ವೀರಶೈವ-ಲಿಂಗಾಯತ ಒಂದೇ

Team Udayavani, Jan 9, 2018, 12:31 PM IST

ಯಲಹಂಕ: ವೀರಶೈವ ಮತ್ತು ಲಿಂಗಾಯತ ಒಂದೇ ನಾಣ್ಯದ ಎರಡು ಮುಖಗಳಿದ್ದಂತೆ ಎಂದು ಪೌರಾಡಳಿತ ಸಚಿವ ಈಶ್ವರ ಖಂಡ್ರೆ ಹೇಳಿದರು. ಹೆಸರಘಟ್ಟ ಮುಖ್ಯ ರಸ್ತೆಯ ಸಾಯಿ ಕಲ್ಯಾಣ ಮಂಟಪದಲ್ಲಿ ವೀರಶೈವ ಲಿಂಗಾಯತ ಕ್ಷೇಮಾಭಿವೃದ್ಧಿ ವೇದಿಕೆ,

ಕಾಯಕ ಯೋಗಿ ಸಹಕಾರ ಸಂಘ ನಿಯಮಿತ, ಶರಣ ಸಾಹಿತ್ಯ ಪರಿಷತ್‌ ದಾಸರಹಳ್ಳಿ ವತಿಯಿಂದ ಹಮ್ಮಿಕೊಂಡಿದ್ದ ಹಿಮವತ್‌ ಕೇದಾರ ವೈರಾಗ್ಯ ಸಿಂಹಾಸನಾಧೀಶ್ವರ ಶ್ರೀ 1008 ಜಗದ್ಗುರು ಪದವಿಭೂಷಿತ ಭೀಮಾಶಂಕರಲಿಂಗ ಶಿವಾಚಾರ್ಯ ಭಗವತ್ಪಾದರ ಸಂಗೀತಯುಕ್ತ ಇಷ್ಟಲಿಂಗ ಮಹಾಪೂಜೆ ಹಾಗೂ ಜನಜಾಗೃತಿ ಧರ್ಮ ಸಮಾರಂಭದಲ್ಲಿ ಅವರು ಮಾತನಾಡಿದರು.

ವೀರಶೈವ ಲಿಂಗಾಯತ ಧರ್ಮಕ್ಕೆ, ಐದು ಸಾವಿರ ವರ್ಷಗಳ ಇತಿಹಾಸವಿದೆ. ಪಂಚಪೀಠದ ಗುರುಗಳು, ಶಿವ ಯೋಗಿಗಳು ಧರ್ಮದಿಂದಲೇ ವಿಶ್ವ ಶಾಂತಿ, ದಯವೇ ಧರ್ಮದ ಮೂಲ, ಮಾನವ ಧರ್ಮಕ್ಕೆ ಜಯವಾಗಲಿ ಎಂದು ಹೇಳುತ್ತಾ ಬಂದಿದ್ದರೆ ಅದು ವೀರಶೈವ ಲಿಂಗಾಯತ ಧರ್ಮದಲ್ಲಿ ಮಾತ್ರ ಎಂದು ಹೇಳಿದರು.

1008 ಜಗದ್ಗುರು ಪದವಿಭೂಷಿತ ಬೀಮಾಶಂಕರಲಿಂಗ ಶಿವಾಚಾರ್ಯ ಭಗವತ್ಪಾದರು ಆಶೀರ್ವಚನ ನೀಡಿ, ವೀರಶೈವ ಲಿಂಗಾಯತರ ಸ್ವತಂತ್ರ ಧರ್ಮಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿಗೆ ಪತ್ರ ನೀಡಿದ್ದು, ಅವರ ಉತ್ತರಕ್ಕೆ  ಎದರುನೋಡುತ್ತಿದ್ದೇವೆ. ರಾಜ್ಯದ ಚುನಾವಣೆ ನಂತರ ಸ್ವತಂತ್ರ ಧರ್ಮದ ಬಗ್ಗೆ ವೀರಶೈವ ಲಿಂಗಾಯತ ಮುಂಖಂಡರೆಲ್ಲ ಒಂದೇ ವೇದಿಕೆಯಲ್ಲಿ ಸೇರಿ ಚೆರ್ಚಿಸುವ ಮೂಲಕ, ಧರ್ಮದ ಜಾಗೃತಿ ಕೆಲಸ ಮಾಡುತ್ತೇವೆ ಎಂದರು.

ವೀರಶೈವ ಲಿಂಗಾಯತ ಕ್ಷೇಮಾಭಿವೃದ್ಧಿ ವೇದಿಕೆ, ಅಧ್ಯಕ್ಷ ಎಂ.ಎಸ್‌.ಬಸವರಾಜು, ಕಾರ್ಯದರ್ಶಿ ಬಸವರಾಜಣ್ಣ, ಶರಣ ಸಾಹಿತ್ಯ ಪರಿಷತ್‌ ದಾಸರಹಳ್ಳಿ ಅಧ್ಯಕ್ಷ ವೈ.ವಿ.ಚನ್ನವೀರಯ್ಯ, ಮಲ್ಲಸಂದ್ರ ಕಾರ್ಪೊರೇಟರ್‌ ಎನ್‌.ಲೋಕೇಶ್‌, ಉಪನ್ಯಾಸಕಿ ಎಚ್‌.ಎಸ್‌.ಸುಜಾತಾ ಮೇಲೇಗೌಡ ಉಪಸ್ಥಿತರಿದ್ದರು.