿ ಕಳಪೆಯಾಗಿ ಅರ್ಧಕ್ಕೆ ನಿಂತಿದೆ. ಕುಡಿಯುವ ನೀರಿನ ಸಮಸ್ಯೆ ಹೆಚ್ಚಾಗಿದೆ, ಸರಿಯಾದ ರಸ್ತೆಗಳಿಲ್ಲ, ಆರೋಗ್ಯ ಸೇವೆಗಳು ಸರಿಯಾಗಿ ಸಿಗುತ್ತಿಲ್ಲ ಇಂತಹ ಅನೇಕ ಸಮಸ್ಯೆಗಳು ಗ್ರಾಮದಲ್ಲಿವೆ. ಹೀಗಾಗಿ ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳು ಜನಸ್ಪಂದನಕ್ಕೆ ಬಂದಿದ್ದರೆ ಹೇಳುತ್ತಿದ್ದೆವು. ಅವರೆ ಬಂದಿಲ್ಲವೆಂದರೆ ಯಾರಿಗೆ ಸಮಸ್ಯೆ ಹೇಳುವುದು ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಗ್ರಾಪಂ ಅಧ್ಯಕ್ಷೆ ಸಂಗಮ್ಮ ಅಪ್ಪಾರಾವ ಸಂಗಮಕರ ಹಾಗೂ ಸದಸ್ಯರು ಮಾತನಾಡಿ, ಕಳೆದ ವರ್ಷ ನಡೆದ ಜನಸ್ಪಂದನದಲ್ಲಿ ಅಧಿಕಾರಿಗಳು ಅಹವಾಲು ಸ್ವೀಕರಿಸಿಕೊಂಡು ಹೋಗಿದ್ದಾರೆ. ಆದರೆ ಅವುಗಳಿಗೆ ಪರಿಹಾರವನ್ನೇ ನೀಡಿಲ್ಲ. ಹೀಗಾಗಿ ಅಧಿಕಾರಿಗಳು ಕೇವಲ ಅಹವಾಲು ಸ್ವೀಕರಿಸಿ ಹೋದರೆ ಸಾಲದು, ಸಮಸ್ಯೆಗಳಿಗೆ ಪರಿಹಾರ ನೀಡುವ ಕೆಲಸವನ್ನು ಮಾಡಬೇಕು ಎಂದರು.

ಜೆಸ್ಕಾಂ ಎಇಇ ನಾಗರಾಜ ಮಾತನಾಡಿ, ಗ್ರಾಮದ ಹೊಸ ಬಡಾವಣೆಗೆ ವಿದ್ಯುತ್‌ ಸಂಪರ್ಕ ಕಲ್ಪಿಸಬೇಕಾದರೆ ಪಿಡಿಒ ಅವರ ಕಡೆಯಿಂದ ಜೆಸ್ಕಾಂ ಕಚೇರಿಗೆ ಪತ್ರ ಬರೆಯಲು ಹೇಳಿದರೆ ನಾವು ವಿದ್ಯುತ್‌ ಕಲ್ಪಿಸುವ ಕೆಲಸ ಮಾಡುತ್ತೇವೆ. ಘತ್ತರಗಿ ಗ್ರಾಪಂ ವ್ಯಾಪ್ತಿಯಲ್ಲಿ ಒಟ್ಟು 6 ಕಿ.ಮೀ.ಯಷ್ಟು ಹೊಸ ಎಪಿ ವಿದ್ಯುತ್‌ ತಂತಿ ಅಳವಡಿಸಲಾಗುತ್ತಿದೆ ಎಂದು ಹೇಳಿದರು.

ಸಿಡಿಪಿಒ ಸರಳಾ ದೊಡ್ಮನಿ, ಕೃಷಿ ಇಲಾಖೆ ಎಎಒ ಅರವಿಂದ ರಾಠೊಡ, ಡಾ| ಸುಶೀಲ ಅಂಬೂರೆ, ಮಹಾಂತೇಶ ಹಿರೇಮಠ, ಬಿಸಿಎಂ, ಸಮಾಜ ಕಲ್ಯಾಣ ಇಲಾಖೆ, ಶಿಕ್ಷಣ ಇಲಾಖೆ, ರೇಷ್ಮೆ ಇಲಾಖೆ ಗ್ರಾಮಸ್ಥರ ಅಹವಾಲು ಸ್ವಿಕರಿಸಿ ಇಲಾಖೆಗಳ ಮಾಹಿತಿ ನೀಡಿದರು. ತಾಪಂ ಯೋಜನಾಧಿಕಾರಿ ರೇವಣಸಿದ್ದಪ್ಪ ಅಕಂಡೆ, ಗ್ರಾಪಂ ಸದಸ್ಯರಾದ ಶೋಭಾ ಬಿಲ್ಲಾಡ, ಈರಮ್ಮ ಬಜಂತ್ರಿ, ರಾಜಕುಮಾರ ಪಾಟೀಲ, ಸಿದ್ದಣ್ಣ ಕಲಾಲ, ಪಿಡಿಒ ಮಹಾಂತೇಶ ಯಾಡಗಿ ಹಾಗೂ ಇತರರು ಇದ್ದರು.