ನಾಗರಿಕರಿಗೆ ಕಿರಿಕಿರಿಯಾದ ನೇತಾಡುವ ಒಎಫ್ಸಿ

Team Udayavani, Jan 14, 2018, 11:42 AM IST

ಬೆಂಗಳೂರು: ಮಾಹಿತಿ ತಂತ್ರಜ್ಞಾನ ಸೇವೆ ಬಳಕೆಗೆ ಸಹಕಾರಿಯಾದ ಒಎಫ್ಸಿ ಕೇಬಲ್‌ ಅಳವಡಿಸಿಕೊಳ್ಳುವ ಕಾರ್ಯದಲ್ಲಿ ತೊಡಗಿಸಿಕೊಂಡಿರುವ ಒಎಫ್ಸಿ ಸೇವಾ ಸಂಸ್ಥೆಗಳು ಅನುಸರಿಸುವ ವಾಮಮಾರ್ಗದಿಂದ ಜನ ಸಂಕಷ್ಟಕ್ಕೆ ಸಿಲುಕುವಂತಾಗಿದ್ದು, ರಸ್ತೆ ಹಾಗೂ ಪಾದಚಾರಿ ಮಾರ್ಗಗಳಲ್ಲಿ ಸುರಕ್ಷಿತವಾಗಿ ಓಡಾಡಲಾಗದ ಸ್ಥಿತಿ ನಿರ್ಮಾಣವಾಗಿದೆ. 

ನಗರದಲ್ಲಿ 17 ಒಎಫ್ಸಿ ಸೇವಾ ಸಂಸ್ಥೆಗಳು ದೂರ ಸಂಪರ್ಕ, ಟೆಲಿವಿಷನ್‌ ಪ್ರಸಾರ ಹಾಗೂ ಅಂತರ್ಜಾಲ ಸೇವೆ ಒದಗಿಸುತ್ತಿವೆ. ಈ ಸಂಸ್ಥೆಗಳು ಪಾಲಿಕೆ ವ್ಯಾಪ್ತಿಯ 6,140 ಕಿ.ಮೀ ವ್ಯಾಪ್ತಿಯಲ್ಲಿ ಕೇಬಲ್‌ ಅಳಡಿಸಲು ಅಧಿಕೃತವಾಗಿ ಅನುಮತಿ ಪಡೆದಿದ್ದು, ಸುಮಾರು 82 ಸಾವಿರ ಕಿ.ಮೀ ವ್ಯಾಪ್ತಿಯಲ್ಲಿ ಅನಧಿಕೃತವಾಗಿ ಕೇಬಲ್‌ ಡಕ್ಟ್ಗಳನ್ನು ಅಳವಡಿಸಿ ಪಾಲಿಕೆಗೆ ಕೋಟ್ಯಂತರ ರೂ. ವಂಚಿಸುತ್ತಿವೆ. ಇದರೊಂದಿಗೆ ನಿಯಮಬಾಹಿರವಾಗಿ ಟೆಲಿಫೋನ್‌, ವಿದ್ಯುತ್‌ ಕಂಬ, ಮರ ಹಾಗೂ ಕಟ್ಟಡ ಮೇಲೆ ಕೇಬಲ್‌ಗ‌ಳನ್ನು ತೂಗು ಹಾಕಲಾಗುತ್ತಿದೆ. ಈ ಕೇಬಲ್‌ಗ‌ಳು ರಸ್ತೆಯಲ್ಲಿ ಸಂಚರಿಸುವವರಿಗೆ ಮಾರಕವಾಗಿ ಪರಿಣಮಿಸಿವೆ.

ಪಾಲಿಕೆಯಿಂದ ಕೆಲ ಹಗುರ ಕೇಬಲ್‌ಗ‌ಳನ್ನು ಪೋಲ್‌ಗ‌ಳ ಮೂಲಕ ತೆಗೆದುಕೊಂಡು ಹೋಗಲು ಅನುಮತಿ ನೀಡಲಾಗಿದ್ದು, ಪ್ರತಿ ಪೋಲ್‌ ಅಳವಡಿಕೆಗೆ ಅನುಮತಿ ಪಡೆದು, ನಿಗದಿತ ಶುಲ್ಕ ಪಾವತಿಸಬೇಕು. ಆದರೆ, ಪೋಲ್‌ ಅಳವಡಿಸಿದರೆ ಪಾಲಿಕೆಗೆ ಶುಲ್ಕ ಪಾವತಿಸಬೇಕೆಂಬ ಕಾರಣದಿಂದ ಏಜೆನ್ಸಿಗಳು ಮರದ ಕೊಂಬೆಗಳ ಮೇಲೆ ಕೇಬಲ್‌ ಕೊಂಡೊಯ್ಯುತ್ತಿದ್ದು, ತುಂಡಾದ ಕೇಬಲ್‌ಗ‌ಳು ರಸ್ತೆ ಹಾಗೂ ಪಾದಚಾರಿ ಮಾರ್ಗಗಳಲ್ಲಿ ಸಂಚರಿಸುವವರಿಗೆ “ಸಾವಿನ ಕುಣಿಕೆ’ ಗಳಾಗಿ ಪರಿಣಮಿಸಿವೆ.

