ಸರ್ಕಾರದಿಂದ ಎನ್‌ಪಿಎಸ್‌ ಯೋಜನೆ ನಿಧಿ ದುರ್ಬಳಕೆ

Team Udayavani, Jan 8, 2018, 1:03 PM IST

ಪಿರಿಯಾಪಟ್ಟಣ: ಎನ್‌ಪಿಎಸ್‌ ಯೋಜನೆಯ ಜಾರಿಯ ಮೂಲಕ ಸರ್ಕಾರಗಳು ಸರ್ಕಾರಿ ನೌಕರರ ಹಣವನ್ನು ದುರುಪಯೋಗಪಡಿಸಿಕೊಂಡು ನೌಕರರ ಜೀವನ ಭದ್ರತೆಯನ್ನು ಕಸಿದುಕೊಂಡಿವೆ ಎಂದು ಎನ್‌ಪಿಎಸ್‌ ನೌಕರರ ಸಂಘದ ರಾಜ್ಯ ಪ್ರಧಾನ ಕಾರ್ಯದರ್ಶಿ ಎಂ.ಎ.ನಾಗನಗೌಡ ತಿಳಿಸಿದರು.

ಪಟ್ಟಣದ ಸಾಯಿ ಸಮುದಾಯ ಭವನದಲ್ಲಿ ತಾಲೂಕು ಎನ್‌ಪಿಎಸ್‌ ನೌಕರರ ಸಂಘದ ವತಿಯಿಂದ ನಡೆದ ಎನ್‌ಪಿಎಸ್‌ ವಿಚಾರ ಸಂಕೀರ್ಣ ಮತ್ತು ಜಾಗೃತಿ ಸಮಾವೇಶದಲ್ಲಿ ಮುಖ್ಯ ಭಾಷಣಕಾರರಾಗಿ  ಮಾತನಾಡಿದ ಅವರು, ನೂತನ ಪಿಂಚಣಿ ಯೋಜನೆ ಒಂದು ಅವೈಜಾnನಿಕ ಯೋಜನೆಯಾಗಿದ್ದು, ಯಾವುದೇ ಚರ್ಚೆಗೆ ಅವಕಾಶ ನೀಡದೆ ಇದನ್ನು ಜಾರಿಗೆ ತರಲಾಗಿದೆ. ಇದುವರೆಗೂ 1.75 ಲಕ್ಷ ಕೋಟಿ ರೂ.ಗಳ ಸರ್ಕಾರಿ ನೌಕರರ ಹಣ ಕಡಿತಗೊಳಿಸಿದೆ.

ಇವುಗಳನ್ನು ಖಾಸಗಿ ಕಂಪನಿಗಳಾದ ಎಲ್‌ಐಸಿ, ಎಸ್‌ಬಿಐ, ಯೂಟಿಐ ಮುಂತಾದ ಕಂಪನಿಗಳಲ್ಲಿ ಶೇರು ಹೂಡುವ ಮೂಲಕ ಜೂಜಾಟ ನಡೆಸುತ್ತಿದೆ. ಇದರಿಂದ ನಿವೃತ್ತಗೊಂಡ ಸರಕಾರಿ ನೌಕರರು ಪಿಂಚಣಿಯೂ ಸಿಗದೆ, ಇತ್ತ ಕಂತಿನ ಮಾಡಿದ ಹಣವನ್ನು ನೀಡದೆ ತೊಂದರೆಗೊಳಗಾಗಿದ್ದಾರೆ ಎಂದು ಆರೋಪಿಸಿದರು.

ಸಿಎಂ ಗಮನಕ್ಕೆ ಬೇಡಿಕೆ: ಶಾಸಕ ಕೆ.ವೆಂಕಟೇಶ್‌ ಮಾತನಾಡಿ, ನೌಕರಿಯಲ್ಲಿ ಜೀವನ ಭದ್ರತೆ ಇಲ್ಲದವರಿಗೆ ಆತಂಕ ಸಹಜವಾದುದ್ದು, ಕೇಂದ್ರ ಮತ್ತು ರಾಜ್ಯ ಸರ್ಕಾರ ನಿಮ್ಮ ಬೇಡಿಕೆಗಳನ್ನು ಸುಲಭವಾಗಿ ಈಡೇರಿಸುವಂತದಾಗಿದ್ದು, ತಾಳ್ಮೆಯಿಂದ ಹೋರಾಟ ನಡೆಸಬೇಕಿದೆ.

ಸರ್ಕಾರದ ಮೇಲೆ ಹೆಚ್ಚಿನ ಒತ್ತಡ ತಂದು ತಮ್ಮ ನೋವುಗಳನ್ನು ಸಂಘ ಸಂಸ್ಥೆಗಳು ಹಿರಿಯ ರಾಜಕಾರಣಿಗಳು ಮತ್ತು ಆಡಳಿತಾರೂಢ ಸರ್ಕಾರದ ಗಮನಸೆಳೆದು ತಮ್ಮ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳಿ. ಮುಖ್ಯಮಂತ್ರಿ ಅವರು, ಜಿಲ್ಲೆಯವರಾಗಿದ್ದರಿಂದ ನಾನು ಖುದ್ದು ನಿಮ್ಮ ಸಮಸ್ಯೆಗಳನ್ನು ಗಮನಕ್ಕೆ ತರುತ್ತೇನೆ. ಅಲ್ಲದೆ ನಿಮ್ಮ ಬೇಡಿಕೆಗಳ ಬಗ್ಗೆ ಗಮಸೆಳೆಯಲು ಮಾಡುತ್ತಿರುವ ಹೋರಾಟಕ್ಕೆ ಸಹಕಾರ ನೀಡುವುದಾಗಿ ತಿಳಿಸಿದರು.

