ಜಲ್ಲಿಕಟ್ಟು ಗೆದ್ದವರಿಗೆ ಸಿಗುತ್ತೆ ಕಾರು, ಫ್ಲೈಟ್‌ ಟಿಕೆಟ್‌

Team Udayavani, Jan 17, 2018, 6:45 AM IST

ಚೆನ್ನೈ: ತಮಿಳುನಾಡಿನ ಜಾನಪದ ಕ್ರೀಡೆ ಜಲ್ಲುಕಟ್ಟುವಿಗೆ ಮಂಗಳವಾರ ಮತ್ತೆ ಮೂವರು ಬಲಿಯಾಗಿದ್ದಾರೆ. ಶಿವಗಂಗಾ ಜಿಲ್ಲೆಯಲ್ಲಿ ಇಬ್ಬರು, ತಿರುಚ್ಚಿಯಲ್ಲಿ ಒಬ್ಬ ಅಸುನೀಗಿದ್ದಾನೆ. ಈ ಮೂಲಕ ಸೋಮವಾರ ಆರಂಭವಾದ ಕ್ರೀಡಾಕೂಟಕ್ಕೆ ಬಲಿಯಾದವರ ಸಂಖ್ಯೆ 4ಕ್ಕೆ ಏರಿಕೆಯಾಗಿದೆ.

ಕುತೂಹಲಕಾರಿ ಅಂಶವೆಂದರೆ ಈ ಬಾರಿಯ ಸ್ಪರ್ಧೆಯಲ್ಲಿ ಗೂಳಿಯನ್ನು ಪಳಗಿಸಿದವರಿಗೆ ಕಾರು ಬಹುಮಾನ ನೀಡುವುದಾಗಿ ಮುಖ್ಯಮಂತ್ರಿ ಎಡಪ್ಪಾಡಿ ಕೆ.ಪಳನಿಸ್ವಾಮಿ ಮತ್ತು ಉಪ ಮುಖ್ಯಮಂತ್ರಿ ಓ.ಪನ್ನೀರ್‌ಸೆಲ್ವಂ ಘೋಷಣೆ ಮಾಡಿದ್ದಾರೆ. “ಅತ್ಯುತ್ತಮ ಗೂಳಿ’ ಎಂಬ ಹೆಗ್ಗಳಿಕೆ ಪಡೆದುಕೊಂಡ ಮಾಲೀಕನಿಗೂ ಕಾರು ಬಹುಮಾನವಾಗಿ ಸಿಗುತ್ತದೆ.

ಎಐಎಡಿಎಂಕೆಯ ಬಂಡಾಯ ನಾಯಕ, ಆರ್‌.ಕೆ.ನಗರ ಕ್ಷೇತ್ರದ ಶಾಸಕ ಟಿ.ಟಿ.ವಿ.ದಿನಕರನ್‌ ಮದುರೆಯಲ್ಲಿ ಗೆದ್ದ ವ್ಯಕ್ತಿಗಳಿಗೆ ಉಚಿತವಾಗಿ ಸಿಂಗಾಪುರ ಪ್ರಯಾಣಕ್ಕೆ ಟಿಕೆಟ್‌ಗಳನ್ನು ಬಹುಮಾನವಾಗಿ ನೀಡುವ ವಾಗ್ಧಾನ ಮಾಡಿದ್ದಾರೆ. 

ಡಿಎಂಕೆಯಿಂದ ರಿಂಗ್‌: ಇನ್ನು ಪ್ರತಿಪಕ್ಷ ಡಿಎಂಕೆ ಕೂಡ ಗೆದ್ದವರಿಗೆ ಚಿನ್ನದ ಉಂಗುರ ನೀಡುವುದಾಗಿ ಘೋಷಣೆ ಮಾಡಿದೆ. ಪಕ್ಷದ ಕಾರ್ಯಾಧ್ಯಕ್ಷ ಎಂ.ಕೆ.ಸ್ಟಾಲಿನ್‌ ಪರವಾಗಿ ಪಕ್ಷದ ಪ್ರಮುಖ ಶಾಸಕರು ಈ ಘೋಷಣೆ ಮಾಡಿದ್ದಾರೆ.