ದೇಶದಲ್ಲೇ ಅತಿ ಕಡಿಮೆ ಶುಲ್ಕ: ಒಎಫ್ಸಿ ಡಕ್ಟ್ ಎಚ್‌ಡಿಡಿ ವಿಧಾನದಲ್ಲಿ ಅಳವಡಿಸಲು ದೇಶದಲ್ಲಿಯೇ ಅತ್ಯಂತ ಕಡಿಮೆ ಶುಲ್ಕವನ್ನು ಪಾಲಿಕೆ ನಿಗದಿಪಡಿಸಿದೆ. ಪ್ರತಿ ರನ್ನಿಂಗ್‌ ಮೀಟರ್‌ಗೆ ತ್ರಿಪುರಾ ರೀತಿಯ ಸಣ್ಣ ರಾಜ್ಯವೇ 260 ರೂ. ಶುಲ್ಕ ವಿಧಿಸುತ್ತಿದ್ದರೂ ಪಾಲಿಕೆ ಪಾಲಿಕೆ ಬರೀ 95 ರೂ. ವಿಧಿಸಿದೆ. ಜಾರ್ಖಂಡ್‌ನ‌ಲ್ಲಿ 546 ರೂ., ಪಾಟ್ನಾದಲ್ಲಿ 754 ರೂ. ಗುಜರಾತ್‌ನಲ್ಲಿ 533 ರೂ. ಸಂಗ್ರಹಿಸಲಾಗುತ್ತಿದೆ. ಆದರೂ ಪಾಲಿಕೆ ವ್ಯಾಪ್ತಿಯಲ್ಲಿ ಒಎಫ್ಸಿ ಅಳವಡಿಸುವ ಸಂಸ್ಥೆಗಳು ಕೋಟ್ಯಂತರ ರೂ. ವಂಚಿಸುತ್ತಿವೆ ಎಂದು ಪಾಲಿಕೆ ಆಡಳಿತ ಪಕ್ಷದ ಮಾಜಿ ನಾಯಕ ಎನ್‌.ಆರ್‌.ರಮೇಶ್‌ ಆರೋಪಿಸಿದ್ದಾರೆ.

ಅನುಸರಿಬೇಕಾದ ನಿಯಮಗಳೇನು?: ಪಾಲಿಕೆಯಿಂದ ಅನುಮತಿ ಪಡೆದ ಏಜೆನ್ಸಿಗಳು ಕೆಲಸ ಪ್ರಾರಂಭಿಸುವ ಮುನ್ನ ಸಂಬಂಧಿಸಿದ ವಲಯ ಅಧಿಕಾರಿಗಳಿಗೆ, ಪಾಲಿಕೆಯ ಮೂಲ ಸೌಕರ್ಯ ವಿಭಾಗದ ಮುಖ್ಯ ಎಂಜಿನಿಯರ್‌ಗಳಿಗೆ ಲಿಖೀತ ರೂಪದಲ್ಲಿ ಮಾಹಿತಿ ನೀಡಬೇಕು. ಕಾಮಗಾರಿಗೆ ಸಂಬಂಧಪಟ್ಟ ಕಾರ್ಯಯೋಜನೆಯನ್ನು ಸಂಬಂಧಪಟ್ಟ ವಾರ್ಡ್‌ ಎಂಜಿನಿಯರ್‌ ಗಮನಕ್ಕೆ ತಂದು, ಸಂಬಂಧಿಸಿದ ವಲಯ ಅಧಿಕಾರಿಗಳು ಅಥವಾ ರಸ್ತೆ ಮೂಲ ಸೌಕರ್ಯ ಎಂಜಿನಿಯರ್‌ಗಳ ಸಲಹೆ ಮೇರೆಗೆ ಮಣ್ಣು ಅಗೆಯುವುದು ಮತ್ತು ಅಗೆತ ನಂತರ ರಸ್ತೆಯ ಪುನರ್‌ಸ್ಥಾಪನೆಗೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕೆಂಬ ನಿಯಮಗಳಿದ್ದರೂ, ಏಜೆನ್ಸಿಗಳಾಗಲಿ, ಪಾಲಿಕೆಯ ಅಧಿಕಾರಿಗಳಾಗಲಿ ಅವುಗಳ ಪಾಲನೆಗೆ ಮುಂದಾಗಿಲ್ಲ.

ಪ್ರಶ್ನಿಸಿದರೆ ಸಿಬ್ಬಂದಿ ಮೇಲೆ ಹಲ್ಲೆ: ಅನಧಿಕೃತವಾಗಿ ಒಎಫ್ಸಿ ಕೇಬಲ್‌ ಅಳವಡಿಸುವವರು ರಾತ್ರಿ ವೇಳೆ ಕಾಮಗಾರಿ ನಡೆಸುತ್ತಾರೆ. ಏಜೆನ್ಸಿಗಳು ಹತ್ತಾರು ಮಂದಿಯನ್ನು ನೇಮಿಸಿಕೊಂಡು ಕಾಮಗಾರಿ ತಡೆಯಲು ಬಂದವರ ಮೇಲೆ ಏಕಾಏಕಿ ಹಲ್ಲೆಗೆ ಮುಂದಾಗುತ್ತಾರೆ. ನಗರದ ಪ್ರಮುಖ ಭಾಗದಲ್ಲಿ ಇಂತಹ ಅನಧಿಕೃತ ಕೇಬಲ್‌ ಅಳವಡಿಕೆ ತಡೆಗೆ ಮುಂದಾದ ಪಾಲಿಕೆ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ ಪ್ರಕರಣಗಳೂ ವರದಿಯಾಗಿವೆ. ಈ ಬಗ್ಗೆ ಪಾಲಿಕೆಯಿಂದ ಹಲವು ಠಾಣೆಗಳಲ್ಲಿ ದೂರು ಸಹ ದಾಖಲಿಸಲಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಬೇಸರ ವ್ಯಕ್ತಪಡಿಸಿದರು.

* ವೆಂ. ಸುನೀಲ್‌ ಕುಮಾರ್‌