ಅಧಿಕಾರಿಗಳ ಮೋಸ: ಎನ್‌ಪಿಎಸ್‌ ರಾಜ್ಯ ಸಂಘಟನಾ ಕಾರ್ಯದರ್ಶಿ ಎಚ್‌.ಆರ್‌.ರೂಪ ಮಾತನಾಡಿ, ಎನ್‌ಪಿಎಸ್‌ ಜಾರಿಯಾದ ಸಂದರ್ಭದಲ್ಲಿ ನಿವೃತ್ತಿಯ ವೇಳೆಗೆ ಕೋಟ್ಯಾದಿಪತಿಗಳಾಗುತ್ತೀರಾ ಎಂಬ ಮೂಗಿಗೆ ತುಪ್ಪ ಸವರುವ ಕೆಲಸ ಮಾಡಿದ ಅಧಿಕಾರಿಗಳು ಮೋಸ ಮಾಡಿದ್ದಾರೆ. ಅಲ್ಲದೆ 11 ವರ್ಷಗಳ ನಂತರ ಎನ್‌ಪಿಎಸ್‌ನ ಕರಾಳ ಮುಖದ ದರ್ಶನವಾಗುತ್ತಿದೆ. ಸರಕಾರಿ ನೌಕರಿ ಪಡೆದ ತಮ್ಮ ಮಕ್ಕಳು ತಮ್ಮನ್ನು ಇಳಿವಯಸ್ಸಿನಲ್ಲಿ ಸಾಕುತ್ತಾರೆಂಬ ತಂದೆತಾಯಿಯವರ ಭರವಸೆಗೆ ತಣ್ಣೀರೆರಚಿದಂತಾಗಿದೆ. 

ಸರ್ಕಾರದ ನಿರ್ಧಾರ ಖಂಡನೀಯ: ಪುರಸಭೆ ಅಧ್ಯಕ್ಷ ವೇಣುಗೋಪಾಲ್‌ ಮಾತನಾಡಿ, ಸರ್ಕಾರಿ ನೌಕರರ ಹಣವನ್ನು ಖಾಸಗಿ ಕಂಪನಿಗಳ ಶೇರು ಮಾರುಕಟ್ಟೆಯಲ್ಲಿ ವಿನಿಯೋಗಿಸುವ ಸರ್ಕಾರದ ನಿರ್ಧಾರ ಖಂಡನೀಯ, ಹಳೆಯ ಪಿಂಚಿಣಿ ಪದ್ಧತಿಯೇ ಜಾರಿಯಾಗಬೇಕು.

ಅನ್ಯಾಯದ ವಿರುದ್ಧ ಒಗ್ಗಟಿನಿಂದ ಹೋರಾಟ ನಡೆಸಿದರೆ ಉತ್ತಮ ಫ‌ಲದೊರಕಲಿದೆ ಎಂದು ತಿಳಿಸಿದರು. ಪಟ್ಟಣದ ಅಗ್ನಿಶಾಮಕ ದಳದ ಎದುರಿಂದ ಸಾಯಿ ಸಮುದಾಯಭವನದ ವರೆಗೆ ಎನ್‌ಪಿಎಸ್‌ ನೌಕರರು ಮೆರವಣಿಗೆ ಮಾಡಿ ಜಾಗೃತಿ ಜಾಥಾ ನಡೆಸಿದರು.

ಸರಕಾರಿ ನೌಕರರ ಸಂಘದ ತಾ.ಅಧ್ಯಕ್ಷ ಎಂ.ಕೆ.ಪ್ರಕಾಶ್‌, ಎನ್‌ಪಿಎಸ್‌ ನೌಕರರ ಸಂಘದ ರಾಜ್ಯ ಉಪಾಧ್ಯಕ್ಷ ಚಿಕ್ಕಮಾದಪ್ಪ ಮಾತನಾಡಿದರು. ಸಮಾರಂಭದಲ್ಲಿ ಎನ್‌ಪಿಎಸ್‌ ನಿವೃತ್ತ ನೌಕರರನ್ನು ಸನ್ಮಾನಿಸಲಾಯಿತು.

ಸಮಾರಂಭದಲ್ಲಿ ತಾಲೂಕು ಪಂಚಾಯಿತಿ ಅಧ್ಯಕ್ಷೆ ನಿರೂಪ ರಾಜೇಶ್‌, ಸರಕಾರಿ ನೌಕರರ ಸಹಕಾರ ಸಂಘದ ಅಧ್ಯಕ್ಷ ಬಿ.ವಿ.ಕಿರಣ್‌, ಎನ್‌ಪಿಎಸ್‌ ತಾ.ಸಂಘದ ಗೌರವಾಧ್ಯಕ್ಷ ಆರ್‌.ಟಿ.ಚಂದ್ರು, ಉಪಾಧ್ಯಕ್ಷರಾದ ಡಾ.ಆರ್‌.ಬಿ.ಶೋಭ, ಎಚ್‌.ಕೆ.ವಿಜಯ್‌, ಕಿರಣ್‌, ಗಾಯಿತ್ರಿ, ಸುರೇಂದ್ರ, ಸೇರಿದಂತೆ ಮತ್ತಿತರರು ಹಾಜರಿದ್ದರು.