ಅಭಿಮಾನಿಗಳ ಸಮ್ಮುಖದಲ್ಲಿ ಯಶ್‌ ಹುಟ್ಟುಹಬ್ಬ

Team Udayavani, Jan 9, 2018, 11:09 AM IST

ನಟ ಯಶ್‌ ಅವರು ಸೋಮವಾರ ತಮ್ಮ 32ನೇ ಹುಟ್ಟುಹಬ್ಬವನ್ನು ಅಭಿಮಾನಿಗಳ ಸಮ್ಮುಖದಲ್ಲಿ ಆಚರಿಸಿಕೊಂಡರು. ಭಾನುವಾರ ಮಧ್ಯರಾತ್ರಿಯೇ ಯಶ್‌ ಅವರ ಮನೆಯ ಮುಂದೆ ಅಭಿಮಾನಿಗಳು ಜಮಾಯಿಸಿ, ಅವರಿಗೆ ಜೈ ಹಾಕುವ ಮೂಲಕ ಕೇಕ್‌ ಕತ್ತರಿಸಿ, ಸಂಭ್ರಮಿಸಿದರು.

ಸೋಮವಾರ ಬೆಳಗ್ಗೆಯಿಂದಲೇ ಯಶ್‌ ಮನೆಯ ಮುಂದೆ ಸಾಲುಗಟ್ಟಿದ್ದ ಅಭಿಮಾನಿಗಳು, ಯಶ್‌ ಅವರಿಗೆ ಹಾರ ಹಾಕುವ ಮೂಲಕ ವಿಶೇಷವಾಗಿ ಹುಟ್ಟುಹಬ್ಬದ ಶುಭಾಶಯ ಹೇಳಿದರು. ಅಭಿಮಾನಿಗಳು ಪ್ರೀತಿಯಿಂದ ತಂದಿದ್ದ ಕೇಕ್‌ ಕತ್ತರಿಸಿದ ಯಶ್‌, ಅವರ ಜೊತೆ ಫೋಟೋ ತೆಗೆಸಿಕೊಂಡು ಅವರ ಖುಷಿಯಲ್ಲಿ ಭಾಗಿಯಾದರು.

ಈ ಸಂದರ್ಭದಲ್ಲಿ ಯಶ್‌ ಪತ್ನಿ ರಾಧಿಕಾ ಪಂಡಿತ್‌ ಕೂಡ ಯಶ್‌ ಅವರಿಗೆ ಕೇಕ್‌ ತಿನ್ನಿಸುವ ಮೂಲಕ ಶುಭಕೋರಿದರು. ರಾಜ್ಯದ ಹಲವು ನಗರಗಳಿಂದ ಆಗಮಿಸಿದ್ದು ಯಶ್‌ ಅಭಿಮಾನಿಗಳ ಸಂಘದ ಪದಾಧಿಕಾರಿಗಳು ಯಶ್‌ಗೆ ಮೈಸೂರು ಪೇಟ ತೊಡಿಸಿ ಶಾಲು ಹೊದಿಸಿ, ಹುಟ್ಟುಹಬ್ಬ ಆಚರಿಸಿ ಸಂತಸಪಟ್ಟರು.

ಇನ್ನು, ಯಶ್‌ ಹುಟ್ಟುಹಬ್ಬದ ಅಂಗವಾಗಿ, ಹೊಂಬಾಳೆ ಪ್ರೊಡಕ್ಷನ್ಸ್‌ನಲ್ಲಿ ತಯಾರಾಗುತ್ತಿರುವ “ಕೆಜಿಎಫ್’ ಚಿತ್ರದ ಟೀಸರ್‌ ಕೂಡ ಬಿಡುಗಡೆಯಾಗಿದೆ. ಪ್ರಶಾಂತ್‌ ನೀಲ್‌ ನಿರ್ದೇಶನದ “ಕೆಜಿಎಫ್’ ಚಿತ್ರದ ಮೊದಲ ಪೋಸ್ಟರ್‌ ನೋಡಿ ಕುತೂಹಲಗೊಂಡಿದ್ದ ಅಭಿಮಾನಿಗಳು, ಸೋಮವಾರ ರಿಲೀಸ್‌ ಆದ ಟೀಸರ್‌ ನೋಡಿ ಖುಷಿಗೊಂಡಿದ್ದಾರೆ.

ಚಿತ್ರರಂಗದ ಅನೇಕ ನಟ,ನಟಿಯರು, ನಿರ್ದೇಶಕ, ನಿರ್ಮಾಪಕರು ಯಶ್‌ ಹುಟ್ಟುಹಬ್ಬಕ್ಕೆ ಶುಭಾಶಯ ಹೇಳಿದ್ದಾರೆ. ಮುಂದಿನ ಚಿತ್ರ ನಿರ್ಮಾಪಕರಾದ ಜಯಣ್ಣ, ಭೋಗೇಂದ್ರ ಸೇರಿದಂತೆ ಹಲವು ನಿರ್ಮಾಪಕ, ನಿರ್ದೇಶಕರು ಯಶ್‌ ಅವರ ಮನೆಗೆ ಹೋಗಿ, ಶುಭಾಶಯ ಹೇಳಿದ್ದಾರೆ.